كنت قاعد في يوم عادي بذاكر وبحاول اتحجج بأي حاجة تشغلني عن المذاكرة كعادة أي طالب بيكره مذاكرته ، شد انتباهي صوت من التلفزيون لممثل عارفه كويس ، كان صوت أحمد حلمي ، وكان اعلان اتصالات ، احمد حلمي كان بيقول كلمات مفهمومة ولكنها غير مترابطة ، سدد جون ، الساقة بالون ، هو بيقول ايه ؟!! ، بس انا فهمت من تعليقات الناس على الفيسبوك ان دي لغة معينة او كلام بيرمز لحاجة معينة ، مهما كان اللي بيقوله مش هتفرق خلاص ، انا لقيت حجة هروبي من المذاكرة ، انا هقعد احلل الاعلان دا بما انه بيقول طلاسم واهو بالمرة مش هذاكر خالص ، بدأت اعمل سيرش كتير عنه وظهرلي مواقع ومقالات كتير ، لغة غريبة ، سغة لمبة ، سغة ليمون ، لحد لما فهمت الفكرة بتمشي ازاي .
احنا بنشيل اول حرف من الكلمة اللي هنقولها ونعوضه بحرف السين ونحط الحرف دا في كلمة مفهومة بعد اول كلمة ، وبما انها اسمها لغة غريبة لو طبقنا عليها القاعدة دي هيكون اسمها سغة لمبة سغيبة غراب ، وكانوا بيستخدموا اللغة دي كلغة بين الشباب على الناصية زمان ، واحيانا كشفرة عشان لو في عدو ميفهمش احنا بنقول ايه ، بس وماله مش هتفرق استخدامها بنسبالي في حاجة ، لما جيت اخرج من اللينك اللي انا فيه لمحت مقال لسه نازل حالا بعنوان اعلان اتصالات وطلسم الموت سغة لمبة ، دخلت عليها وخدتها سكريين كلها عشان مافيش وقت ومضطر اكمل مذاكرة ، ولما قفلت وخلصت مذاكرة وجيت افتح اللينك عشان اقرا المقال دا لقيته اتمسح ، والموقع كله بالكامل اتقفل ، لجأت بسرعة للسكريين اقرا بيحكي عن ايه ولقيت الآتي .
معرفش ازاي مافيش ولا واحد مسؤول في اتصالات طلع قال ان مينفعش نطلع اللغة دي للعلن قدام الشعب كله ، اعلان زي دا كفيل يضيع حياة الاف من الارواح ، لو كانوا دوروا كويس كانوا هيكتشفوا ان دي لغة من لغات عديدة لطلسم مشهور اسمه طلسم الموت ودا طلسم اللي بيقوله بيقتل حد عشوائي في اي مكان حوالينا ، غريب عنك أو حتى قريب ، والدليل اننا لو فتحنا كتاب طاووس الأسوار في سحر الانوار هتلاقي اللغة مذكورة في صفحة رقم 167 الفقرة اللي بتقول : ( سعطي أسد سلإذن أحمد سقتل بارد سقرب أرنب سحد أجمد سي لامع ، سع مفتاح سجسيد تاريخ سوحك رماد سكانه مشرط ) ، ودي الجملة اللي انت بتقولها عشان تفعل طلسم الموت ، اة نسيت اقولك انت لازم عشان تقدر تموت حد تقرا الجملة دي قبلها ، ولو ترجمتها هتلاقيها بتقول ، أعطي الإذن بقتل أقرب أحد لي مع تجسيد روحك مكانه ، لسه متعرفنيش ؟ أنا الأحدب ابن العائم والصورة اللي في أول المقالة دي صورتي ،انا الروح المسئولة عن الطلسم ، انا صاحب الخطة الأكبر لقتل معظم البشريين ، شكرا ليك على مساعدتي في حصد روح جديدة .
فجأة النور قطع ، صوت فحيح حواليا في كل مكان ، سخونية الجو بتزيد وبتعلى ، اضاءة لونها احمر غريبة طغت على الشقة مش عارف مصدرها ، سمعت صوت خطوات بتقرب ، بصيت لقيته اخويا ، عينيه لونها احمر زي لون الدم ، فجاة وقع على الارض وقعد يترعش كتير ، صوت الفحيح زاد والشقة بدأت تهتز بكل عنف ، فتح اخويا بوقه على الاخر وصرخ صرخة منطلقة من الجحيم ، حسيت ان في كيانات كتير بتخرج من جسمه لعالمنا ، وفجأة كل حاجة سكتت ، مات ، اخويا مات بين ايدي ، قومت مصدوم للموبايل بحاول اقنع نفسي ان كل دا وهم واني مقرأتش حاجة ، بدات اعيط وانا بقرا من جديد كأني بقرا لاول مرة ، بس لوهلة حسيت بحركة ورايا ، لا مش مجرد احساس انا واثق ان في حركة ورايا ، وفي نفس اللحظة عيني وقعت على جزء من الطلسم اللي بيقول ، مع تجسيد روحك مكانه .
بصيت ورايا لقيت جسم اخويا طاير وباصصلي بنفس الابتسامة اللي شوفتها في صورة الأحدب ابن العائم في المقال ، ولما بصتله ابتسم وقالي :
ســهــلا أحــمــر ســيــك بــارد