 |
| مراجعة وتحليل فيلم justice league snyder cut | حصري |
الكاتب : مصطفى عمر كاتب خبير
مراجعة وتحليل فيلم Justice League Snyder cut | حصري .
كنت في الأول شايف فيلم justice league نسخة جوس ويدون joss whedon حلوة وممتعة ، اة مش احسن حاجة ومش ملحمية واة مش هي الفيلم المنتظر كأهم أفلام عالم dc بس في الأخر بنسبالي كانت حلوة ، بس أول لما شوفت trailer justice league حسيت ان في حاجة مختلفة وقوية جاية .
وأول لما شوفت الفيلم نفسه وشوفت مجهود زاك سنايدر zack snyder ورؤيته والمشروع اللي بيأسسه ، اقدر اقول ان نسخة جوس ويدن لازم تتمحي من التاريخ ولازم يتحاسب كل واحد مسئول عن الكارثة اللي اتفرجنا عليها دي .
عشان كدا الريفيو دا هعرضه من منظور الفيلمين بتحليل كامل وبدون حرق الا في الاخر وهبقى انوه قبله ، عشان في كام مشهد لازم نقفف عنده ونحلله ونبين ابعاده المخفية
ملحوظة : لازم تكون شوفت man of steel ، batman v superman ، wonder woman عشان هكون حارق منهم بعض الاحداث .
الفكرة
تعالوا نبص على فكرة الفيلم بدون حرق . سوبر مان superman مات . وباتمان batman حاليا عاوز يجمع فريق من الابطال عشان يحمي الأرض ضد أي خطر بسبب تهديد ليكس لوثر lex luthor بإن في خطر كبير قادم وباتمان مش هيقدر يصد الخطر دا لوحده .
وكمان عشان ينفذ وعده لسوبر مان بأنه هيعيد جمع شمل الأبطال من تاني بعد لما سعى أنو يفرقهم ، ولما نبص على الخطر هنلاقيه ستيبن ولف steppenwolf اللي جي الأرض عشان يجمع 3 صناديق اسمهم الصناديق الأم ، وبتجميع الصناديق دي واتحادهم مع بعض هيقدر يبيد الكوكب بالكامل .
تعالوا بقى نتاقش في الفكرة بين الفيلمين ، شايف يا جوس ويدن الفرق ؟ النسخة القديمة من الفيلم عرضت الفكرة وبس بدون أي أبعاد تانية حرفيا . يعني الفكرة اللي اتقدمت في الفيلم القديم هي هي اللي اتعرضت للفيلم بدون اضافات ، يعني مثلا ليه ستيبنولف جه الارض في التوقيت دا ياخد الصناديق . طيب ليه جي لوحده بدون داركسايد darkseid طيب ليه غامر انو يجي لوحده ، طب ازاي الصناديق دي اصلا وقعت في ايد البشر ، طب ايه هي دوافع بعض الابطال في مواجهة الخطر . كل دا في النسخة القديمة مش موجود . أما في ال snyder cut كل ابعاد الفكرة واضحة للكل ، كل التفاصيل باينة ومشروحة ، والفيلم مش بعمق ولا بصعوبة سرد فيلم batman v superman يعني سيب نفسك للفيلم وهو هيشرحلك كل حاجة وهيجاوبلك على كل تفصيلة . حتى تفاصيل التفاصيل مذكورة .
الشخصيات
نفس الشخصيات ، نفس الدوافع ، نفس القدرات الخارقة . بس فرق شاسع بين الفيلمين ، جوس ويدن حرفيا مدمر الشخصيات في فيلمه وتعالوا اوريكم ازاي .
ستيبنولف : انت ايه اللي عملته فيه دا ينجم ؟ انت ازاي تغير الشكل العظيم اللي شوفناه في snyder cut وتخليه بالشكل الضعيف دا . ضيعت هيبته وخليت شكله كأنه حد ضعيف ، دا حتى الافعال وطرق القتال كأنه حد رايح تخانق عادي مع شوية ناس . معروف عن dc قوة الفيلين villain او الاشرار وانت جيت خليت الشرير دا ضعيف ومهمش مع أن في justice league snyder cut شوفنا أعظم شرير في تاريخ العالم السينمائي . ظهرت قوته وهيبته وشكله الروعة وافعاله وابعاده ودوافعه .
داركسايد : انت ازاي تشيل داركسايد من الفيلم كأنه شئ ملوش لازمة ، يعني انت لو شيلته عشان تقوي وجود ستيبنولف . فاحنا لا شوفنا الفرش لداركسايد في الافلام الجاية ، ولا شوفنا هيبة ستيبنولف ، طب انت عامل الفيلم دا ليه . يعني ايه الغاية الاسمى من أهم فيلم في العالم السينمائي ، ولا أي حاجة . على العكس في snyder cut وجود دارك سايد ليه مكانته وهيبته بالرغم من ظهوره القليل الا انو حقق المطلوب منه وتم الفرش لفيلمه بشكل عظيم .
ونيجي بقى لاهم كارثتين في الفيلم .
سايبورج cyborg : سايبورج في نسخة جوس ويدن مهمشة بالكامل ، مجرد آلة بتتحرك وبتنفذ اوامر بروس واين . انما في justice league snyder cut في كام مشهد زيادة لشرح تاريخ سايبورج وابعاد شخصيته ودوافعه في المشاركة في الحرب نقلت قصته وحكايته ومشاعرنا تجاهه نقلة تانية . سايبورج يعتبر قلب الفيلم اللي بيدور حواليه معظم الاحداث ، في مشهد لسايبورج انساني مش قتالي خلانا نتأثر اكتر من اي حاجة تانية .
فلاش flash : فرق شاسع بين الشخصيتين وكوميديا اقل ومتوظفة صح على عكس النسخة الاولى اللي كوميديتها تقليد لمارفل وخلاص ويكفي كام مشهد ليه مش هحرقهم بس فلاش في اول نسخة يدوب انقذ افراد وعائلات . هنا فلاش انقذ العالم كله ، وكمان المشاهد اللي فرشت للشخصية جميلة وبتبينلك قدراته .
باتمان batman : القائد ، بروس واين ، اذكى شخصية في justice league ، الكاريزما والثقة والصرامة ، مش بروس واين المهزق اللي ظهر في نسخة ويدن ، بروس واين هنا لما بيدي أمر بيتنفذ . مبيخافش ولا بيزعل كل شوية ، قائد تحت طوعه العديد من الابطال الاقوى منه كقدرات خارقة الا انو قادر يسيطر على كل واحد فيهم .
ملخص الكلام جوس ويدن دمر الشخصيات تماما وخلاها بسيطة وهشة على عكس زاك اللي مجسدلنا الكوميكس قدام عينينا .
الاحداث والحبكة
story telling من أعظم ما يكون ، انا اعرف اني لما الاقي فيلم اربع ساعات وحابب اقصر مدته ، اخليه 3 ساعات ونص أو 3 ساعات . لكن اشيل نص الفيلم ؟ ، طب يارتني شيلت مشاهد ملهاش لازمة ، دا انت شيلت حبكات وابعاد وقصص مهمة للشخصيات ، ترتيبك نفسه للمشاهد غير منطقي . انما زاك سنايدر شارح كل حاجة ، مرتب ترتيب عظيم للمشاهد ، 4 ساعات بدون ملل أو مشاهد ملهاش لازمة . اللهم الا كام مشهد سلو موشن ملهمش لازمة ودي كدا نقدر نقول عليها اول سلبية في الفيلم والوحيدة ، ان مكانتش سلبية غير مؤثرة اساسا ، كمان fight النهاية متطورة وفيها تكنيك اعلى بكتير من النهاية في الفيلم الاول . حرب تحبس الانفاس ومثالية لنهاية فيلم زي دا .
وطبعا مش محتاج اتكلم عن الميوزك والتصوير وتعديل الالوان عن النسخة السابقة ، انا هسيبكم تتمتعوا بجمال ال 3 حاجات دي بنفسكم .
تحليل وشرح لمشهد النهاية ( حرق للاحداث spoiler !!!! )
أول حاجة بنجهز ونفرش لحرب داركسايد على الأرض . وسعيه وراء المعادلة المضادة للحياة المرسومة على سطح الكوكب ودا بيرفع التشويق لاعلى حدوده بعد رؤيتنا لقوة ستيبنولف ، ما بالك وجود داركسايد نفسه , ولو عاوز تاخد نبذة عن اللي هيعمله داركسايد افتكر الرؤية اللي شافها سايبورج قبل ما يعيد الحياة لسوبر مان . شوفنا دارك سايد معتلي عرش الارض ، wonder woman ميتة قدامه وكل الامازونيات خاضعين ليه ، وشوفنا دارك سايد وهو بيقتل aquaman وشوفنا superman وهو بيبكي على جثة قدامه واللي ممكن تكون حبيبته لويس . هل دا اللي هيحصل فعلا ؟ .
تاني حاجة بنعيد التأكيد والذكر على شخصية ديث ستروك deathstroke ومقابلته مع ليكس لوثر . واللي ميعرفش ديثستروك فهو شخصية مشهورة جدا في الكومكس وليه عداء طويل مع باتمان ووجوده في العالم السينمائي وتجسيد صراعه مع باتمان في تشويق عالي جدا لعشاق الكوميكس . وفي المشهد دا بيتعاون ديث ستروك مع ليكس لوثر عشان يطيح بباتمان واداله معلومة مهمة جدا ، ان باتمان هو بروس واين ، وبكدا نكون مهدنا لفيلمين justice league 2 و batman وهو فيلمه الاول المنفرد في العالم السينمائي .
وعندنا كمان مشهدين مهمين للشخص الغريب اللي ظهر في اخر الفيلم وكان متجسد في شكل أم سوبرمان ودا هو مارشن مانهانتر martian manhunter ، وبنعرف انو هيكون ليه دور مهم في فريق justice league في المستقبل ، واللي كان بيقول ازاي بروس واين طلع واجهه بدون اي اسلحة او اي شئ يحمي بيه نفسه . فاكرين اول الفيلم لما بروس واين قال ل ألفريد ان في اتنين رفضوا الانضمام للفريق ، بعض النظريات بتقول انه يقصد اكوامان و مارشن مانهانتر وعشان كدا طلع قدامه بتلقائية لانه عارفه وعارف دوافعه كويس .
بعدين بنشوف كابوس جديد لباتمان وفي عوامل مشتركة كتير بينه وبين الكابوس السابق في فيلم batman v superman نفس المكان المتدمر . superman هو الشرير ومتبقي من justice league فلاش وسايبورج بس ودا تأكيد على موت اكوامان و وندر ومان زي ما قولنا ، واللي بيأكد اكتر وجود ميرا اللي هتنتقم لموت اكوامان . اما الصدمة الكبيرة هي وجود ديثستروك والجوكر في فريق باتمان !! هل الخطر اللي هدد الارض قوي لدرجة تحالف باتمان مع ألد عدويين ليه !! وفي المشهد دا تأكيد على موت لويس ، وهنا بنروح لنقطة مهمة . فاكرين فلاش في batman v superman لما جه لبروس واين في المكتب عن الطريق التلاعب بالزمن وكان بيقوله لويس ، هل فلاش هيتلاعب بالزمن زي ما عمل في مشهد النهاية ويحاول يرجع الامور لطريقها الصح ؟ ودا بيمهدلنا لفيلم flash اللي تم الاعلان عنه من مدة .
هل كل الافلام دي هتتنفذ فعلا ولا لأ ، لحد دلوقتي المشروع متوقف ، وفي انتظار الضغط اكتر على الاستوديو وموافقة زاك سنايدر وكل حاجة هترجع لطبيعتها .
تقييمي للفيلم العظيم دا 9.5 | 10