 |
| التخاطر الروحي |
قراءة الافكار عن طريق التخاطر الروحي ، أحيانًا بنتمنى كلنا يبقى عندنا قدرة خاصة نمتلكها في جسمنا تساعدنا نتحكم في أشخاص تانيين ، وساعات بنبقى عايزين نوصل رسالة لحد معين بس مش عارف أقولهالوا في وشه مباشرة .
فكنت قاعد عادي بتصفح الفيس بوك زي أي حد ، ولاقيت بيدج معينة منزلة مقالة عن موضوع اسمه التخاطر الروحي ، والتخاطر دا بيساعدك تتواصل مع أشخاص تانيين أو بمعنى أدق بيخليك تتحكم في تفكير ناس تانية سواء كانت معرفتك بيهم قليلة أو كبيرة .
الموضوع شدني جدًا ، فدخلت أشوف المقال لاقيت عالم كبير جدًا ، فقولت لنفسي هل فعلًا أمنيتي هتتحقق وأقدر اتحكم في أفكار صحابي وأفكار الناس اللي بتضايقني ، وبدل مستخدم الواتس اب والفيس بوك هستخدم مخي عشان أوصلهم رسايل .
فبدأت اقرأ المقال بتأني كدا ومركز أوي وكانت أول حاجة في المقالة بتحكي عن ..
ما هو التخاطر الروحي
بيقولك ايه بقى يا سيدي هنا ، قالك التخاطر الروحي دا بقى بيحتاج تكون في مكان هادي ويكون ذهنك صافي خالص ، لأ وكمان تكون الإضاءة قليلة عشان تنجح عملية التخاطر الذهني دي .
وإنه دا بيستلزم تستهدف عقل شخص تاني يعني مينفعش تعمله لنفسك بس تبقى أهبل بجد ، يعني انا مقولكش اخفض النور واصفي ذهني واعمل واعمل عشان اخاطر روحي أنا في الأخر .
يعني لازم استهدف عقل شخص تاني وابتدي أخاطر عقل الشخص التاني دا من غير مستخدم أي حاسة من حواسي التانية يعني ممكن تقول لنفسك انك هتستخدم حاسة سادسة انت مش شايفها .
وخلصت الجزء دا من المقال وقولت لنفسي شكل الموضوع مش حقيقي بس هكمل ولاقيت الجزء التاني من المقالة بيتكلم على :
أشكال وأنواع التخاطر الروحي
هتيجي تقولي انت يعم الحج مش ناقصة لبخة هو مش الشكل والنوع نفس الكلمة ، هقولك اصبر على رزقك منت بطريقتك وعدم صبرك دا مش هتقدر تجرب تعمل تخاطر لحمامة حتى ، أصبر على رزقك .
الأشكال بقى ايه يمعلمين ، اشكال التخاطر الروحي زي مثلًا لما تفكر في حد معين وتلاقيه كلمك على الواتس أو اتصل بيك ، أو بتفكر مثلًا في حاجة معينة وتلاقي حد بيتكلم عنها ، أو انت وحد تاني تقولوا نفس الكلمة في وقت واحد .
دي كانت أشكاله طب أنواعه ايه بقى :
- اول نوع هو انك تعمل تخاطر ذهني بس بياخد منك مدة زمنية طويلة .
- النوع التاني انك تنقل احاسيس ومشاعر معينة من غير مدة زمنية محددة .
- وفي تخاطر الحب زي مبيقولوا ، وهو انك تحس بمشاعر حد ناحيتك أو هو يحس بمشاعرك ناحيته ودا نوع مميز من التخاطر عند البعض .
- وفي بقى تخاكر تاني والأخير ودا لازم تقرأ عن حاجة اسمها اللاوعي .
ودا يخليك تفهم ان كل واحد عنده قدرة معينة من التخاطر الروحي يعني في يقدر يخاطر في مدة قليلة ، وفي اللي يقدر يخاطر في مدة طويلة ، لكن بعد قرائتي للمقال تبين إن هناك تمارين ممكن تعملها عشان تساعد من قدرتك على التخاطر الذهني دا .
تمارين التخاطر الروحي
اول حاجة قوة العقل أو الخيال . ودا معناه إنك تركز كويس وتقعد في مكان هادي وإضاءة هادية .
بعد كدا تركز في ملامح الشخص اللي عايز تفكر فيه كويس جدا ، بالبلدي ترسم صورته في خيالك ، وأهم عامل الثقة لازم تبقى واثق من اللي انت بتعمله دا عشان ينجح التخاطر الروحي دا معاك .
العامل 2 معانا بقى بنشوفه في الأفلام كتير بس بشكل كوميدي أحيانًا ، ألا وهو انك تبص لصورتك في المراية وتشوف صورة شخص تاني .
وهو دا بالظبط اللي المفروض تطبقه ، أقف قودام مرايتك بص لملامحك وارسم على ملامحك دي ملامج الشخص اللي انت عايز توصله الرسالة ، طبعا مع مراعاة الجو الهادي الإضاءة الخافتة والثقة بالنفس .
التمرين 3 ، وهو حاجة شبيهة للي بيستخدمه الساحر المشهور كريس المصري ، في لعبة كدا كريس بيلعبها دايمًا ، ألا وهي انه يقولك اختار رقم من 1 ل 50 مثلًا ، ويقولك افضل كرر الرقم دا في عقلك كتير ورا بعض .
هنا بقى كريس المصري بنسبة كبيرة بيستخدم لعبة التخاطر الروحي بينه وبين الشخص اللي قوصاده ، ويبتدي كريس بشكل سريع يخمن الرقم دا ، وانت طبعًا تنبهر من اللي بيحصل ، عشان كدا دايمًا يقول كلمته الشهيرة "دا مش سحر ، دا فن اسمه فن الخداع" .
يعني كريس المصري بيقرأ أفكارك عشان هو اتمرن على طريقة التخاطر المباشر ، وبقى بارع جدًا فيها لدرجة الإحتراف .
طبعًا قومت وجريت عشان أعمل تخاطر روحي ولكن مش هقدر أقولكم حصلي ايه ، بس قبل متبدأ وتجرب خليك يقين انك مش هتنجح أو تفشل غير لما تخوض التجربة دي مع نــفــســك .
أتمنى المقالة تعجبكم ، وإلى لقاء آخر مع مقالة أخرى في مجتمع كــوكــتــيــل قــصــص .
