كوكتيل قصص
Founder
في بنت علي احد مواقع التواصل الاجتماعي بتسأل وتقول انا فتاة بعاني من الجاثوم من سنين طويلة وبيصبني علي الاقل مرة كل اسبوع ولحد النهاردة مش قادره افهم اسبابه بالضبط او حتي طرق منعه واللى كان مخليني اصبر لفترة طويلة هو ايماني التام بان الجاثوم مش بسبب جن أو مس من العالم الاخر زي ما بنسمع دايماً .
وده لانه بيصبني في كل حالاتي الصبح وبالليل والفجر وبعد الصلاة وحتي وانا على وضوء فخمنت تاني الموضوع ممكن يكون عرض مرضي مش اكتر ، لكن مؤخرا حصل معايا موقف خلاني اتردد شوية اتجاة قناعاتي في الفترة الاخيرة بدأت تخطر علي بالي افكار بان الموضوع ممكن يكون مس ، وفعلا امبارح بالليل أصابني جاثوم مخيف للغاية ، بدات أحلم إن في ست لابسه عباءة سودا بتطاردني أنا وأختي وكنا مرعوبين .
وبعد ما استيقظت من الحلم اكتشفت إني لسه بحلم لإن لما قمت لاقيت أختي قاعده جنبي وهي حزينة وبتعيط ، والمريب ان اختي اصلا متوفية من سنين ، وكأني كنت جوة الحلم بحلَم بحِلْم غيره ، وبعد كدة حصلت بعض الأحداث الكئيبة وانتهي الحلم ، وبدأت مرحلة الجاثوم او الشلل .
حسيت بأيد بتضغط علي راسي وكتفي ، وبتقرب مني بهدوء . بدأت ازوقها وأبعدها عني ، وكان ملمسها غريب شبيه بالمطاط الأسود ، ومع الصراع المستمر اتفك الجاثوم اخيرا ، لكن الغريب بقي في القصة دي انا لما صحيت اكتشفت إن في ألم في كتفي فعلا مكان الضغط ، ولحد دلواقتي مش عارفه ايه السبب هل اللي بمُر بيه سبب عضوي ، ولا مش شيطاني ، والاهم من كدة ازاي اتخلص منه .
القصة من منظور علمى ( شكل الجاثوم )
بعد المقدمة المخيفة دي بقى تعالي نتكلم في الموضوع شوية من وجهة نظر علمية ، كتير منننا مروا بتجربة انهم يصحوا فجأة من النوم مفزوعين ويحسوا ان فيه تقل موجود علي صدرهم ، وبيمنعهم تماماً من الحركة ، ومبنبقاش قادرين نحرك اي عضلة في جسمنا وحتي لنسانا بيكون متكلبش ، ومش قادرين نصرخ ونطلب النجدة حتي .
لو في اشخاص معانا في نفس البيت او حتي معانا في نفس الغرفة بتبقي صاحي ومتأكد انك صاحي وما بتحلمش وشايف كل حاجة موجودة حواليك ، بل إنك كمان ممكن تسمع اصوات اهلك اللي بتصدر من الغرفة المجاورة ، لكن بالرغم من كدة مش قادر تقوم من سريرك ولا تتخلص من الشيء المرعب اللي مسيطر عليك سيطرة تامة ، ابتداء من شعر الراس لحد صوابع رجليك ، وفجأة كل دة بينتهي وبيتحرر جسمك فجاة .
اللي اتكلمنا عنه ده اسمه الشائع هو " الجاثوم" واسمه العلمي " شلل النوم" والحقيقة الجاثوم ميعتبرش من الحالات الطارئة علي حياة البشر علي الاطلاق ، وده لإن الناس وصفوه علي مر القرون السابقة ، لكنه كان بيتم اعتباره نتائج عن مخلوقات شريرة بتهاجم الانسان في حالة بين النوم واليقظة ، علشان يسببوله الرعب الشديد .
ويمكن من اشهر الاشياء اللي جسدت الجاثوم كانت لوحة بريشة الفنان البريطاني هنري فصيلي بترجع لعام 1787 واللي بيصور فيها شلل النوم او الجاثوم كائن غريب جالس علي صدر احد الأشخاص النائمين ، وظهر الجاثوم برضوا في كتابات الأدب العالمي زي كتابات شكسبير واللي وصفوا في احد قصصه بإنه عجوز شرير .
وحصلت بعض المحاولات لوضع وصف سريري لمرض شلل النوم في القرن 17 من خلال مقالة علمية نشرها بعض الأطباء في مجلة الجمعية الملكية للطب ، ويمكن قبل كل دول العالم المسلم ابن سينا وصف الظهارة في كتابة الطبي " القانون في فصل سماح الكابوس" وحقق فيها عن شلل النوم ، قال عنه انه مرض بيشعر فيه الانسان عند دخوله في النوم بخيال ثقيل يقع عليه ، يعصره ويضيق نفسه ينقطع صوته وحركته ويكاد يختنق لإنسداد المسام واذا انقطع عنه انتبه .
وده معناه ان الجاثوم متأصل في المجتمعات البشرية من زمان ومش حاجة حديثة ولا حاجة ، اما بخصوص تفسيره فدا اللي مكنش واضح في الماضي بشكل كبير ، وبدات الصورة توضح نسبياً في العصر الحديث .
الجاثوم او شلل النوم او اللي هو نوع من انواع اضطربات النوم اللي بتصيب الانسان لما يبقي علي وشك الاستيقاط من النوم ، وبيحصل لما الوعي بيرجع للإنسان ، لكن الجسم بيكون ما زال في حالة ارتخاء عضلي ، ودا اللي بدوره بيسبب للشخص حالة من الجمود واحيانا هلوسة ممكن تستمر لثواني او دقائق .
مراحل النوم عند الإنسان
وفي البداية عشان نفهم تفصايل الجاثوم ، احنا محتاجين نعرف مراحل النوم ، الانسان اثناء النوم بيمر بمرحلتي مهمين جدا مرحلة العين البطئية ، ومرحلة العين السريعة ، النوم في العادة بيبداً بمرحلة العين البطيئة ، واللي بتستحوذ علي حوالي 75% ، في المرحلة دي الجسم بيبدأ يرتاح تماماً ويستعيد عافيته ونشاطه ، ومع انتهاء المرحلة دي بتبدأ مرحلة العين السريعة ودي بقي بيت القصيد .
المرحلة دي هي اللي بيحصل فيها حالة الانخراط في الاحلام اللي ما بتحصلش في المرحلة الاولي وبتبدأ العيون تتحرك بسرعة مع استرخاء باقي عضلات الجسم ، وهنا بقي بيبدأ الجسم انه يفصل بين الدماغ والعضلات ، ودا ببساطة علشان ما يحصلش تفاعل بين عضلات الجسم وبين الاحداث اللي بتحصل دلواقتي داخل الدماغ ، ودي من رحمة ربنا سبحانة وتعالى بينا لان ايدك او رجلك لو تفاعلوا مع اللي بيحصل داخل الحلم فده بلا شك هيعرض حياة الانسان للخطر ، وخصوصا لو الإنسان ده بيحلم انه سوبر مان وهو بينط من الشباك ويطير ، وقتها هينط من الشباك بس مش هيطير .
طيب اي برده علاقة دة كله بموضوع الجاثوم ، علاقته ببساطة ان ممكن لسبباً ما الشخص يصحي فجأة اثناء مرحلة العين السريعة وزي ما قلنا ان الجسم في المرحلة دي بيبقي فاصل التحكم في حركة العضلات ، وعلشان كده الشخص لما بيصحي في الموقف دة بيشعر بشلل تام ، يحاول يحرك اي عضلة من عضلات جسمة او يتكلم بلسانة ، لكن للاسف مافيش اي حاجة بتستجيب .
في الوقت اللي فيه دماغه مستيقظ وسمعه وبصره وادراكه لمحيطه وفي حالة سليمة ، وعلشان كدة الشخص في الموقف دة بيكون واعي لذاته ، لكن مش قادر يتحكم في الجسد ، والحالة دي عادة بتكون مصحوبة بهلاوس سمعية او بصرية ، بتخليك تسمع اصوات او تشوف خيالات غير موجودة في الواقع ، أما بخصوص الاحساس بإن في حاجة بتكون كاتمة علي الصدر فدا في الغالب بسبب ان عضلات الصدر ما بتكونش نشطة هي كمان .
الحاجة الوحيدة اللي بتكون فعاله هي عضلة الحجاب الحاجز فقط ، وبالتالي بيبدا الشخص يشعر بضيع تنفس وضغط شديد علي منطقة الصدر ، واللي حكيناه دا ببساطة هو السيناريو الخاص بشلل النوم او الجاثوم . واللي ممكن نخلصوا بإنه حاله بتحصل لما نخترق الحواجز اللي بين عالم النوم وعالم اليقظة .
أسباب أخري للإصابة بالجاثوم
طيب يا تري في أسباب بتساهم بشكل أو بآخر في حدوت الجاثوم ، في الواقع اه الجاثوم ممكن يكون ناتج عن التغيير المستمر والغير مستمر في مواعيد النوم ، وكمان نتيجة الثبات أثناء النوم ، وخصوصًا الاستلقاء والنوم على الظهر لفترة طويلة ، وأخيرًا في عوامل تانية ممكن تؤدي للإصابة بالجاثوم زي الصداع النصفي وانقطاع النفس الانسدادي والإجهاد والقلق وحالات الهلع وغيرهم .
بالإضافة إلى تناول بعض الأدوية زي أدوية علاج قصور الإنتباه وفرط الحركة ، وكمان الإفراط في التدخين وتناول الكافيين والمنبهات . اللي زي الشاي والقهوة والبيبسي والكولا وغيرهم ، والحقيقة عشان هو ميعتبرش مرض بيحتاج لأدوية أو زيارة الطبيب إلا في حالات نادرة للغاية ، وعشان كدا يقدر الشخص إنه يتجنب ظاهرة الجاثوم من خلال خطوات بسيطة .
خبراء الأعصاب بينصحوا الأشخاص اللي بيتعرضوا للجاثوم لمرات عديدة ، بإنهم يثبتوا مواعيد معينة للذهاب للسرير ومواعيد معينة للإستيقاظ ، حتى في أيام الأجازة ، وكمان السرير لازم يكون نضيف ومريح ، وملابس النوم كمان تكون مريحة ، بالإضافة كمان لتنظيم وقت للقيلولة ، ونتجنب اننا ننام بعد العصر ، ويفضل إن مدة القيلولة نفسها ماتزيدش عن 90 دقيقة .
وأخيرًا نتجنت المنبهات والكافيين وتحديدًا قبل النوم ، وتجنب المشروبات الكحولية بشكل كامل ، وكمان تجنب العشاء قبل النوم مباشرة ، ويفضل إن العشاء يكون قبل موعد النوم بساعتين على الأقل ، ونصيحة أخيرة لو دخلت في حالة جاثوم أو شلل نوم وبعد كدا جسمك تحرر منه ، ما ترجعش للسرير وتنام تاني بسرعة ، تمهل شوية لإن الموضوع ممكن يرجع مرة تانية .
هل ليه علاقة بالجن والمس
استنوا لسه في سؤال كمان ، هل الموضوع فعلاً مالهوش علاقة بمخلوقات العالم الآخر لا من قريب ولا من بعيد ولا ايه القصة بالظبط ، في الواقع ما حدش يقدر ينفي الموضوع ده بالكلية ، الجن والعالم الاخر موجودين واحنا مؤمنين تمام الايمان بوجودهم ، بل أن الايمان بوجودهم واجب علي كل مسلم ، ودي مش فذلكة مننا ولا حاجة ، القرآن الكريم والسنه النبوية الصحيحة تحدثوا عن الجن واحوالهم في مواضع كتير .
وانفرضت سورة كاملة في القرآن بالكلام عن احوال الجن اللي استمع إلي القرآن من رسول الله صلي الله عليه وسلم وهو بمكة ، ألا وهو سورة الجن وعرفنا ان في منهم الصالح وفي منهم الغير صالح ، وبجانب الادلة الشرعية فالعقل أساساً لا يمنع من وجود عوالم غائبة عن حواسنا التقليدية ، وده لان في حاجات كثير في الكون حوالينا الانسان ما بيقدرش يشوفها ، لكنه بيستدل علي وجودها وبيتعامل معاها عادي جداً .
زي الاجسام الذرية والدون ذرية وغيرهم كتير ، ودة معناه إن عدم القدر علي ادراك الشيء لا تستلزم عدم وجودة ، طيب عايزين نقول ايه م نالكلام ده ، عايزين نقول ان ايوه ممكن يكون في حالات مس بيتعرض ليها بعض الاشخاص ، واعراض الحالات دي بتكون شبيهه باعراض الجاثوم اللي اتكلمنا عنه .
اذا الجاثوم بوجه عام بيكون بسبب استيقاظ الانسان في مرحلة حركة العين السريعة ، بالإضافة لإن ممكن يكون في بعض الحالات ليها أعراض شبيهة بيكون سببها مس لا قدر الله ، وعلشان كده بننصح دايما ان اللي يتعرض للجاثوم يقرأ اذكار النوم وبعض الآيات القرآنية ، ويتجنب النوم علي ظهره وينام علي احد الجانبين ويفضل الجانب الايمن ، تنفيذ لتعاليم النبي صلي الله عليه وسلم وعلشان منضغطش علي عضلة القلب .
ونخلي العشا خفيف وما فيهوش اي حاجة دسمة ، كل دي حاجات بتحفظنا اثناء النوم وبتخلينا ننعم بليله هادئة وبتساعدنا بشكل واضح علي الاسترخاء ، واخيرا للناس اللي بتربط بين الجاثوم وبين الاسلام ربط مباشر فلا نعلم آية من كتاب الله او حديث صحيح عن النبي صلي الله عليه وسلم فيه ذكر للجاثوم . فالموضوع وارد يكون بسبب الجن ووارد جدا تكون حالة مرضي .
