 |
| الذهب في الحقيقة مش نادر | طب ليه قيمته عالية |
الذهب هو ملك المعادن عند البشر . الرجالة بتحبه في الاستثمار والستات بتحبه في الزينة ، لكن المحير بقي ان الذهب وان كان ليه بعض الخصائص الجميلة الا ان الخصائص دي موجودة في عناصر تانية كتير .
اما لو فكرت في سبب ارتفاع ( اسعار الذهب ) فهتحتار زيادة . السبب اللي بيخلي اي حاجة غالية هو الندرة او قانون العرض والطلب لو الحاجة موجودة كثير ما بتبقاش غالية ولو مش موجود منها كثير بتبقي غالية ، بالنسبة للذهب بقي هو عنصر متوفر ولا يعتبر من العناصر النادرة .
الذهب في الحقيقة مش نادر | طب ليه قيمته عالية .
لو تأملنا في المعابد والمقابر والتماثيل الذهبية اللي خلفتها حضارات العالم القديم ، او في كمية الذهب المكتشفة عند حضارة الإنكا . او بصورة عامة كميته المستخدمة باصراف في كل الحضارات ، بالاضافة الي ان الحضارات الحديثة استعملته في سوق العملات والنقود فنقدر نستنتج إنه مش بالندرة الكبيرة اللي البعض بيتصورها .
وبالفعل هذا المعدن النفيث بينتشر في الجبال وبين الصخور علي هيئة عرق . وموجود كمان كرواسب في التجمعات النهرية . وموجود في ماء وقيعان البحار والمحيطات ، فنقدر نأكد إنه من العناصر غير النادرة في الكرة الارضية.
وبمناسبة الكرة الارضية فمعروف ان المعدن دا من العناصر الداخلية علي الارض بل دخيل علي المجموعة الشمسية كلها ، بشكل أوضح الدهب من العناصر التقيلة اللي وقعت علي سطح الارض وغاصت في اعماق الارض لارتفاع كثافتها في بداية تكون الارض .
وكان وصولها للارض عن طريق وابل من النيازك اللي اتكونت من الانفجار الأعظم . والسبب في كدة إن كمية الحرارة والطاقة المطلوبين لتخليق النوع دا من العناصر الثقيلة غير متوفرة في الشمس بتاعتنا ، وانما بيتطلب الامر لنجوم عملاقة قادرة علي انتاج قدر رهيب من الطاقة في مراحل حياتها الاخيرة .
ووفقا لمجلس الذهب العالمي وحتي نهاية 2019 اجمالي الكمية اللي تم استخراجها عبر التاريخ بلغ حوالي 197.567 طن . يعني قريب جدا من 200000 طن وان 47% تقريبا من الكمية دي تم استخدامها في صناعة المجوهرات واغراض الزينة والحلي بما يوازي 93000 طن .
بالاضافة الي حوالي 14% في المجالات الصناعية للطب والالكترونيات والمواد الغذائية بما يوازي حوالي 28 الف طن ، واخيرا حوالي 39% من الكمية دي بمعدل 76000 طن تقريبا تم حفظها دون تصنيع اي شيء بهدف الاستثمار وحفظ القيمة .
واشار مجلس الذهب العالمي كمان لوجود احتياطي ممكن استخراجه بالتكاليف العادية يقدر بحوالي 54,000 طن ، يعني 54,000 طن ممكن نستخرجهم مع وجود جدوي اقتصادية نكسب من وراهم يعني . والا ففي اطنان من الذهب مخلوطة بالبحر مثلا .
لكنها موجودة في تركيز قليل وتحتاج لمصاريف عملاقة لازاحة وتنقية وفلترة المياة علشان نطلع منها بكمية ذهب تذكر ، واياً كان الكمية اللي تم اكتشافها لحد دلوقتي منه كمية كافية بالفعل . وخصوصا انه ما بيهدرش كتير . يعني ممكن الخاتم او الغويشة اللي موجودين دلواقتي يبقي هما نفس الذهب اللي كان في كرسي ملكي لاحد الملوك في مرحلة ما .
وزي ما قلنا في الاول ندرة الموارد يؤدي لارتفاع ثمنها فالذهب بقي مش بيستهلك ، كمية الهبر فيه قليلة للغاية فيا تري بقي ايه السبب في ارتفاع قيمته .
سعر الذهب غالي ليه بقي .
فالحقيقة الاجابة بمنتهي الاختصار هو في صعوبة الاستخراج التنقيب يعني وارتفاع التكاليف ، بمعني اخر نقدر نقول انه موجود واحنا عارفين مكانه وعارفين كمان طريقة استخراجه . لكن في الحقيقة مافيش جدوي اقتصادية من استخراجة من مكانة ، تكاليف استخراج جرام الدهب هتبقي اعلي من سعر بيعه.
وعلشان اوضحلكم موضوع الجدوى الاقتصادية دي خلينا نضرب مثال :
هتاخد فرقة من صحابك وتطلعوا علي الجبل وتاخد معاك عدة تكسير الصخور وعدة للحفر ، ويستحسن تبقي عدة يدوية من غير بلدوزرات ولا حاجة علشان ما حدش يحس بيكم ، التنقيب عن الدهب ليه شروط كتير علشان يبقي قانوني ، والاهم علشان يكون من غير مخاطر .
لانه بيختلط بشوائب وعملية فاصلة عملية بتؤدي الي اخطار التسمم والموت ، لكن هنعتبر انك هتاخد معاكم اقنعة غاز وهتخلوا بالكم ، المهم نبدا بالحفر والتنقيب لو حظكم كويس هتقدروا تلاقوا في كل طن مزاح من الصخور والاتربة جرام من الدهب ، كسروا بقي الصخور الكبيرة علشان تقدروا تشيلوا احجام معقولة في العربية . وبعدها تعالوا عشان نبداً مرحلة التحليل والفصل .
مرحلة التحليل والفصل .
المرحلة دي تتطلب أحواض معينة من مواد ومعادن خاصة تحتوي علي الزئبق الابيض وبيتم غسل الاحجار وطحنها فيها وبيتم تفتيتها وتلقيبها بعمود الكربون ، وفي النهاية بتخرج الشوائب وبيترسب الذهب في قاع الاحواض لان كثافته اعلي . بعدها بقي نجيب شوية الدهب اللي شبه البودرة المطحونة اللي اترسبوا في قاع الحوض دول علشان ندخل بقي في مرحلة الصهر .
مرحلة الصهر .
والمرحلة دي بتحتاج افران معينة طبعا بدرجات حرارة مرتفعة جدا ، وبعدين نجيب المصهور منه علشان مرحلة التعدين والتشكيل واللي فيها بيتم سكبه في قوالب خاصة لتشكيل السائك وتجهيزها لمرحلة العرض علي التجار .
في المرحلة دي بقي قولي ثمن الجرام ده هيساوي ايه من المجهود او المصاريف اللي راحت في سكته .
المعايير الدولية ل التنقيب عن الدهب .
في الحقيقة لو انت لسه مُصر انك تنقب عن الدهب فلازم تعرف ان في اتفاقيات دولية بتحكم العملية ، وفي معايير وقوانين صارمة ، ومن ضمن المعايير المفروض دي واولها هو الحصول علي الموافقة من الحكومات واحترام معايير العمل واهمها توفير طروف العمل الآمنة ، وكمان مرعاه إن اعمال التنقيب تكون بعيده عن اماكن ال عمران او المناطق العسكرية والنزاع المسلح .
واخيرا التعد بإن المشروع مش هيلوث التربة ولا المياه ولا الهواء ، والتكفل كمان بعمليات الاغلاق والتنظيف للمواقع . الحقيقة بقي بالرغم من كل الصعوبات دي وارتفاع التكاليف الا إن سحره بيخلي شركات التعدين مهتمة بالكشف والتنقيب بصورة مستمره ، بل إن معظم الشركات دي حددت بالفعل بعض الاماكن اللي بيتواجد فيها المعدن النفيث عديم الجدوي الاقتصادية انتظاراً للتكنولوجيا المناسبة اللي تساعدهم في استخراجة .
الذهب واستخداماته الأخري غير المجوهرات والزينة .
في محاولة اخيره بقي الي فهم اهميته وتعلق الناس بيه ، نعرف انه ليه استخدامات عديده غير الزينة والمجوهرات .
يستخدم في صنع رقائق الكمبيوتر لانتاج الدوائر الكهربائية لإنه موصل ممتار للكهرباء .
وبيستخدم في المجالات الطبية لعلاج التهابات المفاصل وبعض انواع السرطانات وكمان بيشتهر في مجال طب الاسنان وعمل الحشوات الذهبية بالاضافة الي بعض الصناعات واعمال الطلاء بل إنه بيدخل في صناعة بعض المواد الغذائية .
واخيرا الذهب شهير جدا في المجال الاقتصادي والاستثمار وصك العملات ، فزي ما قلنا بالرغم من انه موجود كتير . إلا إن السبب في ارتفاع ثمنه هو ان تكلفة استخراجة كبيرة جدا .
ويستخدم أيضاً في حماية رواد الفضاء ، ويدخل في أغلي الأطعمة في العالم ، ويزين به المباني الفخمة ، كما إنه يستخدم كماسكات للعناية بالبشرة او يدخل في مستحضرات التجميل ، ويستخدم في الطباعة والكتابة . وبكدا نكون جاوبنا على سؤال ليه الذهب مش نادر في الطبيعة وليه قيمته عالية .
