قصة شيخ بورسعيد
بقلم : محمد شعبان
انا شاب من محافظة بورسعيد، من سنين كده كنت انا وأهلي في شقة بس سيبناها بسبب أن والدي شاف شقة أحسن منها، الفكرة بقى يا أستاذ محمد مش في الشقة القديمة ولا الجديدة.. الحكاية هنا بتتعلق بواحد كان جارنا وقت ما كنا ساكنين في الشقة القديمة دي؛ والرجل اللي كان جارنا.. ده كان رجل متدين جداً لدرجة أن الناس كانوا بيقولوا له يا شيخ، الناس كلها كانت بتحبه وتحترمه إلا انا.. انا كنت بخاف منه اوي بسبب الكلام اللي كنت بسمعه عنه، وده ببساطة لأن الناس كانوا بيقولوا إنه معالج روحاني وإنه بيطرد الجن والعفاريت وإنه ياما عالج ناس بالقرآن، ده بالنسبة للناس كان عادي، لكن بالنسبة لي انا كان شيء مرعب وخصوصاً أن انا وقتها كان سني صغير، المهم قبل ما نعزل من الشقة القديمة بفترة كده عرفت أن الرجل ده بطل اللي كان بيعمله وعلاقته بالناس بقت محدودة جداً، وقتها انا مافهمتش أيه اللي غيره كدا ولا كنت عاوز افهم بصراحة.. بس مع مرور الوقت ولما انا كبرت وقريت روايات رعب وسمعت قصص حضرتك السؤال ده بقى شاغلني او... ليه الشيخ ده بطل كل حاجة فجأة كده بدون أي مقدمات ومن غير سبب ؟!
ما كنتش لاقي اجابة للسؤال ده لحج ما في مرة وانا ماشي بالقرب من الشارع اللي كان فيه شقتنا القديمة قابلت الرجل ده، أول ما شوفته جريت عليه وفكرته بنفسي وقولتله أن انا ابقى فلان ابن الحاج فلان وأن انا اخويا يبقى فلان وفضلت اقوله على أمارات عشان يفتكرني.. في الأول خد كام دقيقة كده وهو مش عارف مين الشخص اللي واقف بيتكلم قدامه لكن بعد شوية افتكرني وبدأ يتكلم معايا بُحب وبترحاب لحد ما فجأة لقيت نفسي تلقائياً كده بسأله ...
- عم الشيخ... هو حضرتك بطلت شغل ليه !
لما سألته السؤال ده بص لي في الأول باستغراب بس بعد كدخ ابتسم وقال لي ..
- وانت أيه اللي فكرك يا ابني بشغلي، انا مبطله دلوقتي بقالي سنين .. انت بتسأل ليه السؤال ده ؟
بصراحة ما كنتش عارف اقوله ايه في لقيت نفسي برد عليه بعفوية كده وبقوله ..
- أصل غريبة يعني انك تبقى بتعالج الناس وبتكسب من ورا اللي بتعمله ده فلوس كتير، وفجأة كده تبطل كل حاجة من غير سبب !
لما قولتله كلامي ده بص لي باستغراب وقال لي ..
- لو عايز تعرف حكايتي ف انا هحكيهالك من الأول، بس طبعا مش هينفع نتكلم واحنا واقفين في الشارع كده.. انا لسه مخلص صلاة العصر وماعنديش حاجة، تعالى نقعد عالقهوة نشرب لنا كوبايتين ينسون وانا هحكيلك بالتفصيل على حكايتي كلها من الأول للأخر .
بصراحة فرحت أوي وروحت قعدت معاه عالقهوة، بعد ما طلب لنا اتنين ينسون ابتدا يتكلم او يحكي بقى بالتفاصيل ويقول ..
- البداية يا ابني من التسعينات كنت زيي زي رجالة كتير راحوا اشتغلو
في العراق لأن الشغل فيها كان بيكسب اوي في الأيام دي، المهم سافرت
العراق واشتغلت هناك وبدأت حياتي تستقر شوية بشوية لحد ما قابلت
واحد غير لي كل حاجة في حياتي.. انا لما سافرت ويمكن حتى من قبل ما
اسافر بسنين كمان؛ كنت ملتزم وماكنتش بفوت اي فرض من
فروض ربنا الا لما اصليه في المسجد .. ولما سافرت العراق فضلت زي ما
انا محافظ التزامي وفضلت كمان محافظ على صلاة الجماعة في
المسجد وف مرة وبعد الصلاة خلصت لقيت رجل عجوز كده، دقنه
طويلة جه قعد جنبي وقال لي إنه شايف فيا حاجة مميزة، في الأول
مافهمتش كلامه وافتكرت انه بيقولي كدخ يعني عشان عاوز فلوس ولا
حاجة، بس لما قعدت اتكلمت معاه بالراحة كده وفهمت منه عرفت إنه
يقصد حاجة تانية خالص.. الرجل ده كان معالج روحاني وشاف فيا معالج
شاطر لأن إيماني قوي ومتعلق بالمساجد، في الأول سخرت من كلامه لكنه
لما اتكلم بجد وبدأ يقولي إنه هيعلمني ازاي اصرف الجن، وقتها انا
اتاخدت كده وفضلت برضه مش مصدقه لحد ما قالي لي إنه عاوز يقابلني
في مكان ما بالليل بعد ما اخلص شغل، يومها خلصت كلامي معاه وروحت
شغلي وبعد كده روحت السكن بتاعي وفضلت قاعد وانا متردد بين أني
اروح له وبين أن انا انسى اني قابلته من الأساس، بس وقتها الفضول
وحب الاستطلاع ساقوني وودني لحد المكان اللي قال لي عليه وكمان في
نفس التوقيت اللي هو حدده، المهم لما وصلت للمكان عرفت انه بيته
وعرفت انه بيعالج فيه الملبوسين أو الممسوسين من الجن، بصراحة انا
كنت بسمعه وانا مش مصدق ولا مقتنع باللي بيقوله لحد ما شوفت بعيني
حالة لواحدة ست كانت عنده وطلع جن من عليها قصاد عيني، الست دي
كانت بتتشنج وبتعمل حاجات غريبة وكمان كانت بتتكلم بصوت رجل
.. وقتها انا الدم نشف في عروقي وقولت أن انا قدامي حل من الاتنين.. ياما
اخد بعضي وامشي يأما اكمل واسمع كلامه للأخر، وخليني اقولك أن
فضولي وحبي للمجهول خلوني اسمع كلامه، قعدت معاه واتعلمت منه..
اتعلمت منه أيات الصرف واتعلمت منه كل حاجة تتعلق بالعلاج
الروحاني.. كان رجل كبير ويعرف كتير اوي، وتقريبا كل اللي كان يعرفه
عرفهولي لأنه ماكنش عنده أولادـ المهم انا بعد ما اتلعمت منه ابتديت
اساعده في علاج الحالات اللي بتجيله لحد ما بعد حوالي شهر ونص كده
اتوفى، بعد ما الشيخ ده اتوفى كملت حياتي في العراق بين شغلي
الأساسي وبين شغلي كمعالج روحاني لحد ما قدرت احوش مبلغ محترم
خلاني سيبت الحياة في العراق ورجعت استقريت في مصر، لما رجعت
مصر بقى بنيت البيت اللي انا عايش فيه انا وولادي دلوقتي ده، وابتديت
بقى اتعرف عالناس اللي كنت سيبتهم من سنين وهم كمان بدأوا يعرفوا
أن انا بقيت رجل مبروك وبعالج الملبوسين، وفي الأول الناس ماكانتش
بتصدق بس لما شافوا بعينيهم ولقوني ساعدت في شفا حالات صعبة..
حالات كتير شيوخ كتير ماقدروش يعالجوها والحمد لله ماحدش قدر
يعالجها غير العبد لله، وقتها الناس صدقوا ان انا واصل وبقدر اعالج فعلاً
ويمكن اقوى من اكبر الشيوخ اللي كانوا موجودين في بورسعيد في الفترة
دي، بعد كده بقى يا ابني اتخذت من العلاج الروحاني مهنة وبقيت اكسب
منه، يعني كل حالة كنت بعالجها كنت باخد قصادها مبلغ مالي محترم وده
لأن زي ما قولتلك، انا كنت بقدر اعالج الحالات اللي مكنش في حد غيري
بيقدر يعالجها، لكن مع مرور الأيام حياتي بدأت تتقلب لجحيم، الفلوس
معايا ابتدت تبقى كتير والدنيا بدأت تبقى احلى اه.. لكن الكوابيس اللي
كنت بشوفها كل ليلة ماكنتش بتخليني اعرف انام، كنت تقريبا كل ليلة
بشوف كابوس غير الكابوس اللي شوفته في الليلة اللي قبلها، ومع مرور
الوقت الموضوع اتطور من كوابيس لحاجات بقيت بشوفها في الحقيقة
وانا صاحي؛ يعني في مرة وانا داخل الحمام بتاع بيتي بليل شوفت واحد
منهم قاعدلي على قعدة الحمام، اول ما شوفته حاولت اقرأ قرآن لكني
لأول مرة في حياتي مقدرتش، كنت حاسس وقتها أن لسان اتعقد واني
مش قادر انطق، كان قاعد بيبصلي وبيضحك وانا مش قادر اتكلم ولا
انطق لحد ما فجأة لقيته قام من على الحمام وقالي ان انا لو مابطلتش
شغل هيقتلني، قال كلامه ده وبعد كده اتبخر من قدامي وكأنه ماكنش
موجود من الأساس.. ومش دي كان اخر حادثة تحصل لي يا ابني لأ، انا
بقى يتطور من قتلي انا لقتل ولادي لو فضلت مكمل في الشغلانة ده،
بصراحة يا ابني كنت بعاند معاهم وكنت بقول انهم مش هيقدروا يعملوا
لي حاجة لحد ما ابني الكبير تعب، الواد كان بيصحى بالليل يصرخ وكان
بيقول انه شايف تعابين حواليه في الأوضة، حاولت اعالجه أو اقرأ عليه اللي
اتعلمته لكن مفيش فايدة .. الواد حالته كانت بتسوء وتقريبا كل ليلة
كان بيصحى وهو بيصرخ لحد ما وقتها ادركت بقى أن خلاص كده، دي
علامة ربنا باعتهالي عشان ابطل شغل خالص وبالفعل بطلت
لما الشيخ قال لي كده رديت عليه وقولتله ..
- طب ولما بطلت.. ابن حضرتك ما بقاش يشوف حاجة ولا فضل تعبان زي
ما هو ؟ّ!
- لا يا ابني خف، من بعد ما بطلت شغل وابني الحمد لله مابقاش
يشوف حاجة ولا بقى يصحى على كوابيس زي كل ليلة .
لما الشيخ قال لي كده سرحت وقولتله ..
- طب وهو مش حرام ان حضرتك كنت تاخد فلوس من الناس اللي
بتعالجهم ؟!
وقتها رد عليا وقالي بحزم ..
- لا يا ابني مش حرام، فين الحرمانية في ان انا بقدملك خدمة وبعالجك
بما يرضي والله وفي مقابل كده باخد فلوس.. هو مش الدكتور برضوا لما
بتروح تكشف عنده بتدفع فلوس ؟!
لما قالي كدا رديت عليه وقولتله ..
- اه صح معاك حق .. بس حضرتك وانت بتحكيلي ماقولتليش اللي انت
بتشوفهم دول كانت اشكالهم عاملة ازاي !
ابتسم لي لما قولتله كده وقال لي
- لا ماقولتلكش ومش هقولك، علشان لو قولتلك انت هتتخيل اشكالهم
ومش هيسبوك في كوابيسك ولا حتى وانت صاحي .. مش كل الحاجات
اللي بنعرفها ممكن تكون عادية او مافيش منها أذية .
وقته انا بصيتله باستغراب كده وبعدين قولتله ..
- طب هو انا ينفع اقولك علمني زي ما الشيخ بتاع العراق علمك ؟ّ
لما قولتله كدا اتعصب وقام حاسب على الينسون وبعد كده رجع وقال لي
- انا حكيتلك اللي انت كنت عاوز تعرفه وبس لأن انا شوفت الفضول هينط
من جوه عينك، لكن غير كده مش هقولك، ونصيحة بقى من رجل قد ابوك
بلاش .. بلاش تتعلم وبلاش تقرأ عنهم ولا تتلكم عن سيرتهم دول
بيجوا على السيرة .. ابعد عن اي حاجة ممكن تأذيك، واديك شايف حالي
اهو لو كان الموضوع فيه خير وانا قدرت استحمله كان زماني مكمل
فيه كفاية عليك اللي عرفته لحد كده ومتسألش في اي حاجة تانية .
قال الشيخ كلامه ده ومشي ، وللعلم انا لما سألت الناس عن كلامه اتأكدت
انه صح وانه فعلاً عاش سنين في العراق زمان ، وعرفت كمان أنه فعلاً
بطل شغله فجأة كده والناس ماكنوش يعرفوا السبب،بس انا بقي كنت
عارف.. انا عرفت لما هو حكالي حكايته وجيت حكيتها لحضرتك ، وفي
النهاية اتمني انك ماذكرش اسمي ولا أسم الشيخ وماعنديش مشكلة
خالص أنك تقول بس أسم المحافظة الي احنا منها ، وفي النهاية كمان
حابب أقول لحضرتك أن انا ماعرفش اذا كان العلاج بالقرأن بمقابل مادي
حلال ولا حرام ، انا وقتها سمعت كلامه وقولتله انت صح عشان يكمل لي
حكايته لكن انا في الحقيقة ماعرفش إذا كان الموضوع حلال ولا حرام،
وياريت لو حد يعرف يقولي ولو حد برضه عنده سبب للي حصل للشيخ
ولابنه يقول وانا هتابع التعليقات لأني مش عارف ازاي هو كان بيعالج
وخاف من جن ظهرله وماعرفش حتي يعالج ابنه، هو ممكن يكون حكالي
جزء وماحكاش الباقي .. حقيقي مش عارف ، انا بس حكيتلك اللي عرفته.
(دي قصة حقيقة بعتها أحد المتابعين أو بالتحديد أحد مستمعين برنامج
المحكمة وانا بس أعادت صياغتها عشان تنفع تبقي قصة، وبالنسبة
لرائيي الشخصي في الحكاية ف انا ماليش رأي .. الرأي لحضارتكم انتم)
**تمت**
الروابط
صفحة الكاتب : محمد شعبان
لقراءة مزيد من القصص : من هنا
