 |
| مسلسلات رمضان 2021 |
مسلسلات رمضان 2021 : قائمة بأقوى المسلسلات الرمضانية .
اللي كلنا مستنينها ، انتم عارفين كل سنة بنستنى نشوف مين اللي هيكلف اكثر ومين أجره اكتر .
هنا بقى هنعرضلكم جميع مسلسلات رمضان 2021 ومختصر بسيط عن سيناريو كل مسلسل وايه قصته ، بالإضافة لتكلفة كل مسلسل من قائمة مسلسلات رمضان 2021 .
الاول هنتكلم عن بعض المسلسلات والأجور الموجودة فيها ، وفي النهاية هنحسب تكلفة المسلسلات كلها وكام كلفة المسلسلات دي .
تنوية : المسلسلات التي ستذكر هي مسلسلات مصرية 100% .
أسماء مسلسلات رمضان 2021 .
- لحم غزال
- الطاووس
- لعبة نيوتن
- ضل راجل
- القاهرة كابول
- هجمة مرتدة
- الملك
- النمر
- كوفيد 25
- موسى
- الاخيتار 2
- نسل الأغراب
هنبدأ بمسلسل لحم غزال | بطولة غادة عبد الرازق .
المسلسل دا بأكمله هيتمثل في بيروت بلبنان ، بطولة غادة عبد الرازق وعمر عبد الجليل ووفاء عامر .
قصة المسلسل باختصار شديد شبيه لفيلم المدبح لنادية الجندي .
تكلفة المسلسل : 48 مليون جنية .
مسلسل الطاووس | بطولة الفنان القدير جمال سليمان .
بيقدم فيه شخصية محامي بيحقق في قضية غامضة ، فالمسلسل دا عن نفسي اتوقع ان يكون الافضل من حيث الفكرة .
وعن نفسي برشحه من كل الاولويات يعني بو فكرت تتفرج على مسلسلات السنة دي هتتفرج على اول حاجة "مسلسل جمال سليمان الطاووس" .
التكلفة : 45 مليون جنية .
مسلسل لعبة نيوتن | بطولة النجمة المتألقة منى زكي .
قصة بنت اتجوزت واحد عن حب وبعد الجواز حصل فيه مشاكل كتير قررت انها تطلق وتعتمد على نفسها .
و تثبت للكل انها جديرة انها تبني نفسها بنفسها وانها جبل ما يهزك ريح ، اعتقد فكرة المسلسل قديمة واتعملت كذا مرة ومفهاش أي حاجة كريتيف .
ممكن بس المسلسل لما ينزل شغل منى زكي والاعداد والكلام دا كله يفرق كلامي ، بس لو قعدت مع الوقت دا وعلى قصة الطلاق وثبتت نفسها والكلام دا كله يبقى مسلسل ما لوش اي لازمة .
تكلفة المسلسل دا : 64 مليون جنية .
مسلسل ضل راجل | بطولة ياسر جلال ونرمين الفقي ونور .
بعد مسلسل الفتوة اللي عمله ياسر جلال السنة اللي فاتت رمضان 2020 ، عن نفسي المسلسل دا كان افضل مسلسل في رمضان واللي ما تفرجتش على مسلسل الفتوة السنة اللي فاتت ما تفرجش على اي حاجة خالص .
في السنة دي بقى يبقى عن نمبر 1 الحقيقي ياسر جلال بقصة قوية جدا عن محامي عايش في مكان شعبي بيحاول يرجع حق بنته اللي اتاخذ ، وفي بعض الناس معاه بتسانده وفي بعض الناس بتحاربه .
وانا ما اعرفش قصة المسلسل أوي ، بس اتوقع ان المسلسل دا هيكسر الدنيا و ياسر جلال فعلا ما بيعملش حاجة وحشة من اول ظل الرئيس لرحيم للفتوة لمسلسل السنة دي باذن الله .
تكلفتة : 57 مليون جنية .
مسلسل القاهرة كابول | بطولة النجمين الكبار اوي طارق لطفي وخالد الصاوي .
المسلسل بيحكي عن اخر 30 سنة مصر عاشتهم بيدور على الأربع صحاب اللي الزمن فرقهم ، وبعد كدا بيرجعوا ويتجمعوا بعد 30 سنة .
مش عارف ليه حاسس انا شفته قبل كدا في فيلم هندي اللي هو 3 idiots مش عارف انا مسمعتش المسلسل بس حاسس المسلسل دة شبه الفيلم شوية .
تكلفة المسلسل دا 67 مليون جنية .
مسلسل هجمة مرتدة | بطولة احمد عز وهند صبري .
المسلسل قصته جاية من ملفات المخابرات العامة المصرية ، وبيتكلم عن ثورة 25 يناير ومين اللي كان ورا الثورة دي ، وازاي المخابرات المصرية اتعاملت مع اللي بيحصل دا بحكمة .
المسلسل كان بتكلفة : 72 مليون جنية .
مسلسل الملك | بطولة عمرو يوسف وصبا مبارك . ( المسلسل دا تم ايقافه حاليًا ومش هيتعرض في رمضان 2021 ) .
عمرو يوسف بيمثل شخصية الملك أحمس اللي طرد الهكسوس من مصر ، وأظن كلنا نعرف مين الملك أحمس ودرسناه في المدارس زمان .
والمسلسل كان من المتوقع إنه يكسر الدنيا ، لكن للأسف تم إيقافه تقريبًا لوجود بعض الأخطاء في سيناريو المسلسل .
التكلفة : 75 مليون جنية .
مسلسل النمر | بطولة محمد امام وهنا الزاهد و نرمين الفقي .
محمد امام بيقوم بدور شاب صعيدي هرب من الصعيد عشان عليه طار ، وراح القاهرة اشتغل في الدهب وشاطر وبدأ يشتغل .
وبدأ يحصل منافسة مع تاجر شرير ، وتبتدي بقى احداث المسلسل والطيبة المعتادة .
القصة ممكن تكون اتعملت كذا مرة ، واتهرست في أفلام كتير ، لكن عشان محمد امام ممثل شاطر + إن تكلفة المسلسل كبيرة ، فممكن يطلعلنا حاجة كويسة .
سعر المسلسل : 76 مليون جنية .
مسلسل كوفيد 25 | للممثل المفضل عندي يوسف الشريف والممثلة ايتن عامر .
كالعادة يوسف الشريف دايمًا بيفاجئنا كل رمضان ، والسنادي في سباق مسلسلات رمضان 2021 مجهزلنا مسلسل بعنوان كوفيد 25 .
المسلسل بيتكلم عن فيروس كورونا وازاي بيتطور في السنين الأخيرة ، وازاي هما بيعالجوه .
المسلسل جزء كبير منه خيال علمي ، ودي الحاجة اللي بتميز يوسف الشريف عن غيره في تقديم المسلسلات ، حيث إنه يعتبر بيطور في الدراما المصرية بشكل كريتيف .
تكلفة المسلسل : 76 مليون جنية .
مسلسل موسى | بطولة محمد رمضان وسمية الخشاب .
احداث المسلسل بتم في فترة الخمسينات والستينات في الفترة اللي كان فيها الاحتلال الانجليزي في مصر .
رحلة لشخص أبوه بيموت وهو اللي بيصرف على نفسه وعلى اخواته ، وبعد كدا بيسافر القاهرة وبيشتغل وبينجح في مجاله .
بيصدر حاجات لغزة وبيستورد حاجات من غزة ، وأظن الفكرة برضوا اتعملت من خلال محمد رمضان كذا مرة ، بحيث إنه بيبدأ من الصفر .
وبيبتدي يكبر والكل بيتمنى يتكلم معاه ، فأظن المسلسل دا هيكون وريث لبقيت مسلسلات محمد رمضان في 2021 ، ومحمد رمضان ممثل شاطر جدًا بس مبيجددش في أفكاره مش أكتر .
تكلفة المسلسل دا : 87 مليون جنية .
مسلسل الاختيار 2 | بطولة كريم عبد العزيز وأحمد مكي .
أظن المسلسل نازل فيه أكتر اتنين ليهم جمهور محترم ومحدش بيكرههم وأنا عن نفسي بحب أعمالهم جدًا جدًا جدًا .
في المسلسل دا بيتكلم على انجازات الشرطة آخر 10 سنين من 2011 ل 2021 .
المسلسل تكلفته : 92 مليون جنية .
آخر مسلسل معانا النهاردة مسلسل نسل الاغراب | بطولة أحمد السقا وأمير كرارة .
اول مره الاثنين يجتمعوا مع بعض في مسلسل واحد والاتنين بتوع اكشن مسلسل دكستر والمسلسل دا متوقع إنه هيكسر الدنيا السنة دي .
وتقريبا المسلسل دا اكتر تكلفة في المسلسلات .
قصة المسلسل إن في واحد فيهم هيتسجن معرفش مين هو بالظبط ، بعد كدا هيخرج من السجن هيلاقي صاحبه اتجوز مراته وكتب ابنه باسمه ، وهيحصل بقى المشاكل والحوارات دي كلها .
تكلفة المسلسل : 94 مليون جنية .
كدا لو حسبنا المسلسلات كلها + المسلسلات اللي متمش ذكرها في المقالة هيكون الإجمالي 853 مليون جنية .
دا غير طبعًا تكلفة البرامج زي "رامز مريض نفسي" اللي ممكن تكلفته تكون بنص تكلفة المسلسلات دي كلها .
