تجربة مرت بها إحدى السيدات هي وزوجها بعد انتقالهم لشقة تقع في منطقة الزيتون، ولك أن تصدق أو لا تصدق . (شــقـــة الــزيــتــون)
بقلم : محمد شعبان كاتب خبير
أنا (أ)
عندي 27 سنة
ست متجوزة من 5 سنين
حكايتي بتبدأ من 3 سنين تقريبًا، يعني تحديدًا كدا من وقت ما سيبت الشقة اللي أنا اتجوزت فيها ونقلت لشقة تانية، خليني أوضح لحضرتك بالتفصيل كدا حكايتي أو مآساتي بدأت ازاي بالظبط ....
لما اتجوزت من خمس سنين عيشت أنا وجوزي في شقة إيجار جديد لمدة سنتين، بعد السنتين حالة جوزي المادية بدأت تتدهور شوية وإيجار الشقة مع مصاريف البيت بقوا عبء تقيل جدًأ عليه، وقتها قرر جوزي إننا نتنقل من شقتنا اللي هي إيجار جديد زي ما ذكرت لشقة بتاعة أهله في حي الزيتون، الشقة دي المفروض إنها كانت بتاعة اخوه الكبير اللي بالمناسبة يعني عايش برا مصر بقاله سنين لدرجة إنه استقر في البلد اللي هو عايش فيهاـ المهم إن الشقة دي كانت مقفولة لسنين لحد ما أهل جوزي اقترحوا عليه إنه يسكن في الشقة بدل ما هي مقفولة كدا وكمان أخوه كان مرحب جدًا بالموضوع ومش ممانع على عكس توقعناـ فكر جوزي في إننا ننقل و اقتنع بكلام أهله اللي هو بصراحة وأحقاقًا للحق يعني كان كلامُ مقنع، كل اللي انا حكيته دا بقى حصل وأنا ماكنتش أعرف إلا في اليوم اللي جوزي جه قالي فيه إننا هنروح نوضب شقة الزيتون وننقل فيها !
بصراحة في الأول رحبت لكني لما روحت الشقة ودخلتها أول مرة كنت حاسة بأحساس غريبـ، كنت حاسة إن أنا مش مرتاحة وقلبي اتقبض كدا... ساعتها قولت لنفسي إن الأحساسيس دي ممكن تكون جت لي بسبب إن الشقة مقفولة بقالها فترة ومتربةـ بس قولت لنفسي إن أكيد يعني ننضفها وننقل فيها عفشنا الوضع هيتغير، كنت بحاول أقنع نفسي إن أنا بيتهيألي أو مثلًأ دا مجرد إحساس وهيروح لحاله بمجرد ما نعيش في الشقة؛ بس اللي حصل بعد كدا كان غير اللي كنت بحاول أقنع نفسي بيه تمامًا .....
أول ما قعدنا في الشقة أنا وجوزي وبعد ما وضبناها ونقلنا عفشنا ليها بشهر بدأت الحاجات غريبة تحصلي، في يوم كنت قاعدة في البيت لوحدي وجوزي كان في الشغل، بعد صلاة العصر كدا وبعد ما خلصت الحاجات اللي كنت بعملها في البيت دخلت أوضة النوم عشان أرتاح لإني كنت محتاجة أنام شوية، بس أول ما دخلت وحطيت راسي ع المخدة روحت في النوم فجأة صحيت على أصوات ناس بتهمس حواليا، فوقت من نومي بالعافية لإني كنت حاسة إن راسي تقيلة أوي، قومت من النوم وأنا مش مركزة لإني مش مركزة لإني ماكنتش لحقت أنام كويس، بصيت حواليا مالقتش حد وكنت بقول بتلقائية ...
- مين .... مين بيتكلم ؟!
أول ما قولت كدا لاقيت جوزي واقف قصاد باب الأوضة، بصيتله باستغراب وقولتله ...
- انت جيت امتى وازاي ظهرت فجأة كدا ؟!
أول ما قولت له كدا بص لي بلا مبالاة وخرج ناحية الصالة، قومت من عالسرير وخرجت وراه بس أول ما خرجت وراه بس أول ما خرجت غصب عني صرخت لإني لاقيت جوزي قاعد على الأرض وحواليه تعابين سودا كتير أوي، كان قاعد بيلعب مع التعابين دي وعمال يبص لهم ويبتسم وهو منهمك أوي لدرجة إنه مابصليش أصلًا حتى بعد ما صوتت (وكأني مثلًا مش موجودة أو هو مش شايفني)
فوقت من الصدمة اللي اتصدمتها وقولتله بخوف وأنا واقفة بترعش في مكاني من الخضة ....
- أن أن انت بتعمل ايه، وايه التعابين اللي حواليك دي ؟!
لما قولتله كدا بص ناحيتي وهو مبرق بعيونه اللي كانت سودا تمامًا
رجعت لورا بسبب شكله وكمان بسبب المنظر كله، لما رجعت كام خطوة لورا كدا لاقيت جوزي قام من عالأرض وهو ماسك شوية من التعابين اللي حواليه دول بإيده، وفجأة وبدون أي مقدمات لاقيته بقى في وشي وبيمد ايده ناحيتي بالتعابين اللي ماسكها، حاولت ادخل الأوضة أو اتحرك أو حتى أجري لكني ماقدرتش، أنا حسيت كأن رجلي لزقت في الأرض ومابقتش قادرة أتحرك، وقفت ببصله وأنا بعيط ومش قادرة أتكلم لحد ما هو مد ايديه اللي فيهم التعابين وحط التعابين دي على جسمي وهو بيقول بصوت جهوري غير صوت جوزي المعتاد ....
(دول أهل البيت .... دول أهل البيت)
أول ما التعابين لمست جسمي فضلت أصرخ بجنون وأنا حاطه ايدي على وشي لحد ما فجأة سمعت صوت باب الشقة بيتفتح وبيدخل منه جوزي اللي أول ما دخل كل حاجة كنت شايفاها اختفت !
جري ناحيتي جوزي وحضني وهو بيقول لي بخوف ....
- مالك يا حبيبتي ..... بتصرخي وبتعيطي كدا ليه ؟!
زقيته وقولته وأنا مفزوعة ....
- التعابين .... انت كنت ماسك تعابين وقربتهم مني .
فضلت أخرف بأي كلام من الصدمة اللي جت لي بسبب اللي شوفته لحد ما بعد شوية جوزي هداني، لما هديت وحكيتله اللي حصل قال لي إن انا ممكن أكون بتخيل أو بيتهيألي مثلًا لكن أنا كنت متأكدة إني مكنتش بتخيل ولا كنت بحلم، يومها حصلت بينا مشكلة كبيرة لإني بقيت مصممة إن احنا نمشي من الشقة ف خدت جزء من هدومي وروحت لوالدتي أو زي ما بيقولوا كدا (غضبت من جوزي وروحت عند أهلي)
لما روحت بيت أهلي والدي ووالدتي حاولوا يهدوني لكني كنت مصممة إننا نعيش في شقة غير شقة الزيتون دي يأما نتطلق، عدت فترة وجوزي بيحاول يرجعني بحد ما بعد اسبوعين اقنعتني أمي إن انا أرجع لشقتي وقالتلي إنها هتبقى معايا طول النهار وهنفضل مشغلين في الشقة قرآن باستمرار، بصراحة كلام أمي ووجودها جنبي باستمرار خلاني اتطمن واوافق إن انا ارجع الشقة من تاني بعد ما اتصالحت أنا وجوزي ....
بعد ما رجعت الشقة تاني، والدتي كانت بتقعد معايا في الوقت اللي جوزي مابيكونش موجود فيه وكنا بنفضل مشغلين قرآن ماكنش بيحصل حاجة لمدة أيام، وقتها والدتي طمنتني وقالتي إن لازم أتعود إ، انا اقعد لوحدي عشان في الوقت دا والدي كان تعب شوية وكان لازم والدتي جنبه، المهم بعد أيام والدتي مابقتش تقعد معايا ورجعت تاني اقعد لوحدي الصبح وجوزي طبعًأ في الشغل بس كنت دايمًا متعودة اشغل قرآن والدنيا فضلت تمام لفترة كدا لحد ما حصل لي موقف تاني أسوء من الموقف اللي شوفته في الأول، بس الموقف التاني دا بقى كان هيبقى سبب في موتي حرفيًا ....
في يوم وأنا قاعدة وجوزي في الشغل تحديدًا يعني بعد العصر كدا برضوا، كنت قاعدة في أوضة النوم ومشغلة القرآن في الصالة ومعلياه عشان يبقى الصوت وأصل للأوضة، وفي الأوضة اللي كنت قاعدة فيها كنت قاعدة مشغلة التلفزيون وموطياه و ماكنتش مركزة معاه ما فجأة صوت القرآن سكت !
خرجت عشان أشوف صوت القرآن سكت ليه وقولت إن ممكن يكون الصب اللي أنا مشغله عليه القرآن حصل فيه مشكلة ولا حاجة، قومت من على السرير وخرجت ناحية الصالة بس المرة دي بقى أول ما خرجت من باب الأوضة لمحت قصادي شخص طويل أو ماتقدرش تقول عليه شخص بالمعنى الحرفي، هو كان مخلوق طويل ومش باين منه أي حاجة غير سواد وكأنه دخان أو كائن هلامي، كان طويل جدًا لدرجة إن طوله كان واصل للسقف !
أول ما شوفته وقفت مبلمة لثواني بعد كدا صوت، أول ما صوتت حسيت ان في حاجة أو حد بيخنقني عشان أسكت في سكتت فعلًا، لكن الحاجة أو الايد اللي مش موجودة اللي كانت بتخنقني دي فضلت تخنق فيا أكتر وأكتر لحد ما بدأت أغيب عن الوعي ولو هتسألني ليه بدأت أغيب عن الوعي في ببساطة هقول لحضرتك ان انا أصلا عندي مشكلة في التنفس وباخد علاجات على فترات متباعدة وعشان كدا لما حسيت إني بتخنق بدأت أفقد الوعي ....
لما فوقت لاقيت نفسي في المستشفى ومتركبلي أكسجين، طبعا جوزي وأهلي كانوا معايا ، واللي عرفته بعد كدا إن جوزي لما رجع من الشغل لقاني واقعة في صالة الشقة ومغمى عليا وكنت باخد نفسي بالعافية، الدكاترة قالوا إن دي كرشة نفس وفضلت ماشية على علاجات بعد كدا باستمرار، ولما حكيت لأمي ولجوزي على اللي شوفته أمي قررت وقتها إنها تيجي تقعد معايا على طول وتنام في أوضة من أوض الشقة، بس والدتي لما قعدت معايا وبقت تبات في الشقة هي كمان مابقتش تعرف تنام وبقت تحلم بكوابيس، وحتى لما كنا بنشغل قرآن في البيت كان بينطفي لوحده بليل وبيشتغل تاني بعد أذان الفجر، استمر الوضع على ما هو عليه لحد ما ف يوم أنا وأمي نزلنا من البيت، أمي راحت تشوف متطلبات ابويا وأنا المفروض كنت رايحة عند حماتي عشان ازورهاـ يومها أمي قبل ما تخرج من البيت رشت ملح في أركان البيت وقالت لي إن الملح بيبعد الشر والجن في المكان، المهم نزلنا أ،ا وأمي اللي قالت انها هتقعد مع والدي كام يوم وبعد كدا هتبقى ترجع تقعد معايا تاني، روحت زورت حماتي ولما رجعت الشقة ماكنش في أي حاجة غريبة طول اليوم لحد بليل، بعد ما جوزي رجع واتعشينا سوا دخلنا ننام أ،ا وهو، لما دخلنا أوضتنا كان جوزي نايم عادي جدًأ لكن أنا بقى ماكنتش عارفة أنام لإني كنت حاسة بألم رهيب في رجليا الاتنين لدرجة إني ماكنتش عارفة احركهم ولا حتى عارفة اقوم من على السرير، صحيت جوزي من النوم وهو فضل قاعد جنبي لحد الصبح ولما النهار طلع راح جوزي لواحد صاحبه متدين وبيقهم في مواضيع الجن والعفاريت دي، صاحب جوزي دا قال إن الملح اللي أمي رشته في البيت هو السبب في اللي انا فيه لإن الملح بالنسبة للمكان اللي ساكنه الجن زي النار بالنسبة للبني آدم بالظبط، المهم رجع جوزي من عند صاحبه وأنا كنت زي ما انا قاعدة عالسرير ولما حكى لي على اللي صاحبه قاله قولتله على الأماكن اللي امي كانت راشة فيها الملح، الغريب بقى في الموضوع إن جوزي لما نضف البيت من الملح انا بعدها حسيت إني قادرة أحرك رجلي كويس لان الوجع اللي كنت حاسة بيه بدأ يروح شوية ب شوية، بس بالرغم من أن الوجع راح إلا إن الحاجات الغريبة مانتهتش لحد كدا لإننا ماسيبناش البيت ولو هتسألني ليه ماسيبتوش البيت ف أ،ا هقول لحضرتك إن ظروفنا المادية مش كدا في كنا مضطرين نقعد في الشقة دي لإننا ببساطة مالناس مكان تاني نروح نقعد فيه ....
المهم... عدت أيام وأنا وجوزي عايشين في الشقة ما بين كوابيس وأصوات وحاجات بتتكسر بليل وخيالات بتظهر ومش بس كدا... الموضوع بقى اتطور وجوزي برضوا بقى بيشوف هو كمان كوابيس وأنا كنت كتير بصحى من النوم مفزوعه وبصرخ بسبب الكوابيس اللي كنت بشوفهاـ وقتها جوزي قرر إن احنا لازم نروح عند شيخ ونحكيله اللي بيحصل عشان يشوفلنا حل، وبالفعل سأل جوزي عن حد بيفهم في المواضيع دي لحد ما واحد صاحبه قال له على شيخ تقي خدني جوزي وروحنا له، لما روحت للشيخ وحكيتله على اللي بشوفه قال لي إن الشقة اتسكنت لإنها فضلت فترة كبيرة مقفولة، وطبعًا قال لي انه هيقرأ عليا الرقية الشرعية وبعض آيات القرآن، بدأ الشيخ يقرأ وأول ما ابتدى بس في القراية بدأت أحس إن جسمي بيألمني وحسيت ببرد أول مرة أحس بيه في حياتي لدرجة اني من كتر الألم والبرد فضلت أصرخ في الشيخ عشان يسكت لكنه كمل قرايه وفضل يقرأ وأ،ا الألم بيشتد عليا، لحد ما بعد شوية ومع صرخاتي المتكررة سكت الشيخ وقالي انه هيديني زيت زيتون أرشه في البيت ولازم أفضل مشغلة قرآن طل الليل وهو هيبقى يتابع معايا ويقرأ عليا قرآن كل فترة، روحت البيت أنا وجوزي وعملنا اللي الشيخ قال عليه وشهادة لله يعني الأمور هديت شوية لكن بعد فترة رجعنا تاني نشوف كوابيس وخيالات وناس بتتحرك في البيت، وحتى أصوات الخبط والتكسير اللي كنا بنسمعها بليل في أنحاء الشقة قبل ما نروح للشيخ رجعت تتكرر هي كمان، وطبعًا وقتها جوزي كان بدأ يتعايش مع الوضع وحتى أنا كمان بدأت اتعايش لإن الأذى مابقاش زي الأول، بس بالرغم من إن الأذى اللي كنت بشوفه مابقاش زي الأول إلا إني فضلت أشوف حاجات غريبة ومالهاش تفسير واقربهم كان في شهر يناير اللي فات لما جوزي الصبح كان في الشغل وأنا عملت لنفسي كوباية نسكافيه وكنت خارجة للصالة عشان أقعد فيها، لكني وأنا خارجة فجأة اتسمرت في مكاني لما شوفت شخص شبه جوزي واتفزعت لدرجة إن أنا رميت كوباية النسكافيه غصب عني من إيدي، ف لما كوباية النسكافية وقعت بصيت عليها بحركة لا إرادية كدا ولما جيت أبص تاني على المكتب مالقتش حد !
وخد بقى من دا كتير لحد النهاردة، أوقات جوزي بيحلم بكوابيس ويتخيل ناس بتمشي في البيت، وأنا كمان برضوا كنت بحلم بناس غريبة بيتمشوا في الشقة وساعات بشوف الشخص اللي شبه جوزي دا للحظات كدا وبعدين يختفي، وأهو أدينا عايشين وبنشغل قرآن في الشقة وبنحاول نصبر لحد ما ظروفنا المادية تتعدل ونقدر ناخد شقة تانية، وقبل بس ما تسألني ليه ماجبتوش شيخ يقرأ في الشقة اسمحلي اقولك اننا في مرة عملنا كدا من قريب وماحصلش أي حاجة ولا في حاجة اتغيرت، الراجل جه قرأ قرآن وبعد كدا مشي وبرضوا فضل الوضع زي ما هو.... وفي الأخر رسالتي لكل اللي هيقرأ أو هيسمع حكايتي دي، ادعيلي اخرج من الشقة دي انا وجوزي سالمين وادعوا لي ربنا يكرمني ويكرم جوزي وظروفنا المادية تتعدل عشان نقدر ناخد شقة تانية غير شقة الزيتون المسكونة دي ....
"دي قصة حقيقية حكتها احدى المتابعات، هل انتوا مصدقينها ولا لأ، وسواء بقى مصدقينها أو لأ أتمنى تدعوا لها"
تمت
