قصة أصحاب السعير
بقلم : عمرو نجيب
ابني جاله نزيف داخل معدته بدون سبب,تسبب ف موته..!
الامر ابتدي بدور برد,دور برد بسيط ولا راح ولا جه, بس خوف الستات الهيستيري
ده,مراتي قررت اننا نروح نكشف عليه , وعشان هو اقل من خمس سنين فمكنش
ينفع نديله اي دوا والسلام..
رحنا لدكتور أطفال, وقال لنا انه دور برد وكتب لنا ع علاج,وطمن مراتي انه
هيبقي كويس ..
بصراحة انا عاذر مراتي , ده اول طفل لينا بعد 6سنين جواز, ولف ع الدكاترة و
عمليات الحقن المجهري والأدوية وخلافه,فمن حقها انها تخاف عليه بالشكل ده و
اكتر كمان ..
لما طلعنا من عند الدكتور خلتها هي ترجع ع البيت عقبال انا ما اعدي ع اي صيدلية
اجيب الدوا..
اديت الروشته للدكتور الي واقف,فجاب لي المكتوب ما عدا واحد , وقال لي انه
ناقص ف السوق,لكن ف بديل له بنفس المادة الفعًّالة, وافضل جودة , نازل جديد
وافقت, طالما هو هو نفس الفاعلية..شكرته ومشيت..
رجعت البيت,وعطيت لمراتي الدوا وقلت لها خليه ياخد حباية من الدوا المضاد ده
دلواقتي , وينام ,وان شاء الله هيصحي احسن.. وبالفعل اخد الدوا ,ونام , وبدورنا
نمنا احنا كمان..
لكننا صحينا ع صوت صريخ جاي من اوضة ابني,قومنا بسرعة,ورحنا اوضته,
ابني كان ماسك بطنه وعمال يصرخ ويعيط!!
معرفتش اعمل له ايه,مراتي جابت كوباية مية عشان تشربها له , فكرته انه حلم
بكابوس,لكنه كان ماسك بطنه وباين ع وشه الألم..
شيلته وخرجت بيه من الشقة كان ف مستشفي ع بُعد شارعين مننا
وصلت هناك وكان لسه عمال يعيط ويئن من الوجع.. دخلنا للطواريء , وعملوا له
اشعة ع بطنه,ولقيت الدكتور بيقول انه شكله أكَل حاجة من ع الارض, حاجة حادة..
ممكن تكون دبوس..!
-طب والعمل يادكتور؟
-هنعمل له غسيل معدة بسرعة.
وهنا لقيت ابني صرخ بقوة وهو ماسك بطنه , وفجاة لقيته بدأ يرجَّع.. ف الاول كان
بيرجع عصارة الأكل والسوايل , لكن بعدها بثواني لقيناه بيرجع دم..!!
..
الدكتور نادي ع الممرضين بصوت عالي,فجم بسرعة وشالوه,طلعوا بيه ع اوضة
مش فاكر كان ع يافطتها ايه..
مراتي كانت عمالة تعيط وتنوح بهيستيريا, وانا عمال امشي و اروح وآجي مستني
الدكتور يطلع يطمني..
وبعد دقايق,دقايق عدت عليا زي سنين طويلة, لقيت الدكتور طالع من جوا وع
وشه أسي وحزن مصُطنع..بلعت ريقي, ووقفت مكاني مستنيه يقول الجملة اللي
كنت متأكد انه هيقولها..
: كان نفسي ف الوقت ده الأرض تنشق وتبلعني وتقفل عليا واموت قبل ما اسمع
الخبر ده
-آسف, ابن حضرتك النزيف كان شديد عليه , وملحقناش نعمل حاجة.
بصيت لمراتي اللي كانت في حالة من الصدمة,وشها بقي لونه شاحب , دموعها بتنزل
منها لا إرادياً , واقفه مكانها مش بتتحرك وباصة للدكتور
رجعت بصيت للدكتور ونزلت دماغي ف الأرض..
بدون خوض ف اللي حصل بعدها من صريخ ولطم ونواح وخلافه.. عملنا العزا,
عزا ابني اللي جه بعد عذاب 6 سنين , ابني اللي مش عارف هل هيتكرر تاني ولا
العقم هينتصر..!
مراتي فضلت قاعدة لوحدها فترة اسبوع بحالة,ولا بتاكل ولا بتشرب إلا حاجات
خفيفة جداً..
وانا مبقتش قادر اقعد ف البيت ,بقيت بنزل اقعد ع القهوة واتفرج ع وشوش الناس
والأطفال اللي بتلعب ف الشارع..
وف آخر اليوم رجعت البيت , قررت اتخلص من كل الحاجات اللي كانت تخصه, احنا
لازم نطلع من الحالة الكئيبة اللي احنا فيها دي, مش هنفضل باقية عمرنا حابسين
نفسنا وبنعيط عليه
جمعت هدومه, والعابه , وكراسات مدرسته , حتي علب الدوا بتاعت البرد اللي كانت
آخر حاجة جبتها له..
وبصيت ع العلبة اللي كانت آخر علبة أخد منها,كانت الصنف الجديد اللي قال لي
عليه الدكتور..
جالي فضول افتح العلبة, وطلعت الحباية , قلبتها شوية ما بين صوابع,وبحسرة
ممزوجة بالغضب كسرتها.. كنت ف حالة غضب وزعل ع ابني عمري ف يوم ما
وصلت لها.. لكن..
لَفَت انتباهي حاجة ف البرشامة, حاجة بتلمع تحت لمبة الغرفة, بصيت فيها بتركيزو
انا بمسكها بين صوابع.. وهنا كانت الصدمة..
فتحت باقية العلبة وطلعت البرشام اللي فيها كله وبدأت أكسره, وبالفعل لقيت نفس
الشيء ف كل حباية..
أخدتهم معايا ونزلت بسرعة.. رحت للصيدلية اللي أخدت منها الدوا ده, وهناك
لقيتها قافلة, وع الباب , كان موجود شمع أحمر..!
لقيت واحد ماشي , فسألته صاحب الصيدلية دي فين , فقال لي:
-الله ينتقم منه مطرح ما راح, ده كان بيبيع برشام جواه حديد عامل زي الإبرَ و
بيموت الناس بيه, والحكومة جت أخدته وشمَعِت المخروبة بتاعته بالشمع الأحمر.
*تمت*
الروابط
آخر قصة : انتقام هند
صفحة الكاتب : عمرو نجيب
