قصة انتقام هند
بقلم : محمد شعبان
"هند"
لما جدتي قالتلي الكلام ده، رديت عليها وقولتلها ..
- والله معاكي حق يا ست الكل في كل كلمة قولتيها، المهم بقى إن الحكاية اللي فاتت دي بالرغم من انها جميلة وكلها عبر ، الا انها حزينة ومأسوية أوي.. ما تحكيلي حكاية تانية بقى تكون سعيدة كده ومفيهاش ميتين ولا عيال بيرموا اهاليهم ولا كل النكد دا .
لما قولتلها كده ضحكت وقالتلي ..
- طيب يا سيدي .. انا هفرفشك وهحكيلك حكاية هند الرقاصة .
أول ما قالتلي ضحكت وانا بقولها ..
- اه .. طالمها فيها رقاصة يبقى احكي .. احكي وانا هركز معاكي في كل تفاصيل الحكاية .
- ضحكت انا وهي شوية وهزرنا مع بعض لحد ما ابتدت ملامحها تاخد شكل الجد وتحكيلي حكاية هند الرقاصة لما قالت ..
الحكاية اللي هحكيهالك دي على لسان واحدة قريبتنا ساكنة في منطقة غير منطقتنا، قريبتنا دي حكيتلي الحكاية وانا هحكيهالك زي ما هي حكيتها بالظبط ..
من حوالي 40 سنة كدا يا ابني، كان في راجل موظف هي هيئة البريد ساكن في نفس المنطقة اللي قريبتنا دي منها، المهم إن الراجل ده كان متجوز وعايش مع مراته وعياله في بيتهم وحياتهم كانت ماشية زي الفل، لكن حياة الراجل دا كان فيها حاجة غريبة ومش مفهومة.. الراجل كان متعود يسافر ما بين كل فترة والتانية ويغيب بالأيام، ولما مراته كانت بتسأله انت بتغيب فين كل الأيام دي، كان بيقولها انه بيخلص شوية مصالح تبع الشغل في محافظة تانية، ومع مرور الوقت مراته ابتدت تشك فيه لحد ما شكها زاد اوي وحبت تتأكد من انه فعلاً بيسافر يقضي مصالح تبع الشغل ولا لأ، وعشان تتأكد الست من إن جوزها ما بيكدبش عليها، راحت في يوم للمصلحة عشان تسأل على جوزها .. وفعلاً الناس أكدوا إ، جوزها بيسافر يخلص ورق متعلق بالشغل في فرع المصلحة الي في اسكندرية، بعد مالست سمعت كلام الناس في المصلحة واطمنت، خدت بعضها وروحت وماقلتش لجوزها اي حاجة، وحياتهم استمرت من غير اي مشاكل لحد ما في يوم الراجل ده تعب وجاتله غيبوبة السكر وهو في البيت، وعقبال ما اتحركوا بيه من البيت للمستشفى كان الراجل طلع في الروح.. مات الراجل الطيب ومراته فضلت حزينة عليه لمدة 3 أيام.. بس في اليوم الرابع اتفاجأت الست بواحدة جت لها البيت ومعاها عيل صغير، الواحدة اللي جت لها دي من اسكندرية وكان اسمها هند.. هند دي لما قعدت اتكلمت مع الست مرات الراجل، قالتلها انها هي كمان كانت مراته على سُنة الله ورسوله، وقالتلها ان الواد اللي معاها ده يبقى ابنه، طبعا الست اول ما سمعت منها اللي سمعته ده.. كدبتها وقالتلها ان كل كلامها ده مش حقيقي، لكن لما ورتلها قسيمة الجواز وورتلها شهادة ميلاد الولد.. الست فضلت في حالة ذهول وفضلت مش مصدقة هند، واتعصبت عليها وشتمتها وحصلت بينهم مشكلة كبيرة انتها بأنها طردتها من البيت وقالتلها انها بتتبلى عليهم، بس عند دي كانت مش سهلة لانها كانت بتشتغل رقاصة والراجل دي اتجوزها من ورا مراته وخلاها تتوب لما قعدها في البيت وكسب فيها ثواب.. ولأن هند كانت مش سهلة زي ما قولتلك فهي قالت لمرات الراجل وهي نازلة مطرودة من عندها من البيت ..
(وديني وما اعبد لأطفشك من البيت اللي طردتيني منه ده، وكل مليم من حق الواد اليتيم ده، انا هاخد قصاده أضعاف أضعاف)
قالت هند كلامها ده للست، لكنها برضوا شتمتها وماهمهاش التهديد ولا كل الكلام اللي اتقال، ومشيت هند وخدت ابنها معاها والست فضلت قاعدة هي وولادها في البيت لحد ما الحاجات الغريبة ابتدت تحصل، الست بدأت لها حاجاات غريبة وبدأت تضرب عيالها في عز الليل ضرب مش طبيعي لدرجة انهم زهقوا منها وراحوا عاشوا عند عمتهم.. عمتهم اللي بالمناسبة يعني ماكانتش تعرف موضوع هند الا لما الراجل اللي مات زيها زي مراته بالظبط، بس لما هند راحتلها هي كمان وحكت لها، صدقتها وقالت ان الراجل كان من حقه انه يتجوزها لانه ماعملش حاجة غلط.. ده اتجوز على سُنة الله ورسولة، المهم العيال بعد ما راحوا قعدوا عند عمتهم، الست مرات الراجل حالتها بدأت تسوء، بقت بتتخانق مع الجيران وتشتمهم من غير اي سبب، واوقات كتير كانت بتقف في بلكونة بيتها وتفضل تشتم اللي رايح واللي جاي من غير أي مبرر، ومع مرور الوقت.. الناس طلبولها البوليس لأنها مرة في مسكت عيل من ولاد الجيران وفضلت تضرب فيه وهي بتقول انه كان عاوز يموتها !
الحكومة لما جت خدت الست دي نقلوها لمستشفى المجانين اللي أول ما دخلتها رجعت هند وخدت اليت بتاع الراجل هي وابنها، وطبعاً ده كان بسبب انها اثبتت انها فعلاً كانت مراته وإن الواد اللي معاها ده يبقى ابنه، وفعلاً نفذت كلامها وخدت البيت اللي بعد ما عاشت فيه هي وابنها حوالي سنتين والعيال ولاد الست فضلوا عايشين مع عمتهم، ماتت هند.. جالها المرض الخبيث في معدتها وماتت، والبيت خدت الست اخت الراجل وعاشت تربي فيه الواد ابن هند والعيال ولاد الست وعيالها هم كمان، واللي انا نسيت اقولهولك بقى، إن قبل ما هند تموت بحوالي سنة كدا، الست مرات الراجل ماتت هي كمان في مستشفى المجانينـ ولو هتسألني عن السبب اللي خلى الست تتجنن، ف أنا هقولك ان وارد تكون هند دي عملتلها عمل وخلتها وصلت للحالة اللي وصلتلها دي، ووارد كمان انها تكون اتجننت بعد الصدمة اللي خدتها في جوزهاـ كل دي ممكن تكون احتمالات واردة وممكن جداً انها تكون حصلت.. لكم اللي ممكن نغفل عنه، ان هند ماقعدتش كتير في اليت وجالها مرض خبيث ماتت بسببهـ وكأن ربنا أراد انه ينتقم للست اللي اتجننت، بالمرض اللي صاب هند ده .. اه يا ابني، ما هو ربك زي ما اسمه الرحمن الرحيم، اسمه برضه العدل.. ومستحيل ربنا شايف ومطلع على حد ظلم حد ومايجبلوش حقه.. ربك يا ابني بيمهل الظالم ما بيهملوش، والظاهر كده ان هند دي ظلمت الست مرات الراجل، وعشان كده ربنا رد الظلم ده بالمرض اللي جالها .
لما جدتي خلصت الحكاية، بصيتلها باستغراب وقولتلها وانا بضرب كف بكف ..
- لا حول ولا قوة الا بالله.. انتِ قولتيلي هحكيلك على قصة رقاصة بقى وقولت هنفرفش ونسمع قصة حلوة، في الأخر برضه طلعت قصة كئيبة وكل ابطالها ماتوا، انتي ماعندكيش حكايات اصحابها عايشين ابداً يا ستي ؟
لما قولتلها كدا ضحكت وقالتلي ..
- لا عندي يا موكوس.. عندي، والحكاية اللي هحكيهالك دي كل ابطالها واللي عاشوها وحتى اللي شافوها عايشين لحد النهاردة .
مسكت الورقة والقلم وبصيت لجدتي وقولتلها ..
احكي يا ست الكل.. احكي أما نشوف أخرتها ..
ابتدت جدتي تحكي وتقول ..
(يتبع)
الروابط
آخر قصة : عفريت هنداوي
صفحة الكاتب : محمد شعبان
