قصة عفريت هنداوي
بقلم : محمد شعبان
وقتها سرحت كده في الحكاية اللي سمعتها، لحد ما جدتي فوقتني من
سرحاني وقالت..
-تحب تسمع حكاية تانية يا واد؟
لما قالتلي كده مسكت الورقة والقلم وقولتلها .
-طبعًا احب.. احكي يا ست الكل.. احكي.
ابتدت جدتي تحكي وتقول...
الحاجة سعاد لقوها ميتة في بيتها،عينيها كانت مبرقة للسقف وبوقها
كان مفتوح عالأخر وكأنها شافت شيطان قبل ما تموت، بس لو عايز
تعرف هي شافت ايه،ركز في الحكاية اللي هحكيهالك دي وانت هتعرف
كويس هي شافت ايه، او بمعني اصح..هي شافت مين..
عم هنداوي..عم هنداوي كان راجل صاحب محلات فضة معروف،كان
متجوز وعايش هوا ومراته وعياله في بيت من دورين زي كل بيوت
زمان..المهم ان الراجل ده بقي فجأة كده،قبل محل الفضة بتاعه واحواله
اتبدلت،بقي ليل و نهار بيتخانق مع مراته وولاده اللي كان سنهم بيتراوح
من 15 سنة ل 25 سنة في الوقت ده..وفي الوقت ده برضه الناس بدأت
تسأل وتستغرب من تصرفات الراجل العاقل اللي كل الناس كانت بتشهدله
بالطيبة والرزانة،لكن اللي كان قريب منه ومن عيلته..كان هيعرف
كويس بسبب تغيره المفاجيء ده ايه،الراجل يا ابني احواله اتبدلت من
ساعة ما أدمن المخدرات..او بالتحديد يعني،من ساعة ما أدمن الأفيون
اللي بسببه باع اللي وراه واللي قدامه،ومابقاش ينزل يفتح محله لأن
حالته الصحية اتدهورت،ولما ده حصل ولاده سابوا مدارسهم ونزلوا
يشتغلوا هم وامهم عشان يعرفوا يصرفوا علي نفسهم وعلي ابوهم اللي
بقي بياخد منهم الفلوس اللي بيشتغلوا بيها ويروح يشتري بيها أفيون،
وده طبعًا خلي المشاكل بينهم زادت..وتقريبًا بقوا كل يوم بيتخانقوا خناقة
صوتها بيجيب لاخر المنطقة،بس شهاده الله..الست مراته ماسابتهوش
في الحالة دي من غير ما تعمل حاجة؛الست خدته هي وابنها الكبير
وودته لمستشفي بتعالج المدمنين،قعد قيها كام شهر وبعد كده خرج
كويس،بس للأسف..الراجل عقبال ما خف واتعافي من اللي كان
بيتعاطاه،كانت كل حاجة راحت،البضاعة اللي في المحل كانت راحت،
والمحل نفسه كان راح..لأن موضوع علاجه ده خلي مراته تبيع اللي
وراها واللي قدامها،ولأن وضع عيلته وقتها كان عالحديدة زي ما
بيقولوا،فالرجل صابه الحزن ومابقاش قادر يعيش وهوا عالة علي مراته
وعياله،وعشان كده قرر ينزل يشتغل اي شغلانة..لكنه ماكنش قادر
يشتغل بسبب صحته اللي كانت اتدهورت بشكل كبير حتي بعد ما خف من
الادمان..وبسبب كل اللي حكيتهولك ده؛الراجل رجع ياخد افيون تاني،
ورجع مدمن تاني واكتر من الأول كمان.. بس برضه مراته مايأستش
وخدته وراحت بيه المستشفي تاني، بس المرة دي بقي الراجل قدر يهرب
من المستشفي ورجع عالبيت، ولما رجع المرة دي يا ابني كانت حالته
تصعب علي الكافر.. بقي عامل زي الدراويش ومكانش واعي لأي حاجة
هوا بيعملها،لدرجة انه ماكنش بيعرف يتكلم كلمتين علي بعض،وكمان
كان بيتبول علي نفسه زي الاطفال الصغيرين،وقتها الست مراته فضلت
ترعاه هي وولاده لحد ما بدأ يتعافي ويقف علي رجليه من تاني، بس لأنه
كان انسان مدمن..والمخدرات بتخلي البني أدم مش واعي ولا بيتعلم من
غلطاته ولا حتي بيشوف نفسه وصل لأيه بسبب اللي بيتعطاه، ف الراجل
نسي كل اللي حصل ورجع ياخد افيون من تاني..لكن المرة دي بقي
الموضوع بقي اخطر لانه كان بيضرب مراته وعياله عشان ياخد منهم
فولس يروح يشتري بيها الزفت اللي بياخده ده،ولما كانوا بيمنعوا عنه
الفلوس او بيمنعوه من انه يخرج من البيت، كان بيضربهم بكل قوة لدرجة
انه في مره صاب بنت بناته في راسها..ومع مرور الوقت،الراجل
ابتدي يضعف وابتدي الأفيون يخليه مش شايف قصاده حرفيًا،وعشان كده
يا ابني في مرة وهوا بيضرب مراته،وقع من علي السلم اللي بيوصل من
الدور الاول للبيت للدور الارضي، ومع وقعته من عالسلم دي..ابتدي
يصرخ ويتشنج بشكل غريب،ساعتها طبعًا زلاده ومراته جريوا عليه،
وللأسف لقوا راسه بتنزف بسبب جرح كبير اتجرحه فيها بسبب الوقعة،
مراته وعياله اول ما شافوا اللي حصل له ده،شالوه وطلعوه أوضة نومه
وجابلوه دكتور،بس الدكتور اللي جه وكشف عليه وحط له غيار
عالجرح،قال لهم انه مش هيعيش كتير لانه بيخرف وشكله كده اصلًا
عيان وجسمه ضعيف،ف مش هيقدر يقاوم الخبطة اللي اتخبطها علي
السلالم،ونصحهم كمان انهم ياخدوه ويودوه المستشفي ويعملوا له اشعة
عشان يطمنوا علي حالة جمجمته،طبعًا انت متوقع انهم سمعوا كلام
الدكتور وودوا الراجل المستشفي صح؟!
لو انت متوقع كده..ف خليني اقولك ان توقعك غلط يا ابني،ولاد
الراجل ومراته كانو زهقوا منه وسابوه في الأوضة وسط صراخه و اهاته
اللي ماكنتش بتسكت لحد ما ماتنايوه يا ابني سابوه لحد ما مات
ماتستغربش..ما هي القسية والقرف اللي شافوهم معاه،خلوهم يكرهوه
ويتمنوا موته،وبالفعل ده اللي حصل..الراجل مات واندفن وولاده كل
واحد فيهم راح في سكة..منهم اللي اتجوزت وعاشت في بيت بعيدا عن
امها،ومنهم اللي اتجوزت وسافرت برة مصر خالص،ومنهم اللي سافر
اشتغل في الخليج،اما الابن الاكبر بقي..ف ده سابهم ومشي وماحدش
عرف هوا راح فين.. يعني من الاخر وزي ما بنقول بابلدي كده،الواد
طفش بعد ما ابوه مات واخواته سابو البيت..البيت اللي بقي فاضي علي
الست وعاشت فيه لوحدها،بس من يوم ما البيت فضي عالست والحاجات
الغربية ابتدت تحصل..الجيران كانو بيسمعوا صوت صرخات جوزها
خارجة بالليل من الدور الأول،وكتير الناس كانو بيصحوا علي صوت
صراخ الست اللي كانت بتقول أن عفريت جوزها بيطلعلها بالليل وبيفضل
يضربها لأنها سابته مرمي لحد ما مات،وطبعًا اللي سمع الحكاية دي من
ولادها قال انها بتخرف وانها اتجننت من اللي شافته مع ابوهم..
وماكلفوش ختي خاطرهم انهم يروحوا يزوروها او يطمنو عليها،وسابوها
لوحدها في البيت لحد ما الأيام مرت،وفي يوم بالليل، الناس سمعو
صوت صرخات الست اللي فضلت مستمرة من حوالي الساعة 2 بالليل
لحد قبل الفجر بحاجات بسيطة،وطبعًا الناس حاولت تطلعلها البيت او
تشوف مالها..لكنهم بصراحة كده خافوا،خافوا وقالوا انهم مالهمش
دعوة بيها لا يتلبسوا ولا يجلهم مس،لكن اللي اتشجع منهم قال انه
هيبقي يطمن علي الست دي بس لما النهار يطلع..ولما النهار طلع
وشوية من الجيران راحو يطمنوا عليها لقوها مابتفتحش باب البيت ولما
بيخبطوا،وقتها الناس قلقت وجمعوا ناس اكتر وقدروا بالكترة انهم
يكسروا الباب ويخشو البيت،واول ما دخلو البيت..لقوا الست يا ابني
ميتة في الحوش بتاع الدور الارضي..كانت ميتة وشكلها كان يرعب،
الست كانت مبرقة لحاجة في السقف وبوقها كان مفتوح عالأخر،ووشها
كان عليه علامات فزع خلت اللي واقفين كلهم اترعبوا،بس عارف بقي
الغريب في الموضوع بجد كان ايه!
-كان ايه يا ستي ؟!
الغريب في الموضوع ان الناس لقوا حوالين راس الست بركة دم،وده
معانه انها وقعت من عالسلم وراسها اتجرحت زي ما حصل في جوزها
بالظبط قبل ما يموت،وقتها الناس خافو يقربوا منهم لا يلبسوا نفسهم
مصيبة ويدخلو في سين ويجم مالهمش اي لازمة،هم اول ما شافوا
منظرها ده،بلغوا البوليس اللي جه وخد الجثة وبعد كده سلمها لولادها
عشان يدفنوها بعد ما اتأكدوا انها حادثة عادية ومفيهاش شبهة جنائية،
ومن بعد ما الست اندفنت والبيت اتقفل وماحدش من العيال بقي بيجي
فيه،بس بالرغم من أن البيت اتقفل،إلا ان اصوات الصرخات والخبط
اللي كانت بتطلع منه كل ليلة ماوقفتش..الاصوات ليلاتي كانت بتطلع من
البيت لدرجة ان الجيران اشتكو لحد من العيا، ولما ده حصل.. العيال
ولاد الرجل و الست اتجمعوا وقرروا انهم يعرضو البيت للبيع،والمضحك
بقي في الموضوع انهم اول ما قالو بيع وورث..الاربعة كلهم اتجمعوا
بقدرة قادر..اللي كان طفشان رجع واللي كانت مسافرة جت،وكلهم
اتجمعوا مع بعض وباعوا البيت لواحدة ست من برة المنطقة، الست
فضلت عايشة في البيت هي وابنها ومراته اول اسبوع كويس جدًا،بس
بعد الاسبوع..ابتدوا يشتكوا من انهم بيشوفوا عفريت لراجل ولست
بيطلعوا لهم في الدور الارضي بالليل، وكمان كانو بيقولو انهم بيسمعوا
اصوات صرخات جاية من ورا حيطان البيت...وبعد اقل من شهر.. الست
وابنها ومراته كانوا سابوا البيت وطفشوا بعد ما عرضوه للبيع،ورجع
البيت اتقفل عشان الاصوات ترجع تخرج منه تاني بالليل،وفضل البيت
علي الحال ده لمدة كام شهر كده، لحد ما جه رجل غني اشتراه وهده،
وبني مكانة عمارة كبيرة،ومع مرور الوقت العمارة بقت اكبر و البيوت
اللي حواليها بقت عماير و الناس كترت في المنقطة وماحدش بقي لا يسمع
ولا يشوف حاجة غريبة مكان ما البيت كان موجود.
بعد ما جدتي خلصت كلامها، بصيت لها بتركيز وقلتلها..
-طب وانتي تفسيرك ايه للحكاية دي يا ست الكل؟!
اتندهت كده ورجعت راسها لورا وقالتلي..
-يا ابني هي دي الدنيا..ازرع خير تحصد خير،الرجل قسي علي ولاده،
والست هي كمان قسيت عليه لما سابته بيطلع في الروح لمدة ايام،
وبسبب اللي حصل ده ولادها كرهوها زي ما كرهوا ابوهم وسابوها
لوحدها في البيت لحد ما ماتت...الانسان يا ابني شره اكبر من شر
العفاريت،وبعدين هوا العفريت ده يعني هيطلع لواحده كده،ما اكيد اي
عفريت او اي جن او اي مصيبة سودة بتحصل في الدنيا بيكون سببها
البني أدمن نفسه،مافيش جن يا ابني او شيطان بيأذي من نفسيه كده الا لما
يكون سبب الأذية بني أدم.
لما جدتي قالتلي الكلام ده، رديت عليها..
-والله معاكي حق يا ست الكل في كل كلمة قولتيها،المهم بقي ان الحكاية
اللي فاتت دي بالرغم من انها جميلة وكلها عبر،الا انها حزينة ومأساوية
اوي..ماتحكيلي حكاية تانية بقي تكون سعيدة كده ومافيهاش ميتين ولا
عيال بيرموا اهاليهم ولا كل النكد ده.
لما قولتلها كده ضحكت..
-طيب يا سيدي..انا هفرفشك وهحكيلك حكاية هند الرقاصة.
اول ما قالتلي كده ضحكت وانا بقولها..
-اه..طالما فيها رقاصة يبقي احكي..احكي وانا هركز معاكي في كل
تفاصيل الحكاية.
ضحكت انا وهي شوية وهزرنا مع بعض لحد ما بتديت ملامحها تاخد شكل
الجد وتحكيلي حكاية هند الرقاصة لما قالت ..
يتبع
(دي كانت حكاية من حكايات جدتي..اللي بالمناسبة يعني،هي جدتي
فعلاً وهي اللي بتحكيلي الحكايات دي وانا بكتبهالكوا،بكرة بأذن الله حكاية
جديدة بعنوان "هند الرقاصة" وبأذن الله هتنزل في نفس معاد الحكاية دي)
الروابط
آخر قصة : بيت المقابر
صفحة الكاتب : محمد شعبان
قصة : انتقام هند