 |
| مسلسل الاختيار الجزء الثاني |
مراجعة مسلسل الاختيار 2 من الحلقة 1 للحلقة 8 | حصري
المسلسل الأكثر جدلية في السباق الرمضاني لموسم 2021 مسلسل الاختيار الجزء الثاني إخراج بيتر ميمي وتأليف هاني سرحان ومن بطولة أحمد مكي وكريم عبد العزيز .
الحقيقة الجزء دا في ايجابيات كتير جدا عن الجزء الاول وفي تحسن واضح في خطوط كتير واخطاء فنية وقعوا فيها في الجزء الاول وتم تداركها معانا هنا .
تنويه : بغض النظر عن الأحداث السياسية فالمراجعة دي للجانب الفني وبس .
مبدأيا فكرة المسلسل بتناقش الفترة اللي عاشتها مصر من أول أحداث 30 / 6 والفوضى اللي عمت البلد اثناء التوقيت دا .
أول تحسن عن الجزء الاول يتلخص في الجملة دي : في الجزء الاول البطل كان المنسي ولكن التركيز كان على الفترة الزمنية ، أما الجزء دا فدور البطولة يروح للفترة الزمنية ولكن التركيز هو اللي على يوسف وزكريا .
يعني ايه الكلام ؟ .
في الجزء الاول المفترض كنا نحكي قصة البطل الشهيد احمد منسي ، تمام ؟ تمام ، طيب عشان نقدر نملى ال 30 حلقة محتاجين احداث كتير جدا ونحاول انهم يكونوا كلهم مرتطبتين بيه ، ودا أدى لبعض الملل عند المشاهدين في كتير من الحلقات اللي كان واضح انها ممطوطة ( البطل الحقيقي كان المنسي وكنا بنعرضه من خلال الفترة الزمنية لاحداث المسلسل ) .
هنا بقى العكس .
في أول 8 حلقات البطل الحقيقي هي الاحداث الحقيقية اللي حصلت لمصر في التوقيت دا ، وبنعرض الاحداث دي من خلال بطلين العمل : زكريا ويوسف .
أكيد مع الوقت هتظهر القصة الحقيقية للاتنين دول بس لحد دلوقتي منبهر جدا بحبكة الامور ببعضها وحالة الموازاة اللي عاملها المسلسل ما بين السير في قصص الابطال وما بين الاحداث الحقيقية .
كمان فكرة الجزء دا من المسلسل في خطورة كبيرة : وهي أن مافيش بطل شر واضح أو خطة ليها خبايا وابعاد زي الاختيار 1 في الجانب بتاع هشام عشماوي وانصار بيت المقدس وتخطيطهم من الحلقة العاشرة في اغتيال الشهيد احمد منسي .
في الجزء دا مافيش حدث او شرير بعينه او مخطط واضح نقدر نقول إن دا اللي هيكمل معانا للحلقة ال 30 .
طيب فين الخطورة هنا ؟ .
الخطورة ان لو سبت الدنيا عشوائية مش هتقدر تشتري المُشاهد انو يجيلك ويتفرج عليك حلقة كمان .
وعشان كدا هتلاحظوا ان كل حلقة ضروري جدًا جدًا تنهيها بلقطة تشوق جامد للحلقة اللي بعدها .
أما السيناريو بقى ففي تحسن كبير جدا عن الجزء الاول ، بيبقى في بعض الافكار المعينة والاسئلة اللي حابب فريق العمل انو يوصلها للمشاهد على شكل مناظرات بين طرفين عشان المتلقي يفكر في المناظرة ويقتنع .
زي مثلا : هما ليه الاخوان بيكفرونا ؟ هو ليه في ناس مسلمين بتموت بعض ، ليه فض رابعة مثلا كان ضروري ومطلوب .
الاسئلة اللي زي دي لما كانت بتتعرض في الجزء الاول أحيانًا بتبقى موفقة وسليمة وأحيانًا بتبان جدًا إنه مجرد حوار محصلش بس محطوط عشان أجاوب على سؤال اللي بيتفرج عليا ...
اما في الجزء دا فالمناظرات دي محطوطة في مواقف سليمة جدًا بطريقة متبانش إن الأسئلة دي وراها هدف معين لا هو يمشي فعلًا نقاش بين اتنين في الموقف دا .
طريقة تجسيد الاحداث دي لازم نحيي عليها المخرج المبدع في مشاهد الأكشن "بيتر ميمي" اللي قدر يجسدلنا الأحداث دي بصورة تعملنا معايشة حقيقية معاها ، احنا كل حلقة بنشوف مسلسل رعب ، بس مش جن وعفاريت ، لا مسلسل رعب مبني على الخوف من الموت بسبب اي رصاصة طايشة في كل الاحداث اللي عدت .
كمان توظيف الماتريال بتاعت المقاطع اللي فيها التصوير الحقيقي للاحداث دي عبقري وبيوريك قد ايه المخرج صنع بيئة مشابهة للوقائع الحقيقية .
الاختيار 2 ماشي بخطى كويسة ومستني جدًا باقي الحلقات .