بقلم الكاتب : مــصــطــفــى عــمــر كاتب خبير
التحليل دا هيكون فيه حرق لي مسلسل wandavision ، فلو لسه مشوفتش اول 3 حلقات انصحك تشوفهم وترجع تقرأ .
قصة مسلسل wandavision
المسلسل دا في ناس هتشوفه تافه جدا وسطحي وناس هتشوف المغزى المهم منه فسواء حبيت اول 3 حلقات او مقتنعتش بيهم بس مارفل ردت على كل الناس اللي انتقدتها وقالت انها مش بتجدد من افكارها وبتخاف من التجديد وان عالمها عبارة عن فيلم واحد مكرر ، لانها المرة دي قدمت حاجة مختلفة اختلاف جذري عن اي حاجة شوفتها في عالم مارفل السينمائي .
( واللي خلاص مبقاش معتمد على السينما وبس لأنه دخل فيه مشاريع ضخمة من المسلسلات واللي بدأت مع المسلسل الجديد wandavision ) .
wandavision هو العمل اللي بيفتتح المرحلة الرابعة لعالم مارفل وبيحط حجر الاساس ليه والسكة اللي هنمشي فيها في المستقبل .
وعشان كدا فكرة التجديد واللي هنحكي عنه قدام في المسلسل دا في خطورة كبيرة واقدر اقول انهم نجحوا في دا جدا .
كلنا عارفين ان vision مات في احداث infinty war وإن wanda حبيبته حزينة جدا على فقدانه - وعندنا بردو خلفية عن قدرات واندا انها بتقدر تخلق واقع افتراضي وكأنها بتعمل عالم خاص باحداثه وقصصه وعشان كدا البعض شايفها اقوى شخصيات مارفل .
طيب هل اللي احنا شايفينه دا واقع وهمي عملاه واندا بمزاجها ولا حد غصبها انها تعمل كدا ولا ايه اللي بيحصل بظبط ؟ .
في الحلقة الاولى بنكتشف اننا بنتفرج على مسلسل من نوعية ( السيت كوم ) ، لأ هو حرفيا سيت كوم من اول الحلقة لاخرها ولو انت مش عارف دا يعني ايه ، سيت كوم بظبط كدا زي راجل وست ستات .
عشان كدا بقول قرار خطير ومجنون انك بتخاطر بالشكل دا وانت عارف ان في ناس كتير مش هيحبوا الموضوع دا ، لا والموضوع مكتفاش بكدا دا رجع للماضي وعملك سيت كوم في حقبة الخمسينات ، يعني الالوان ابيض واسود وطريقة التمثيل كلاسيكية جدا والاداء الكليشيه المعروف قديما ، طيب كل دا ليه ؟ .
اللي نعرفه الي الان من خلفيتنا على المسلسل ان واندا حبت تخلق واقع افتراضي تعيش فيه مع حبيبها فيجين بسلام في عالم مثالي جدا ، العالم المثالي دا في وجهة نظرها بيتجسد في مدينة صغيرة اسمها ويست فيو في فترة الخمسينيات في مسلسل سيت كوم جميل .
اقصى مشاكله بتكون حاجة ساخرة ، فعندك الحلقة الاولى بتدور بالكامل حوالين عزومة عشاء مدير العمل ، والتانية عن عرض سحري تقليدي ، والتالتة عن ولادة واندا ، والمشكلة الرئيسية اللي بيحاولوا يتجنبوها في اول 3 حلقات هي عدم فضح قدراتهم الخارقة للعالم التقليدي الطبيعي دا .
فبيحاولوا على قد ما يقدروا انهم يعيشوا حياة مثالية جدا وسط مجتمع مثالي من غير اي طاقات خارقة ولا اشرار من الفضاء والجو دا ، لكن خلي بالكم ان كل دا لسه متقالش جوا المسلسل ، يعني الدنيا ممكن تختلف تماما لما نفهم ايه اللي بيحصل .
تعالوا بقى نراجع حلقة حلقة ونشرح الغير مفهوم ، في حاجات مستنتجتهاش بنفسي فاضطريت الجا لبعض المراجعات الاجنبية للمسلسل عشان اقدر افهم الدنيا .
تحليل الحلقة الأولى من مسلسل wandavision
1- كمسلسل سيت كوم لذيذة جدا ، محتفظة اوي بسمات المسلسلات في حقبة الخمسينات والافكار وحتى الادوات والديكور اللي بيستخدموها في التمثيل واداء اليزابيث اولسن و بول بيتاني عظيم جدا وبيوريك مدى القدرات التمثيلية اللي بيملكوها الاتنين دول .
2- في حاجة غريبة اوي بناخد بالنا منها ، وقت العشاء مدير فيجين في الشغل بتقف حاجة في زوره وبيكح كتير ، ومراته بتبدأ تقول باحراج ( stop it ، stop it ) ولكن لما نركز هنلاقي ان الكلام مش موجه لجوزها بل موجه لواندا نفسها .
ودا بيودينا لحاجتين ، ان الناس دي لو مجرد وهم خلقته واندا عشان تقدر تعمل مجتمع يعيشه فيه فدا مجرد جليتش حصل بسبب انها مش قادرة تسيطر على كل حاجة ، اما لو دول ناس موجودين بجد في نفس اللحظة .
ففي الحالة دي هما عارفين انهم محبوسين في واقع واندا وانها بتقدر تتحكم في كل شئ هنا ، وهنا نستنتج ان واندا هي فيلين او شرير المسلسل الرئيسي لانها بكدا بتكون بتضر ناس حواليها وحبستهم معاها بدون ذنب عشان هدفها هي وبس .
3- وفي اخر الحلقة الحلقة بنلاقي ان كل دا كان مجرد حلقة تلفزيونية بيتعرض في شاشة عادية للواقع الحقيقي بتاعنا وبيتفرج عليها حد تابع لمنظمة ( sword ) عامة لو محدش يعرف فدي المنظمة اللي ظهرت في اخر فيلم سبايدر مان اللي كان فيها نيك فيوري والمنظمة دي بتهدف لمراقبة الاسلحة الحية : زي واندا كدا بظبط .
طيب هل هي مجرد مراقبة دورية يومية ، ولا هما السبب في كل اللي بيحصلها ؟ ولا هما بيحاولوا ينقذوها من شئ ما ؟ .
في الحلقة التانية من wandavision
1- بنروح لحقبة الستينات وفي ملحوظة صغيرة : انا معجب جدا باداء بول بيتاني واليزابيث اولسن في اللي عملوه في ال 3 حلقات خاصة التانية والتالتة .
لانهم بينقلوا في جزء من الثانية من اداء كلاسيكي في الحقبات القديمة لاداء تمثيلي متعودين عليه منهم في افلامنا اللي واخد طابع القلق والرهبة ، وكمان اخراج الحلقات دي عظيم بسبب القالب اللي اختاروا يجسدوا منه السيناريو دا .
2- اهم الحاجات اللي نركز عليها في الحلقة دي هي الطيارة اللعبة اللي اخترقت عالم واندا ، حاجة ملونة وسط عالم ابيض واسود ودا بيدل على ان في محاولات من برا لناس عاوزة تدخل العالم دا وبتحاول على قد ما تقدر .
وكمان الشخص اللي بينادي على واندا من الراديو كفرصة للتواصل معاها ، ودا دليل انها في واقع كامل منعزل عن اي حاجة برا وتاني حاجة ان في حد فعلا بيحاول يوصلها بس الجملة اللي قالها دي مهمة ( واندا ، مين اللي بيعمل فيكي كدا ) .
ودا بيعرفك انها تحت خطر ما او تهديد معين هي مش واخدة بالها منه ، وكمان دوتي اللي كانت بتكلمها في اللحظة دي كانت مريبة وكأنها عارفة واقع واندا وعارفة كل حاجة عنها ، بس علطول بنلاقي ان كل دا بيتصلح وبيتم التغاضي عنه وبنكمل قصتنا عادي جدا .
3- وبنروح لمشهد السحر ، افكاره حلوة جدا ولذيذ وخفيف وبنسبالي هو من احسن المشاهد في اول حلقتين .
4- بنروح بعد كدا للاعلانات اللي بتظهر كفواصل في برنامج واندا : الاعلان المهم هو اعلان الساعة اللي واضح جدا والكل اخد باله انو من منظمة هايدرا وعليها اسم ستراكر وستراكر دا هو من عيلة هايدرا وهو اللي عمل التجارب على واندا وكويك سيلفر .
وكمان اعلان مكنة التوست في الحلقة الاولى من صناعات ستارك ودا طبعا كلنا عارفين هو مين ، وكان في اعلان الصابون من صناعة هايدرا ، الكل شايف ان دا هيطلع في الاخر من صنع هايدرا ، ولكن انا برجح فكرة ان مافيش الكلام دا .
وان كل دا مجرد اعلانات مبنية على معلومات واندا ، لانها مبتعرفش غير الشركتين دول ، هايدرا وستارك وستراكر عندها معرفة سابقة بيهم ، وكان فيه ربط بين اعلان التوست وقصة حياتها فحصل اسقاط في الاعلان دا عنها هي واخوها وامها ، مش هشرحه هسيبكم تدوروا عليه بنفسكم ، ( دي مجرد نظريات يعني مش حاجة اكيدة ) .
5- وفي الاخر بنكتشف ان منظمة سورد قدرت فعلا تخترق عالم واندا ولما هي اكتشفت دا رجعت الزمن او للدقة فهي رجعت السيناريو لورا عشان تقدر تغير الحدث والجليتش دا وبتنتقل لزمن جديد وهو حقبة السبعينات وهنا بنروح للحلقة التالتة اللي مليانة تفاصيل هقولها سريعا .
ريفيو الحلقة التالتة من مسلسل wandavision
1- الحلقة بتتكلم عن حمل واندا وولادتها السريعة جدا ن وكل اضطراب بتمر بيه خلال فترة الحمل بيحصل حواليها في الواقع بتاعها اضطرابات في كل حاجة حتى تصرفات الجيران وردود افعالهم ، كل شئ عبثي وغير منطقي هيمر قدام عينك .
2- فيجين كان سريع زي اخوها كويك سيلفرودي لو علامة لحاجة فممكن نقول ان واندا بتعوض موت اخوها في فيجين عشان تحس ان كل حبايبها في العالم المثالي معاها .
3- بعد لما الولادة تمت جه للدنيا طفلين ، والطفلين دول هما بيلي وتومي وفي تحليل ان دول هما ويكين اللي واخد قدرات واندا وسبيد اللي واخد قدرات كويك سيلفر ، وفي تسريبات ان الاطفال دول هيكونوا جزء من young avengers بس ازاي هيخرجوا من وهم واندا فدا اللي هنعرفه .
4- ونيجي للمشهد المهم ن ان واندا مش عاوزة فيجين يحس ان في حاجة غلط ، فيجين عارف انو في عالم صغير وهو عنده قدرة خارقة بيحاول يداريها ويعيش بسلام ، ولكن كل لما يشك ان في عبثية وجليتشات كتير بتحصل في العالم دا واندا تقوم ترجع الشريط وتصحح الموقف عشان ميحسش بأي حاجة .
ولكن فيجين سمع الجيران بيتكلموا عن كراكتر مهم في المسلسل وهي اللي اتقدمت لينا باسم ( جيرالدين ) بيسمع من الجيران انها ملهاش منزل وملهاش اهل ولا زوج ن هي مجرد شخص دخيل على العالم بتاعنا .
وفي نفس اللحظة بنسمع ان جيرالدين بتكلم واندا وفهمت انها مش من عالمها والدليل السلسلة اللي كانت لابساها اللي عليها شعار منظمة sword وبنشوف ان واندا نفتها ورمتها بعيد عشان تخرج من الفقاعة اللي عملاها واندا عشان تحافظ على عالمها وبنلاقي برا مشهد مهم .
منظمة sword وهي محاوطة العالم باسلحة تقيلة ونظام دفاعي قوي ولسه هنفهم ايه اللي هيحصل اكتر في الحلقات الجاية ، وهنا بنفهم ان خلاص المفروض فيجين يكون اتاكد ان في حاجة غلط فعلا وان واندا بتكدب عليه في شئ ما .
كمان ردود فعل الجيران برا وحتى الدكتور بتأكد اكتر ان في ناس فاهمة ايه اللي بيحصل وكأنهم محبوسين ومعاهم سر ما لسه متوضحش .
استنوا تحليل باقي السيزون قريب