 |
| ازاي أحب الصلاة |
الصلاة : من النهاردة مش هتفوت صلاة واحدة | كبسولة 1
في البداية كدا هقولك كبسولة عايزك تحفرها في دماغك وبإذن الله مش هتخرج قبل متكون يقين ومتأكد بأهمية الصلاة وانها الطريق الوحيد لقربك من ربنا .
وانك في مواعيد الصلاة أو فترات الصلاة اللي انت بتفوتها وسط يومك هي الفترة الوحيدة اللي بتقف فيها بين ايدين ربنا بــس .
تخيل كدا تبقى متفق على ميعاد مع صاحبك ، وفجأة حصلك ظرف أو كبرت دماغك ومروحتش الميعاد دا تخيل رد فعل صاحبك هيبقى ازاي .
مبالك بقى ربنا مديك 5 مواعيد تقابله فيهم وانت مكبر دماغك ، لا وكمان أحيانًا بتبقى قاصد ، تخيل كدا ايه المقابل من رب السموات والأرض .
ازاي النبي حث على الصلاة وأكد عليها
في حديث للرسول صلى الله عليه وسلم بيقول :
"من صلى أربعين يومًا يدرك التكبيرة الأولى كتبت له برائتان براءة من النار وبراءة من النفاق" رواه الترمذي وصححه الشيخ الألباني .
طب تعرف الحديث دا كنز ، معناه لو نزلت 40 يوم بتصلي في المسجد وبتلحق التكبيرة الأولى هيبقى برئ من النار ومن النفاق ، يعني هتخش الجنة ببلاش ، في أحلى من كدا بجد ، يعني 40 يوم يدخلوني الجنة ؟! ، هقولك اه .
وقال أيضًا عليه الصلاة والسلام :
" بين الرجل وبين الشرك والكفر ترك الصلاة " رواه مسلم .
وقال صلى الله عليه وسلم :
" من ترك صلاة العصر فقد حبط عمله " رواه البخاري ( ربنا برضوا أكد على صلاة العصر ) .
وقال صلى الله عليه وسلم :
" العهد الذي بيننا وبينهم الصلاة فمن تركها فقد كفر " صحيح سنن الترمذي .
وقال عليه الصلاة والسلام أيضًا :
" الذي تفوته صلاة العصر كأنها وتر أهله وماله " البخاري ومعنى وتر أهله هنا يعن فقدهم .
وقال آخرًا :
" ولا تترك صلاة مكتوبة متعمدًا ، فمن تركها متعمدًا فقد برئت منه الذمة " صحيح سنن ابن ماجه .
أهمية الصلاة في القرآن الكريم
أظن لو ركزت في شوية الأحاديث دي ممكن تعيد تفكيرك في الصلاة ، طب لو حاسس انك لسه مقتنعتش تعالى اقنعك بآيات عن الصلاة في القرآن الكريم .
قبل منبتدي لازم أديك معلومة في السريع كدا خليها سر بيني وبينك ، ألا وهي كلمة "الصلاة" ذُكرت في المصحف الشريف 85 مرة ودا في مواضع مختلفة في آيات مختلفة من 114 سورة في المصحف ، وهنا بقى نبتدي نشرح واحدة واحدة أهمية الصلاة في القرآن .
تعالى بقى اديك معلومة تانية هتوريك إعجاز قرآني في المصحف الشريف ، وهو إن كلمة "صلوات" ( الجمع من كلمة صلاة يعني ) ذُكرت في 5 مواضع ولو ركزت في 5 هتعرف إن دا عدد الصلوات المفروضة علينا في اليوم الواحد أو عدد المرات اللي المفروض عليك تقف قودام ربنا فيها .
وفي كلمة دايمًا بقى بتقابلنا كتير واحنا بنقرأ في المصحف وهي :
" أقم الصلاة " أو " أقيموا الصلاة " ، ودي ذُكرت في 17 موضع ، ودا عدد الركعات اللي بنركعها في اليوم الواحد .
تعالالي بقى كدا اضربلي 17×5 هيديك 85 ودا عدد المرات اللي اتذكر فيها لفظ الصلاة في القرآن الكريم .
طب هتيجي تقولي انت قولت عدد الركعات 17 ودا بيتوازي مع عدد كلمة أقم الصلاة وأقيموا الصلاة ، طب والسجود بقى .
ذُكر كلمة " يسجد " بمشتقاتها 34 مرة وهي عدد مرات السجود في الصلاة وممكن توقف قراءة وتعدهم عادي .
طب عرفنا أهمية الصلاة عند الرسول صلى الله عليه وسلم ، وعرفنا كم مرة ذُكر لفظ صلاة في القرآن الكريم ، دلوقتي بقى هوريكم مثال لآيات من القرآن بتدل على أهمية الصلاة .
أهمية الصلاة في القرآن الكريم
قال تعالى : " إن الإنسان خُلق هلوعا ( 19 ) إذا مسه الشر جزوعا ( 20 ) وإذا مسه الخير منوعا ( 21 ) إلا الــمـصــلــيــن ( 22 ) الذي هم على صلاتهم دائــمــون ( 23 ) والذين في أموالهم حق معلوم ( 24 ) للسائل والمحروم ( 25 ) والذين يصدقون بيوم الدين ( 26 ) والذين هم من عذاب ربهم مشفقون ( 27 ) إن عذاب ربهم غير مأمون ( 28 ) والذين هم لفروجهم حافظون ( 29 ) إلا على أزواجهم أو ما ملكت أيمانهم فإنهم غير ملومين ( 30 ) فمن ابتغى وراء ذلك فأولئك هم العادون ( 31 ) " .
قال تعالى : " والذين هم لأماناتهم وعهدهم راعون ( 32 ) والذين هم بشهاداتهم قائمون ( 33 ) والذين هم على صــلاتــهــم يــحــافــظــون ( 34 ) أولئك في جــنــات مكرمون ( 35 ) فمال الذين كفروا قبلك مهطعين ( 36 ) عن اليمين وعن الشمال عزين ( 37 ) أيطمع كل امرئ منهم أن يدخل جنة نعيم ( 38 ) كلا إنا خلقناهم مما يعلمون ( 39 ) فلا أقسم برب المشارق والمغارب إنا لقادرون ( 40 ) على أن تبدل خيرًا منهم وما نحن بمسبوقين ( 41 ) فذرهم يخوضوا ويلعبوا حتى يلاقوا يومهم الذي يوعدون ( 42 ) يوم يخرجون من الأجداث سراعا كأنهم إلى نصب يوفضون ( 43 ) خاشعة أبصارهم ترهقهم ذلة ذلك اليوم الذي كان يوعدون ( 44 ) " .
ياريت تقرأوا كل آيه بتأني عشان تعرفوا كلام ربنا يقصد ايه بيه .
طب هل لتارك الصلاة عواقب ، ربنا رد وقال اه ليه عواقب ودا موضح في الآيات اللي جاية :
ما هي عواقب تارك الصلاة
أصحاب اليمين اللي في الجنة بيتسألوا ايه اللي دخل المجرمين النار ، فكان رد المجرمين عليهم انهم مكانوش بيصلوا ، ودا بيبان في الآية دي ...
قال تعالى : " إلا أصحاب اليمين (39) في جنات يتسائلون (40) عن المجرمين (41) ما سلككم في سقر (42) قالوا لم نك من المصلين (43) " سورة المدثر .
ربنا برضوا قال لتاركين الصلاة إن مفيش شفاعة هتنفعهم ، ودا وضحلنا من الآية دي ...
قال تعالى : " فما تنفعهم شفاعة الشافعين " سورة المدثر ، آية 48 .
فالآيه اللي جاية دي بقى بتوضح عظمة عقوبة تاركين الصلاة ومتبعين الشهوات ، فربنا قال إنهم هيترموا في وادي خبيث يُسمى غيا ، ودا على حسب كلام المفسرين وادي في جهنم ، ويقصد هنا بخلف من بعدهم خلف يعني الفاسد والغير الصالح اللي بيجي من بعد شخص صالح .
وربنا قال في آخر آيه "إلا من تاب وعمل صالحًا" ، يعني ربنا بيقولك الحل ومفيش أسهل منه وهو انك تتوب وربنا هيتقبل توبتك ومتسمعش كلام شيطانك .
قال تعالى : " فخلف من بعدهم خلف أضاعوا الصلاة واتبعوا الشهوات فسوف يلقون غيا ، إلا من تاب وآمن وعمل صالحًا " سورة مريم ، الآية 59 ، 60 .
وأشد آيتين بجد ممكن يرعبوا البعض هما دولت :
قال تعالى : " إن المناقين يخادعون الله وهو خادعهم ، وإذا قاموا إلى الصلاة قاموا كسالى " سورة النساء - 142 .
قال تعالى : " ومن أعرض عن ذكري فإن له معيشة ضنكا ونحشرة يوم القيامة أعمى " سورة طه - 124 .
الآيتين مفسرين نفسهم وأظن مفيش خوف ورعب أكتر من كدا ، بس الحل في ايدك وربنا مسهلك الدنيا خالص مفيش أسهل من انك تقوم تصلي 4 ركعات ولا 3 ولا 2 مش هياخدوا من يومك كله حاجة قودام المكسب اللي هتكسبه في الآخرة .
لو خلصت قراءة يبقى بجد أحب اباركلك إن بقى معاك كنز في ايدك ، احنا داخلين على شهر رمضان ، كلنا بنفيد وبنستفيد من بعض ، لو عايز تكسب حسنات ببلاش فتقدر تشير الكنز دا لعل حد مبيصليش يصلي بسببك وتخيل الثواب على كدا هيبقى عامل ازاي ، وربنا يجعله في ميزان حسناتي وحسناتكم .
