فتاة مُقبلة على الزواج وفي صباح يوم زفافها، تفاجئت بشيء قلب كُل موازين زواجها ومن ثم بدأت حياة لم تكن تتوقعها حتى انتهت ب ... (قــصــة الــمــرض الــغــريــب - سُــمــيــة خــالــد)
بقلم : سمية خالد
- يلا يا ياسمين قومي الساعة بقت 11 كفاية نوم ورانا حاجات كتير أوي النهاردة .
"حطيت المخدة على وشي عشان الضوء مايجيش على عيني"
= سبيني يا ماما معلش أنام شوية .
- تنامي ايه بس يا بنتي النهاردة فرحك ولسه مروحتيش الكوافير يلا قومي عشان نفطر سوا .
= طيب يا ماما روحي وأنا جاية وراكي .
- ماشي بس اوعي تنامي تاني .
= حاضر يا ماما إقفلي الباب بقى .
فتحت النور وقومت من على سريري عشان ابص في المرايا، حطيت ايدي على شعري لاقيته بيقع في ايدي فضلت واقفة لحظات مقدرتش أمسك نفسي من العياط أنا خايفة أبص في المرايا وملاقيش شعري، مشيت بخطوات بطيئة جداً لحد ما بصيت في المرايا .
لاقيت شعري كله في الأرض حواليا حتى حواجبي مابقتش موجودة، فضلت أعيط أهلي كانوا برا أخويا أيمن وبابا والمعازيم مش عارفة أعمل ايه دة دنا كام ساعة وهيكون فرحي طب المفروض أهلي جايين عشان نروح الكوافير، طيب علي حبيبي وخطيبي دا يا ترى اي رد فعله لما يشوفني كدا .
ماما دخلت عليا وأنا قاعدة في الأرض بعيط فضلت واقفة ربع ساعة متنجة لما شافت شعري حواليا لحد ما أغم عليها، ندهت على بابا وايمن اخويا وأنا منهارة .
- الحقو ماما أغم عليها .
بابا وايمن جم بابا ماتكلمش ولا كلمة ولكن عنيه مليانه صدمة وحزن عليا ماما فاقت ولسه مش مستوعبة اللي حصل، علي وأهله جم وطلعتلهم وانا حاطة على دماغى طقية .
قلعت الدبلة من ايدي واديتهاله، دخلت أوضتي وأنا مش مستوعبة إن كل دا حصل يوم فرحي وأنا وعلي خلاص مش هنبقى لبعض، بابا خبط على الباب .
- ممكن أدخل يا ياسمين .
= إتفضل يا بابا .
- أمورتي الحلوى زعلانة ليه بقى .
= انتَ مش شايف شكلي بقى عامل ازاي أنا محدش هايبص في وشي تاني حتى علي محاولش يتكلم معايا أو يفضل مكانه وكأنه ما صدق مش أنا حتى مش عارفة اي السبب في إن شعري يقع كدا .
بابا مسح دموعي وخادني ف حضنه
- إحنا بنحبك أنا وايمن وماما، أقولك حتى لو بقيتِ قدرة هنفضل نحبك ويلا البسي عشان هنروح نكشف حالاً .
= لا يا بابا مش قادرة مش عايزة أطلع من الأوضة عاوزة أفضل فيها على طول مش عاوزة أطلع مش عاوزة أشوف الناس .
- لا هتطلعي وهاتخفي وهتبقي أحسن كمان طول منا موجود مش عاوز أشوف نظره الحُزن دي فِ عنيكي فاهمة .
= ربنا يخليك ليا يا بابا .
طول الوقت علي كان بيبعتلي في مسدجات يعرف إذا كنت نولت روحت للدكتورة ولا لأ بس مردتش عليه بعت رسايل لماما وايمن ومحدش برضوا رد عليه .
روحت أنا وبابا عند دكتور كان زميل بابا وأول ما وصلنا، عملي كذا فحص قالنا إنه مش عارف ايه المرض دا في فيروس ف جسمي غريب أول مرة يشوف حالة زيه، ودا يا بيكون من النفسية يا نقص فيتامينات في الجسم وان في مشكلة كبيرة في الغدد، أنا بسمع الكلام وأنا حاسة اني في كابوس طيب لي يحصل كل دا قبل يوم فرحي لي كتبلي على حجز في المستشفى قال لإنه لازم يتابع حالتي بنفسه .
بابا قاله :
- طب هل حجزها ممكن يجيب نتيجة مع العلاج احنا ممكن نجيب العلاج وأتابع معاها في البيت .
الدكتور رد على بابا وقال :
- لا يا خالد ماينفعش لازم أتابع حالتها بنفسي كل يوم .
- طيب هي ممكن تطول في الحجز في المستشفى .
- لا هُما اسبوعين بس ولو العلاج اللي هديهولها ماجبش نتيجة للأسف ما باليد حيلة مش هعرف أعملها حاجة لإن الحالة دي أول مرة تقابلني ف حياتي ومابتجيش غير ل 1 في المليون .
بابا مسك إيدي وابتسم رغم ان عنيه مليانة حُزن .
- لا إن شاء الله العلاج هيجيب نتيجة وأمورتي الحلوة هاتبقى أحسن مش كدا يا حبيبة بابا .
- كدا يا حبيبي
روحت مع بابا البيت عشان أخد هدوم ليا وماما من ساعة اللي حصلي وهي قاعدة في السرير وتعبانة روحت أسلم عليها قبل ما أمشي .
= ماما انتِ عارفة اني بحبك صح .
حضنتني وعيطت
- عارفة يا حبيبة ماما بس أنا مش قادرة أشوفك بالحالة دي أنا عاوزة أشوفك بخير .
= أنا هبقى كويسة متخافيش .
بصتلي وهي مرعوبة وقالت :
- بتكدبي عليا انتِ خايفة .
= الصراحة اه
- عارفة أنا برغم الحزن اللي جوايا على حالتك بس عارفة ان ربنا ليه حكمة في كل حاجة بتحصل والحاجة دي هنعرفها في الوقت المناسب وإن ربنا مايبتليش حد من عباده إلا لو كان بيحبه .
= كلامك ليا هون عليا كتير خلاني حاسة اني مرتاحة زي ما يكون عبء من على قلبي اتشال .
بابا دخل الأوضة وف ايديه شنطة هدومي .
- مش يلا بقى ولا ايه .
= حاضر يا بابا .
روحت انا وبابا المستشفى
- مش هاوصيك على ياسمين يا دكتور ماجد دي مش بنتي وبس، دي حته مني .
دكتور ماجد رد بابتسامة
= انت بتقول ايه يا راجل ياسمين دي زي بنتي وبعدين انتَ تقدر تيجي تزورها وقت منتَ عايز .
بابا بيسلم عليا قبل ما يمشي
- بصي بقى وقت ما تحتاجني حاجة تكلميني على طول ما تترديش، أول ما تحسي انك خايفة كلميني هطمنك .
= حاضر يا بابا .
بابا مشي ولاقيت مسدج جاتلي من علي ..."أنا لسه بحبك وعاوزك ومعنديش مشكلة نأجل فرحنا لحد ما تتعالجي"
ياااه معقولة يعني علي عاوز يأجل فرحنا لمجرد إن شكلي اتغير معقولة حب شكلي مش روحي الحلوة... لو بيحبني فعلاً كان قالي نتجوز حتى وانتِ كدا واتعالج وأنا معاه ويفضل ساندني بس واضح إنه مستني ابقى كويسة عشان يرجع يحبني أقصد يحب شكلي كلمة يحبني دي كبيرة عليه .
"دكتور ماجد دخل ومعاه ممرضه"
- بصي يا ياسمين انا عارف إنه هيبقى صعب عليكي بس جايز يكون في الشفا .
= مش فاهمة
- بصي اللي عندك جايز يبقى نقص فيتامين دا غير إن الانيميا عندك 6 وفي الحالة دي هركبلك كل يوم محلول حديد، مع شوية أدوية تانية خاصة بالمرض اللي عندك .
"رديت بخوف وتوتر"
= ايوا بس أنا... أنا بخاف من الحقن من صغري إزاي بابا نسي يقولك حاجة زي دي .
- باباكي قالي بس انا مينفعش اديكي برشام لانه مش هيعمل نتيجة لو عاوزة تخفي لازم تركبي المحاليل دي .
لاقيت الدكتور بيقول للممرضة اللي معاه يلا يا هند جهزي الحقنة، قومت من على السيري وفضلت اجري في الأوضة كلها وأعيط لحد ما الممرضة مسكتني وقعدتني على السرير .
دكتور ماجد فضل يزعقلي ووشه جاب ألوان وقال :
- بصي بقى عاوزة تخفي لازم تركبي المحلول دا أنا مرضتش أنقلك دم ليكون مش كويس ف أرجوكي ساعديني عشان تخرجي من هنا .
لاقيت شاب وسيم عنيه بُنس وعنده دقن خفيفة لابس بلطو أبيض خبط على الباب، وبيقول للدكتور ممكن أدخل ولا مش فاضي دلوقتي، رد عليه وقاله اتفضل يا نادر يابني... دكتور ماجد بضلي وقالي عارفة مين دا رديت عليه وقولتله لا هعرف منين قالي دا ابني نادر دكتور قلب قولتله ربنا يخليهولك، لاقيت الدكتور ماجد غمز لنادر والممرضة، بس مفهمتش هو بيبصلهم كدا ليه .
"نادر قرب مني"
-بتشجعي الأهلي ولا الزمالك
= الزمالك طبعاً .
- ليه كدا ليه، عارفة لو كنتِ قولتي الأهلي كنت هجبلك حاجة حلوة .
= حضرتك شايفني طفلة صغيرة .
- اه شكلك باين صغير .
= لا أنا مش صغيرة .
- عندك كام سنة طب .
= 22
- عاوز اقولك حاجة
= اتفضل
- إنتِ، إنتِ جميلة أوي على فكرة .
= حضرتك بتتريق عليا !
- لا مش بتريق انتِ فعلاً جميلة .
ابتسملي وقالي بصي على دراعك كدا
بصيت على دراعي لاقيت الكالونة متركبة فيه والمحلول شغال
= اي دا انت ادتهالي امتى أنا ازاي مخدتش بالي .
رد دكتور ماجد وقال :
- قولتلك الموضوع سهل مش صعب أوي زي ما انتِ فاكرة إن شاء الله هنتظم ع المحلول دا خمس أيام ونعمل تحليل انيميا نشوف اتغيرت النتيجة ولا لأ بس في خلال الخمس أيام دول مش أنا اللي هتابع معاكي لإني مسافر ايطاليا عندي مؤتمر هناك الممرضة هتابع معاكي ونادر هيبقى يجي يمطن عليكي
مانكرس اني زهقت من القاعدة في المستشفى رغم اني مكملتش فيها كام ساعة مفتقدة وجود ماما لما كانت بتطمن عليا قبل ما أنام، وحضن بابا ليا لما يحس اني خايفة وضحكة ايمن اخويا اللي بحبهاـ لاقيت بابا بيرن عليا مكالمة فيديو حطيت الطاقية على دماغي وفتحت لاقيت ماما وبابا وايمن قاعدين على الكنبة وبيقولولي .
- وحشتينا يا ياسمينا في البيت .
عيطت وقولتلهم
= وانتوا كمان واحشني والله عارفين لسه كنت بفكر فيكوا دلوقتي بس مكنتش عاوزة اتصل لا تكونوا نايمين
رد بابا وعنيه مدمعة :
- أنام ازاي من غير ما اطمن على حته مني يعني، قوليلي بقى عملتي اي النهاردة احكيلي .
= الدكتور كويس جداً بس الصراحة تعبتوا معايا عقبال ما حطلي الكالونة قال إنه هيسافر ايطاليا والممرضة والدكتور نادر ابنه هيتابعوا معايا الأيام اللي مش هيكون موجود فيها .
- إن شاء الله العلاج هيجيب نتيجة وتبقي أحسن أنا جايلك بكرا يلا نامي بقى تصبحي على خير .
= وانتَ من أهله يا بابا .
قفلت مع بابا والساعة كانت 11 بليل اتخنقت من القاعدة لوحدي دماغي هتنفجر من كتر التفكير، كان نفسي علي ف الوقت دا يكون موجود معايا يطمني، سمعت صوت حد بيخبط على الباب وانا قاعدة خايفة مين بيخبط في الوقت دا.. قومت ووقفت جمب الباب أنا مرعوبة وقولت مين اللي بيخبط
- انا يا آنسة ياسمين
= مين انتَ !
- نادر ابن الدكتور ماجد
فتحتله
= هو حضرتك لسه مروحتش .
- لا كان عندي حالات كتير النهاردة ولسه مخلص فقولت أطمن عليكي قبل ما أروح انتِ كويسة
بصيت في الأرض وأنا عيني على تكة وهعيط قولتله
= اه اه أنا كويسة
- متأكدة
- اه يا دكتور
ابتسم وقال :
- طيب بلاش دكتور دي، قوليل يا نادر بس
= لا مينفعش انتَ دكتور كبير اقولك نادر من غير حاجة ازاي
- انتِ عارفة عندي كام سنة طب
= كام ؟
- أنا عندي يا ستي 28
= طلعت صُغنن خالص
مسك الكرافتة بتاعته وقال
- طبعاً مش باين عليا ولا اي
= لا باين يا دكــت...
قاطعني وقال :
- احنا قولنا اييه
= يا نادر
- ايوا كدا، همشي انا بقى يلا تصبحي على خير .
=وانتَ من أهله
لسه هقفل الباب لاقيته رجع تاني
- أه نسيت أقولك
= تقولي اي
- بطلي تفكير التفكير، لإن الضغط النفسي له تأثير على اللي انتِ فيه دلوقتي .
ارتبكت وقولت
- بس أنا ... انا مش بفكر هفكر لي يعني
مش نادر، بس مامشيش الشعر اللي حسيته وهو موجود شعور حسيته اتجاهه مش قادره اوضح هو ايه بظبط فضلت استغفر ربنا واقول أذكار، لحد ما روحت في النوم ولاقيت بابا جالي الصبح وإستأذن من نادر إنه هايخدني ويرجعني آخر اليوم نادر إعترض في الأول قال إنه لازم أخد الجلسة النهاردة بابا قالوا هتاخدها ف معادها إن شاء الله بس هاخدها تشوف مامتها لإنها تعبانة ومش هتعرف تجيلها ونادر وافق، مشيت مع ابا وهو طول الطريق ماسك إيدي ومبتسم لاقيته راح على السوبر ماركت سألته رايح فين يا بابا قالي بتحبي الأيس كريم بالشكولاتة أكتر ولا فانيليا ؟ قولتله بس ليه
لاقيته راح جاب اتنين أيس كريم والكيكة اللي بحبها ورغم إني عارفه انه مالوش في الحلويات بس لاقيته بياكل أيس كريم معايا .
سألته وأنا مستغربة
= بابا هو مش حضرتك مش بتحب الحلويات
- كنت مش بحبها بس دلوقتي بحبها أعمل اي يعني .
- ماشي يا سي بابا .
فضلنا ماشيين لحد ما لاقينا عربية غزل بنات، بابا راح جابلي منها وبعدين وداني سينما بابا مالوش في كل دا ومع ذلك عمله عشاني روحنا البيت، بس واحنا ماشيين في الشارع الناس فضلوا يبصوا عليا في اللي كان بيضحك على شكلي وفي اللي بيتكلم بيقول يا عيني خاطبها سابها يوم فرحها عشان شكلها اتغير، كلامهم كان عامل زي السكينة على قلبي وبرغم كل دا بابا فضل ماسك ايدي ومبتسم دخلت البيت ماما وايمن كانوا في انتظاري سلمت عليهم ودخلت اوضتي فضلت اعيط بابا وماما فضلوا يخبطوا على الباب بس مفتحتش بعتولي ورقة من تحت الباب مكتوب فيها "بنحبك حتى لو بقيتي قردة" طلعت وحضنتهم جامد
ماما قالت :
- إقلعي الطرحة دي بقى انتِ حلوة من غير حاجة والله
- معلش يا ماما انا مرتاحة كدا .
فضلت قاعدة معاهم شوية، ماما أكلتني شوربة خضار وبطاطس مسلوقة وفضلت تتكلم معايا لحد ما بابا وداني المستشفى عشان أكمل باقي الجلسات .
نادر دخل وفضل يدردش معايا عشان يعلقلي المحاليل ولتاني مرة ماااحسش بيها غير بسيط لمجرد انه موجود سألني .
- حسيتي بحاجة .
= يعني شوية .
- اممم طيب ينفع نتكلم شوية
= في ايه
- فيه هو !
فضلت التفت حواليا ك نوع من أنواع الهروب من السؤال وقولت :
= هو مين
- انتِ عارفة أنا أقصد على مين
= وعرفت منين بقى ؟
الحزن باين على ملامحك وامبارح كانت عنيكي مدمعة وكنتِ على وَشك العياط بس مرضتش اسألك قولت استني لبكرا واهو جيه بكرا .
= لا أنا بس مش متعودة أنام بره البيت فَ كنت خايفة وأنا هنا لوحدي .
- برضوا مجاوبتنيش هو فين ! مش ممكن لما تفضفضي حالتك تتحسن اكتر مش يمكن اللي حصلك دا بسبب الضغط النفسي عشان كدا وقع شعرك ورموشك ؟
= محبنيش !
- عرفتي ازاي وامتى
- امتى ؟ يوم فرحي كان ناقص كام ساعة وابقى مراته لما اتحطيت في مِحنة زي دي ومالقتهوش لما وقع شعري وشكلي بقى متغير شوفت نظرة صدمة على وشه بسبب شكلي منو، لما قالي يلا نأجل الفرح لحد ما تتعالجي رغم انه كان بيحبني كان ممكن يتقبلني حتى لو اتقلبت قرد بس هو حب شكلي ومظهري محبنيش لذاتي يا نادر .
- بس ربنا أكيد له حكمة في انه يكشفلك حقيقته قبل فرحكوا بكام ساعة، ليكي حق تزعلي بس نَفسك لها حق عليكي نفسيتك لو اتحسنت شعرك هيرجع من تاني حاجات كتير اوي هتتغير .
لسه هرد على كلام نادر لاقيت النور قطع قومت من على السرير وفضلت ماسكة في ايد نادر ومتبته زي الأطفال الصغيرة
- اهدي بس مالك
= أنا بخاف من الضملة
- طيب أنا معاكي أهو متخافيش كنتِ عايزة تقولي قبل مالنور يقطع .
بصتله وقولت .
= اكتشفت فعلا إني نَفسي ليها عليا حق .
- طيب ممكن تسبيني
- اسيب ايه حد قالك اني مسكاك .
شغل الكشاف بتاع التليفون بتاعه وحطوا على ايدي
تسيبي ايدي من ساعة مالنور قطع وانتِ مسكاها انتِ هتصاحبيني .
اتحرجت وسبت ايده
- احم معلش مكنتش واخده بالي وبعدين ايه اصاحبك دي انتَ تطول
قام من على الكرسي وقال :
- أنا فعلاً ماطولش أنا ماشي بقى
قومت وقولتله بخوف
= استني ... انتَ رايح فين
- منا ماطولشي بقى
= مش كدا أنا .... أنا كنت بهزر مينفعش تمشي أنا لو قعدت لوحدي في الضلمة ممكن يحصلي حاجة .
- أنا مكنتش همشي والله انا كنت بناكشك
= هو ممكن اسألك سؤال
- اتفضلي
= هو انتَ محبتش قبل كدا !
- لأ
= بجد
- اه والله جايز تشوفيني غريب بس انا في خلال مراحل دراستي مكانش ليا اختلاط بالبنات كنت مركز في دراستي عشان أدخل كلية طب .
= وبعد ما دخلت طب وبقيت دكتور قلب محستش ان عاوز حد يشاركك تفاصيل يومك حد جمبك يدعمك !
- لأ ولا مرة، عمري ما حسيت بمشاعر حتى اتجاه حد، احكيلي هو الحب شعور حلو !
= مع الشخص الصح هايبقى حلو لكن لو مع الغلط هتكره حياتك أكيد .
النور رجع وهو بيبصلي ومبتسم وبيقول مبسوك اني اتكلمت معاكي، مشي نادر وشعوري اتجاهه كل مادا بيكبر انا تقريبا مابكونش مطمنه غير وهو موجود ولما مسكت ايده والدنيا ضلمت حسيت اني مابقتش خايفة انا محستنش الشعور دا قبل كدا مع علي، عدت الأيام ونادر بقى شخص قريب مني جداً بيجي كل يوم يركبلي المحلول ويطمن إذا كنت باكل كويس ولا لأ، ولما بكون مضايقة ويجي هو يقولي مالك تلقائي بلاقيني بقوله كل اللي حساه إلا السبب الرئيسي وهو اني... اني بحبه بس عارفه انه مستحيل تبقى في حاجة بينا النهاردة كانت الجلسة الأخيرة ليا وعملت التحاليل ونسبة الأنيميا بقت 13 كتبلي على علاج أمشي عليه وخلاص هروح بكرا مع بابا فضلت نايمة على السرير بعد ما ركبلي المحلول جيه بليل، وخبط يطمن عليا قبل ما يمشي بس مردتش عليه وعملت نفسي نايمة دخل وقالي انا عراف انك صاحية انتِ مش بتنامي دلوقتي أصلا
قومت وقولتله :
= أنا كنت بحاول أنام عشان مصدعة
بصلي وعنيه جواها كلام كتير
- كنت مصدعة بس
بصيت في الأرض لاني مبعرفش اتكلم مع حد وهو بيبصلي اطلاقا
- طيب بتبصي حوالين نفسك ليه ؟
= مش بعرف ابص لحد وهو بيتكلم
- طيب شكلك متضايق مالك دا انتِ حتى هتخرجي بكرا مش فرحانة ولا ايه .
= ما هي دي المشكلة اني همشي بكرا مكنتش عاوزة امشي احنا كدا مش هنتقابل تاني ومش هعرف لما اكون متضايقة أجري عليك زي الطفلة وحاجات كتير كدا مش هتتكرر انتَ فاهمني انا ملغبطة !
- ششششششش انا كنت جاي اتكلم معاكي في موضوع مهم !
= اتفضل
- فاكرة لما قولتليل محستش إنك عاوز حد يشاركك تفاصيل يومك حد جمبك ويدعمك
= اه وقولتلي لا ولا مرة حسيت بكدة
بصتله لاقيته بيتلفت حوالين نفسه زي ما يكون متوتر سألته
= انتَ بتبص حوالين نفسك لي شكلك متوتر
- مش بعرف أتكلم مع حد وهو بيبصلي .
فضلت أضحك حوالي عشر دقايق واقوله طيب بتقلدني ليه، فضل باصصلي قولتله .
= مش هتقول كنت عاوز تقول ايه .
هقول اهو
- احنا جايز مانعرفش بعض غير من اسبوع بس حسيت اني اعرفك بقالي كتير لما كنتي بتحكيلي حاجة مضايقاكي بكون مبسوط مش عشان متضايق لا عشان بتحكيلي جواكي طفولة وحنية مشوفتهاش في حد وبرغم اني محبتش قبل كدا الا اني معرفتش يعني حب الا معاكي وعاوز اتقدملك !
= ت ... ايه ؟
- اتقدمـــلك !
وشي احمر وحسيت اني مرتبكة اوي
- اعتبر كسوفك دا موافقة ولا اي
= أنا كمان حبيتك، بس مينفعش !
- مينفعش ليه ؟
بصيت في الأرض وانا عيني مدمعة في الأرض
= انا شعري لسه مطلعش ومش باينلي رموش انا شكلي بقى وحش حبيت فيا ايه !
- حبيت ملامحك حتى لو انتِ مش حباها، حبيت فيكي روحك الحلوة وطفولتك ودي لا الوفت ولا الأيام ممكن يغيروها.... ببساطة انتِ ي نظري اجمل بني ادمة في العالم .
نادر جيه اتقدملي هو وباباه ومامته وبابا وماما كانوا مرحبين بيهم جداً وفرحاننلي وحددنا معاد الخطوبة سنة .
طول السنة دي نادر دايما كان مساندني ولكن أنا زي منا لسه من غير شعر ورموش فضلنا نتنقل من مستشفى لمستشفى عشان نشوف حل للموضوع ومع ذلك كل مستشفى نروحلها يقولولنا نفس الكلام المرض دا غريب واحنا مش هنعرف نشخصه نفسيتي كل مادا كانت بتسوء وادعي كتير ارجع احسن من الأول وفي يوم فتحت الانستا لاقيت علي منزل صورة هو وخطيبته ابتسمت وحمدت ربنا، بقيت أنزل مستشفيات وبتبرع ليهم من فلوسي بقيت أحس بمعاناه كل مريض واضحك وبهزر ومع الأيام بقيت أربط على راسي طرحة حتى في البيت، اللي صبرني على كل دا حب أهلي اللي يخلي أي حاجة في الدنيا تهون
عدا 8 شهور وكان ناقص على فرحي بس شهرين صحيت من النوم وقفت قدام المرايا، خلعت الطرحة لاقيت شعري بيطلع مكنتش مصدقة نفسي قعدت أعيط من الفرحة مقولتش لحد خالص، نادر لما كان يجي البيت يطمن عليا كنت بكون لفة الطرحة مستنيا شعري كله يطلع عشان افاجئه، بعدها بدأت حواجبي تظهر ورموشي تطلع تاني في البيت ابتدو يلاحظوا دا ويقولوي ما تخلعي الطرحة دي بقى، وفعلاً خلعتها في البيت وبقيت أحس بكل شعرة بتطلع في راسي كأني بحقق انجاز مع اني كنت ابتديت اتأقلم على المرض بس لما شعري رجع فرحت أوي نعمة واحدة من نِعم ربنا علينا فعلاً لما راحت مني حسيت بنعم ربنا اللي لا تُعد ولا تحصى راحت مني الحكمة من عنده ورجعهالي بمشيئته برضوا من عنده وبعد مرور شهرين شعري كان طويل ورموشي رجعوا زي الأول حاسه اني بقيت أحلى من الأول فضلت محافظة على الصدقات اللي كنت بطلعها والتبرعات والمساعدات للمرضى بالعكس دا أنا زودتها أكتر .
النهاردة فرحي انا ونادر مش متخيلة ردة فعله لما يشوفني هيبقى عامل ازاي، ماما جت هي وبابا وحضنوني وقالوا .
- مش معنى انك هتتجوزي كدا خلاص كبرتي انتِ مهما كبرتي هتفضلي الطفلة بتاعتنا .
= ربنا يخليكوا ليا يارب .
بابا بصلي وهو مبتسم
- طيب يلا ننزل بقى عشان نادر مستنيكي تحت .
نزلت انا وبابا، وبابا ماسك ايدي عشان يسلمني لنادر، نادر أول ما شافني فضل فاتح بوقه ومش مستوعب ان دي انا بابا سلمني ليه وقاله
- بنتي امانه عندك انا مأمنك عليها اوعى في يوم تهمل الأمانة دي
نادر مسك ايدي وقاله
- دي في عيوني يا عمي
نادر فضل باصصلي وهو في حالة زهول وقال :
انتِ مين يا شاطرة فين ياسمين حبيبتي
= منا قدامك اهو يا نادر ولا ياسمين التانية كانت احلى مني
بصلي وقال :
- تؤ انتو الاتنين احلى من بعض
قرب مني وهمسلي بصوت واطي وقال :
- انتِ جميلة أوي على فكرة
ضحكت ومسكت ايديه وقولت
- حضرتك بتتريق !
- لا مش بتريق انتِ فعلاً جميلة .
اتجوزت نادر وحياتي بقت أحسن بكتير جايز ربنا عمل كدا عشان أعرف مين بيحبني بجد ومين بيحب حاجات زايفة ممكن تروح في لحظة وبرغم المعاناه اللي مريت بيها بحمد ربنا انه خلاني عرفت مين يستاهلني وبيحبني بجد ومين كان خسارة حتى أضيع ثانية معاه .
من يُحبك لأجل مظهرك الخارجي مؤكد سيرحل يوماً، أما من يُحبك لأجل روحك لن يرحل أبداً .
الروابط
آخر قصة : ليلة الإقتران
كاتبة قصة "المرض الغريب" : سمية خالد