طب هل في مخاطر صحية لو نسبته قلت عند الستات
أول حاجة بيحصل هشاشة في العظام لإن الاستروجين بيساعد في الحفاظ على العظام ، عن طريق إنه بيمنع فقد الكالسيوم ، طيب لو الاستروجين قل يبقى الكالسيوم قل ، ممكن الست هنا تتعرض لخطر الإصابة بكسر في العمود الفقري أو كسر في باقي عظام الجسم
طب يا ترى مين أكتر الستات اللي بتكون عرضه لكدا ، الستات اللي بتشرب الكحوليات بشكل منتظم او اللي بيدخنوا ، الستات اللي مثلًا بيكونوا رفيعين شوية واللي عندهم تاريخ عائلي بالإصابة بهشاشة العظام ، وبيحصل كمان عند الستات اللي سنهم فوق 40 سنة في فترة ما قبل انقطاع الطمث ، لإن الجسم هيستمر في انتاج استروجين وكل فترة النسبة هتقل وتتباطئ لحد ما توصل لسن اليأس .
والجسم بعدها بيتوقف تمامًا عن انتاج الاستروجين ، غير كدا كمان لما نسبة الاستروجين بتقل في الجسم بنلاقي السنات أكثر عرضه للإصابة بأمراض القلب ، ودا بيحصل عن طريق ارتفاع نسبة الكوليسترول الكويس في الدم ، فبعد الدورة الشهرية متنقطع تمامًا هيزيد خطر الإصابة بأمراض القلب بشكل كبير جدًا .
طيب العلاج هنا بقى هيكون بالهرمونات البديلة ، العلاج بالهرومونات البديلة بيقلل بعض أعراض انقطاع الطمث ، لإن العلاج هنا بيكون عبارة عن هرمون البروجسترون والاستروجين ، فالعلاج التعويضي ممكن يساعد الست انها تقي نفسها من هشاشة العظام ، بس ممكن يزود خطر الإصابة بحاجات تانية زي أمراض القلب وسرطان الثدي والجلطات الدموية والسكتات الدماغية ، يعني من الآخر كدا مش كل الستات بتكون محتاجة لعلاج تعويضي لهرمونات يعني لازم الست الأول تتكلم مع الدكتور بتاعها عشان تعرف هل الموضوع دا ممكن يكون مناسب لحالتها ولا لأ .
وقبل متاخد أي حاجة لازم الأول تسأل عن الأعراض يعني تسأل عن المخاطر الصحية اللي ممكن تحصلها لو خددت حاجة زي دي من نفسها ، فالعلاج هنا ممكن يكون طويل الأمد ، حتى بعد ما المستوى يرجع طبيعي زي ما كان بس الفرق هنا إن العلاج هيكون بنسبة مختلفة عن بداية العلاج ، طيب احنا لحد دلوقتي اتكلمنا عن المخاطر الصحية اللي ممكن تحصل للستات لو نسبة الاستروجين قلت في جسمهم ، طب لو زادت بقى ...
نسبة الاستروجين لو زادت هيحصل ايه
لو نسبته زادت في الرجالة عن المعدل الطبيعي هيحصل تضخم في خحم الثديين ، أو اللي بنسميه التثدي ، لإن هيكون في تحفيز في نمو أنسجة الثدي وهيحصل كمان ضعف الانتصاب ، وأحيانًا ممكن يسبب العقم ، لإن الاستروجين بيكون مسؤول بشكل جزي عن تكوين حيوانات المنوية صحية ، فلما يحصل زيادة فكمية الاستروجين في جسم الرجل هنلاقي نسبة الحيوانات المنوية هتكون أققل ، فبالتالي هتحصل مشكلة في الخصوبة فالعلاج هنا هيكون عن طريق بعض الأدوية أو عملية جراحية ، أو عن طريق نظام غذائي في دهون أققل وألياف أعلى .
نرجع بقى للبنات أو الستات ، ايه هي العوامل اللي ممكن تأثر على مستواه في الجسم ، من الحاجات اللي هتأثر على مستوى الاستروجين في الدم هي ( الحمل - نهاية الرضاعة - وسن البلوغ - سن اليأس - كبار السن - السمنة أو زيادة الوزن - أو لو كانت الست متبعة نظام غذائي صارم - بعض الأدوية المنشطة أو الأدوية اللي بيكون فيها هرمون الاستروجين او تتراسايكلين أو فينوثيازين - أو لو كانت الست بتعاني من ضغط دم عالي أو مرض سكر أو قصور في المبايض أو بتعاني من مشاكل في الغدة النخامية - أو لو في تكيس في المبايض - أو أورام - أو مشاكل في الغدة الكظرية ) .
طب هل بيتم استخدام هرمون الاستروجين في منع الحمل ، حبوب منع الحمل بيكون فيها إما الاستروجين أو البروجستين صناعي أو بروجستين بس ، طب ازاي هو هرمون أنثوي وفي نفس الوقت بيمنع الحمل عن طريق أنه بيوقف عملية الإباضة عن طريق إنها بتخلي المخاط الموجود في عنق الرحم بيكون سميك جداً ، فبالتالي مفيش أي حيوان منوي هيقدر يوصل البويضة .
العلاج الهرموني الي اتكلمنا عليه من شوية بيكون موجود على شكل حبوب أو رزاز للأنف ، أو جل جلدي أو حقن أو كريمات مهبلية ، فبنلاقيه بيساعد في حالات الجفاف المهبلي ، والقلم اللي ممكن يحصل أثناء الجماع والتقلبات المزاجية العنيفة واضطرابات النوم .
فتقريبًا بيعالج كل الأعراض اللي اتكلمنا عنها من شوية ، لإنه بيظبط نسبة الاستروجين في الجسم ولازم نعرف إنه مش كل الأعراض اللي الحالات محتاجة علاج بالهرمونات ، ولازم يكون تحت اشراف الأطباء ، لإن كل حالة بتختلف من ست لتانية ، اللغبطة الهرمونية اللي ممكن تحصل لأي ست بتكون حاجة طبيعية تمامًا .
لإن اللي بتمر بيه ساعتها من دورة شهرية لحمل ولولادة كل دا بتكون حاجات مش سهلة ، فأول متحسي بتعب أو لغبطة في جسمك لازم فورًا تتابعي حالتك مع طبيب علشان تاخدي العلاج المناسب .
أي حد فينا لما بيتعور تعويرى بسيطة أو بس يلاقي منظر الدم في ايده بيلاقي نفسه لا إراديًا خايف ومرعوب ، ما بالك بقى من اللي بتشوف الدم بيخرج من جسمها كل شهر وكأنه حاجة عادية ، احنا كرجالة عمرنا ما قدرنا حجم المعاناة اللي الستات بيعانوها وساعات بنلاقي نفسنا مش عارفين السبب اللي ممكن يخلي واحدة تتعصب من أققل من غير ما يكون في أي سبب مبرر للعصبية دي كلها ، اتمنى نكون دلوقتي عرفنا السبب واستفدنا بالمعلومات الترفيهية دي .
(شـــابووووه للـــســـتـــات)
