كــوكــتــيــل قــصــص
Founder
أحيانًا واحنا قاعدين مركزين في الإمتحان أو بنفتكر حاجة مهمة جدًا يقوم عقلك رادد عليك "وسع يلاااا البابا جييه" ، وتلاقي نفسك بتقول لعقلك فين إجابة السؤال يكابتن وتحاول تهرب من أغنية وسع يلااا وتركز في السؤال كويس ، لغاية متفتكر اجابة السؤال لكن بصعوبة شديدة .
الموقف اللي بتمر بيه دا بقى تقريبًا مفيش حد مننا ممرش بيه ، طول عمرك بتركز في حاجة معينة وفجأة تلاقي عقلك عرضلك فاصل اعلاني عبارة عن جملة معينة أو أغنية معينة ويفضلوا يتكرروا باستمرار ولازم نفضل نسمعهم شوية لحد ما الفقرة تعدي ، وبعدين نبدأ نكمل حياتنا ، والسؤال اللي بيطرح نفسه هنا بقى يا ترى اللي بيحصل دا بيحصل ليه ؟! .
1 - ليه أحيانًا في جملة أو أغنية بتتكرر في دماغنا
في البداية كدا خلينا نقول إن احنا مش لوحدنا ، أكتر من 90% من البشرية بيعانوا من الظاهرة دي ، وكتير منهم بتتكرر معاهم مرة كل اسبوع على الأقل ، لكنها في الغالب بتحصل في الأوقات اللي مبنكونش محتاجين نركز فيها أوي يعني ، مثلًا واحنا بنغسل أسنانا أو واحنا مستنيين ماية الشاي تغلي واحنا مستنيين اتوبيس الصبح عشان نروح الشغل وحاجات من دي .
الظاهرة دي واحدة من أكبر الألغاز المحيطة بالبشر ، وكتير من العلماء كانوا عاجزين تمامًا عن تفسير اللي بيحصل دا ، نفتكر وازاي في جملة أو نغمة تقدر بسهولة تعلق مع بني آدم وتفضل تتكرر طول الوقت ، اللي حصلك في الإمتحان دا ليه اسم علمي وهو "الموسيقى اللاارادية" أو "متلازمة الأغنية العالقة" ، واشهر اسم مشهور بالحالة دي هو دودة الأذن أو الاير وورم .
دودة الأذن بتعتبر مثال واضح للصور الذهنية ، والصور الذهنية بتنقسم لشقين
- صور مرئية
- صور سمعية
الصور المرئية : زي لما تغمض عينيك وتتخيل شكل عربية فيراري لونها أحمر وتحس انك شايفها بالفعل ، حتى وانت مغمض عينيك .
أما بقى الصور السمعية : هي موضوعنا النهاردة ، وهي لما تبدأ تتخيل مجموعة من الأصوات مش موجودة حواليك دلوقتي ، ودودة الأذن تعتبر واحدة من أنماط الصور السمعية ، لكنه نمط خاص شوية واقف ، والسبب في كدا هو انها بتكون غير ارادية تمامًا ، وبتتطفل على ذهنك بدون أي انذار أو تنبيه ، انت ولا بتستعديها ولا بتحاول تفكر فيها بتيجي لوحدها كدا وخلاص وبعد ما تيجي مبترضاش تمشي غير بطلوع الروح .
ومن أشهر مميزاتها انها قادرة على انها تتكرر بصورة لا نهائية يعني تبقى لسه سامع نغمة عشوائية فودانك ماتعرفش جيالك منين وما صدقت إن هي وقفت تلاقي الأستاذة (دودة الأذن) بعتتهالك تاني بنفس الثبات وكأنها مبعتتهاش قبل كدا ولا سمعتها والسؤال هنا بقى .
2 - ليه في اغاني أو جمل معينة هي اللي هتثبت في الذاكرة دونًا عن غيرها
إجابة السؤال دا بتعتمد في الأساس على الشخص نفسه هويته وذكرياته وشخصيته ، بالإضافة كمان الظروف المحيطة بيه وحالته المزاجية ، لكن يا ترى الكلام دا معناه ايه ، خلينا نوضح بمثال ...
انت في يوم عاي في الشغل والمدير نده عليك واداك مكافأة ونفسيتك في اليوم دا بقت عال العال ، بمجرد ما طلعت من أوضة المدير قابلت صاحبك اللي موبايله كان بيرن على أغنية معينة ، بس كدا الأغنية دي بقى اللي انت سمعتها هتلاقي نفسك كل ما تكون في شعور مماثل للي حسيت بيه يوم المكافأة ، الأغنية هتقوم مقتحمة حياتك وتفضل تتكرر بصورة مستمرة .
وبالإضافة لموضوع الحالة المزاجية الباحثين بيقولوا إن في نوع من الأغاني والجمل بتثبت أكتر من غيرها ، وفي الغالب الأغنية دي بتكون ذات نغمة طويلة ومرتبة وكلامتها سهلة وقريبة من بعضها ، وأكبر مثال على صحة الكلام دا والكلام دا يعرفوا أي حد عنده أطفال ، هي الأغنية الملعونة "بيبي شارك" واللي تقريبًا اللي معلقة مع نص البشرية ، تبقى ماشي في أمان الله في شقتك والهيبة واخدة حقها ، وفجأة تلاقي أغنية بيبي شارك دودو دودو شغالة في دماغك .
3 - طب اي بقى الأسباب اللي تخلي أغنية أو جملة معينة تعلق معانا ، طب ليه بقى التكرار دا ، ليه دودة الأذن موجود من الأساس
عدد كبير من العلماء بيرجح إن موضوع التكرار دا بيحصل بسبب تأثير "زيجارنيك" أو Bluma Zeigarnik ، واللي تمت تسميته كدا نسبة إلى عالمة النفس السوفيتية والطبيبة النفسية Bluma Zeigarnik ، واللي أكدته زيجارنيك إن لما شخص بيبدأ في أي مهمة ، ولنفترض مثلًا إنك قررت تذاكر لقدر الله فصل معين من مادة العلوم ، لو حصل وما انهتش المهمة دي وقررت انك تتجاهلها .
هتلاقي أفكار المهمة لسه ما خلصتهاش ، عمالة تظهر في ذهنك كل شوية وحتى لو كنت بدأت في مهمة جديدة بالفعل هتفضل أفكارك تقولك على فكرة انت لسه مخلصتش مذاكرة الفضل إياه ، وهكذا طول اليوم وانت عامل نفسك مش سامع ولما يجي بقى ميعاد نومك يبدأ الشعور بالندم يشتغل عليك .
انت عايز تنام وانت ماخلصتش اللي وراك اخس ، ومش بعيد كمان تلاقي صفحات الفصل اللي انت لسه مخلصتوش بتراودك في أحلامك ، لكن بقى لو كنت كملت المهمة اللي وراك زي البني آدمين فاللي كان هيحصل وقتها إن عقلك هيتخلص من الأفكار دي وكأنها لم تكن ، وبلوما زيجارنيك لاحظت دا من خلال متابعتها للأشخاص اللي بينزلوا طلبات في المطاعم .
الويتر اللي في المطعم لما الزبون بيطلب منه طلب معين بعد ما بينزل الطلب على الترابيزة بينسى الطلب دا تمامًا ، ويفكر في حاجة غيره لكن طول ما هو لسه مانزلهوش ، الطلب بيفضل في دماغه وبيفضل فاكره ودا خلاها تستنتج إن المهمة طول ما أنا لسه فيها ومكملتهاش بتتكرر ، لكن بمجرد ما اتخلص منها ما بتتكررش ، طب الرغي دا بقى كله ايه علاقته بدودة الأذن والأغنية اللي بتعلق معانا .
بص يا سيدي نفس اللي حصل مع الفصل اللي انت لسه مخلصتوش ونفس اللي حصل مع الويتر لسه ما نزلش الطلبات ، هو نفس اللي بيحصل مع الأغنية اللي بتسمعها في أي مكان ، الأغاني اللي بتبقى عالقة في الذهن دي احنا في الغالب ما بنكونش حافظين منها إلا مقطع أو مقطعين ، وبالتالي العقل بيبدأ يعملها على إنها مهمة غير مكتملة وبناءً عليه بيبدأ يعرضهالك مرة بعد مرة علشان تكملها .
لغاية هنا خلصنا جزئية السبب في تكرار أغنية معينة في دماغنا ، طب لو حبيت تكمل وتعرف تتخلص من موضوع تكرار الأغاني ازاي ، دوس على زرار "التالي" تحت على الشمال وكمل المقالة .
↚
طب دلوقتي ازاي نتخلص من الدوشة دي
قبل ما نجاوب على السؤال دا لازم ننوه إن دودة الأذن مش حاجة مضرة على الإطلاق ، على العكس حوالي أكثر من 70% من البشرية لما اتسألوا عن شعورهم تجاه ديدان الأذن ، أكدوا انهم بيستمتعوا بيها أو على الأقل مش مهتمين بوجودها ، لكن لو انت من القلة اللي عايزة توقف الموضوع دا عشان صدعت .
فبعض الدراسات اقترحت عدد من الحلول ، ومن أغرب الحلول دي انك تاكل لبان ايوة والله واثبتوا فعلًا انها بتقدر بطريقة معينة تتداخل وتطل بعض عمليات الدماغ وتقدر توقف أي شيء بيتكرر ، وكأن اللبانة نفسها نوع من التشتيت وإلهاء .
وفي عام 2012 مجموعة من الباحثين النفسيين من جامعة واشنطن ، أجروا تجربة بغرض معرفة الطرق اللي بتفضي على تكرار النغمات في الدماغ ، والطرق دي اعتمدت على الإلهاء لكن من خلال الألغاز ووفقًا للدراسة اكتشفوا إن حل الألغاز اللي زي السودوكو والكلمات المتقاطعة ، ساعد بشكل كبير بإن الأغاني اللي اشتغلت دي ما تعلقش في الدماغ ، لكن المدهش بقى مش كل الألغاز قدرت تعمل دا .
الألغاز السهلة جدًا والصعبة جدًا الاتنين سمحوا للأغاني إنها تعلق في الدماغ ، لإن السهلة جدًا محتاجتش مجهود في حلها ، وبالتالي دورها مكنش مؤثر ، والعصبة جدًا مجرد ما كان الشخص بييأس من حلها بيبدأ عقله بدور على حاجة تانية يلهي بيها نفسه ، والحاجة دي بتكون المقطع المتكرر في الدماغ ، وهو دا اللي بنتعرضلوا لما بنكون في امتحان ومركزين بزيادة وخصوصًا لو الإمتحان كان صعب .
القائمين على كدا بقى حاولوا يعرفوا ، هل الألغاز اللي فيها أرقام زي لعبة السودوكو او اللي فيها حروق زي الكلمات المتقاطعة ، مين فيهم مؤثر على الأصوات اللي بتتكرر
المدهش انهم اكتشفوا إن ال sodoko سواء سهلة أو صعبة ما بتكونش مؤثرة كبيرة في أبعاد الأفكار ، في حين إن الكلمات المتقاطعة تأثيرها كان أكبر ولما حاولوا يحددوا السبب قالوا إن الأغنية اللي بتيجي في عقلنا بيتم التعامل معاها على إنها كلمات ، ولما بييجي وقت حل الكلمات المتقاطعة الدماغ بيستخدم نفس الموارد اللي كان مستخدمها في تكرار الأغنية ، عشان يحل الكلمات المتقاطعة .
ودا بيخليه يطرد الأغنية اللي عماله تتكرر علشان يبدأ يحل لغز الكلمات المتقاطعة ، ولو دودة الأذن ماسكة دماغك ومش عايزة تسيبك ومعكش ألغاز تحلها ، ممكن ببساطة انك تلجأ للقراءة زي منت بتعمل دلوقتي كدا ، أو اقرأ أي حاجة موجودة حواليك لمدة .
دقائق القراءة عادة بتقوم بنفس الدور اللي بتقوم بيه الكلمات المتقاطعة ، لإنها هي كمان كلمات ، وفي النهاية خلينا ننوه إن ذكرنا للأغاني في المقالة دي على سبيل المثال وعلشان دي أكتر حاجة بتتكرر مع الناس ، مش إن إحنا بنشجع على سماع الأغاني .
وكدا جاوبنا على ايه سبب تكرار الأغاني في دماغنا | لعنة الأغاني .
