 |
| الذكر وفضله |
الذكر وفضله ، اسمك فعلًا هيتذكر حول عرش الرحمن ، يعني أنا اسمي هيتقال عند عرش ربنا ، هقولك ايوا ، طب أعمل ايه عشان اسمي يتذكر عند ربنا وربنا يسمعني .
هقولك الذكر ، الذكر دا أهم حاجة وأسهل حاجة تكسب بيها ثواب يعني انت قاعد ماشي مروح راكب مترو تاكسي عربيتك تذكر ربنا .
طب أقول ايه عشان أذكر ربنا ، فهمني يجدع أنا معلوماتي على قدي .
هقولك أصبر بس ، وتعالى الأولى أقولك كبسولة معلومات عن الذكر .
أهمية الذكر
- أول حاجة هيبعد عنك الشيطان .
- هيخليك دايمًا مبسوط وسعيد ، وهيصرف عنك الحزن والهم .
- هيزود رزقك .
- هتحب ربك أكتر وهتقرب منه أكتر وأكتر .
- هتخليك دايمًا مراقب ربنا في كل حته ، يعني شوفت حاجة عجبتك هتقول سبحان الله ، ودا هيوصلك لمرتبة الإحسان .
- وأهم ما يميز الذكر إن ربنا هيذكرك ,
- ولو ربنا ذكرك يبقى هتلاقي قلبك نزل عليه رحمة وسكينة عمرك مكنت تتوقعهم .
- الذكر كفيل يدخلك الجنة .
- وبتكون سبب في رحمة ربنا عليك بينه وبين ملائكته .
- والذكر بيحفظك من نسيان ربنا سبحانه وتعالى .
- وطبعًا هتكسب أجر عظيم وثواب ، غيرك مكسبوش في أعمال تانية .
مراتب الذكر
طبعًا لكل واحد مرتبة في الذكر ، زي كدا الرتب يعني في واحد منتظم في الأذكار ، وواحد نص نص ، وواحد كل فين وفين ، وهنا هرتبلكم مراتب الذكر بكل اختصار وبساطة .
♦ اول مرتبة ذكرك لله سبحانه وتعالى ـ عند أوامره ونواهيه ، وانك تكون ملتزم بأوامره وفرائضة .
قال تعالى : "قد أفلح من تزكى ، وذكر اسم ربه فصلى"
قال تعالى : " وأقم الصلاة لذكري"
يعني بمجرد صلاتك كدا انت ذكرت ربنا .
♦ تاني مرتبة ، إنك تبعد وتنهي نفسك عن المحرمات اللي ربنا فرضها علينا ، وانك بتسيب المحرمات دي خوفًا من ربنا سبحانه وتعالى .
قال تعالى : "وأما من خاف مقام ربه ونهى النفس عن الهوى ، فإن الجنة هي المأوى" .
♦ تالت مرتبة ، وهي إنك تذكر ربنا بالقلب واللسان ، بس ذكرك ربنا بقلبك ولسانك ليه عدة مراتب :
- أول مرتبة وأعلى مراتب في ذكر الله باللسان والقلب ، إنه يكون الذكر دا نابع من قلبك ( تعظيمًا لربنا ، وحبًا فيه ، وخوفًا من عذابه ) فيكون هنا كدا أصل الذكر طالع من قلبك بعد كدا لسانك .
- تاني مرتبة إنك تذكر ربنا بلسانك بعد كدا قلبك ، ودا بعد متتفكر في معاني الأذكار دي وتتأمل فيها .
- وتالت منزلة ويعتبر دي أدنى مراتب الذكر لله سبحانه وتعالى ، هي ذكر العبد لربه بلسانه فقط ، وميستحضرش قلبه ، فياخد ثواب على ذكره فقط .
أفضل الذكر الذي يحبه الله
طبعًا أفضل الأذكار هو "القرآن الكريم" ، طب أفضل الذكر بعد القرآن الكريم ، هو " لا إله إلا الله وحده لا شريك له ، له الملك وله الحمد وهو على كل شيء قدير ، لا إله إلا الله وحده " .
ويقال أيضًا أن أحب الأذكار إلى الله سبحانه وتعالى "سبحان الله وبحمده" .
أذكار يمكنك حفظها وترتيلها ( قولهم من قلبك واكسب أجر وثواب معايا )
- سبحان الله .
- الحمد لله .
- لا إله إلا الله .
- الله أكبر .
- سبحان الله وبحمده .
- سبحان الله العظيم .
- لا حول ولا قوة إلا بالله .
- استغفر الله وأتوب إليه .
- اللهم صل وسلم على نبينا محمد .
- لا إله إلا الله وحده لا شريك له ، له الملك وله الحمد وهو على كل شيء قدير .
- حسبي الله لا إله إلا هو ، عليه توكلت وهو رب العرش العظيم .
- اللهم اجعلني من التوابيين واجعلني من المتطهرين .
- لا إله إلا أنت سبحانك إني كنت من الظالمين .
- اللهم قلبي ومن بقلبي .
- اللهم نورك إذا حلت الظلمة ، اللهم نجني من عذابك يوم يبعث عبادك .
اللهم اغفر لي ولمن اغتبته وظلمته واسأت إليه ، اللهم تجاوز عنا وعنه .
- رضيت بالله ربا وبالإسلام دينا وبمحمد صلى الله عليه وسلم نبيا .
- اللهم ارزقني حبك ، وحب من يحبك ، وحب عملا صالحًا يقربني إلى حبك .
- اللهم اقضي حوائج كل من وكلني لدعائك .
طب فاكر فوق قولتلك اسمك هيتذكر حول عرش ربنا لو واظبت على الأذكار ، الموضوع دا بقى مش هكتب عنه ، بس هسيبكم مع فيديو لأمير منير :
فيديو آخر : من هنا
