ارتباط قصر البارون بظهور عبدة الشيطان
 |
| قصر البارون |
أول مكان في مصر تحصل فيه طقوس لاستحضار وعبادة الشيطان، و في يوم من الأيام بليل مجموعة من الشباب والبنات خدوا بعضهم وراحوا هناك وبدأوا انهم يرتلوا تراتيل للشيطان بصوت عالي جدا ومسموع لدرجة إن مجموعة من الجيران بلغوا عنهم، وبالفعل اتقبض عليهم والموضوع تحول لقضية رأي عام.
قصر البارون المشهور والمعروف جدا و اللي إنت أكيد سمعت عنه، حتى لو متعرفش القصص اللي اتقالت عليه ولا الجرائم إللي حصلت جواه واللي لحد النهاردة مش عارفين مين هو السبب وبيتقال إن اللي وراها كلها كيان شيطاني.
في نهاية القرن 19 وبعد الافتتاح بتاع قناة السويس بوقت قصير جدا، البارون إدوارد إمبان وصل مصر وقتها البارون اندهش بجمال مصر وبالحضارة بتاعتها، وقرر إنه يكمل حياته فيها وكتب في الوصية بتاعته إنه يندفن فيها كمان، وشخصية عامة زي البارون اللي كان معروف وقتها إنه أشهر مهندس في أوروبا كلها. كان لازم يبني مكان يناسب المكانة بتاعته وإنه يقدر يعيش فيه.
وبالفعل بناء قصر وخد منه تقريبا خمس سنين شغل على ما يجهز فيه وحب البارون إنه يبني القصر بتاعه كله على الطراز الهندي وكمان حط فيه تماثيل لآلهة الهنود زي "شيفا او بوزة وبرهما" والسبب إللي خلى البارون يعمل كده إن في عز شبابه اتصاب بمرض خطير جدا وكان خلاص هيموت.
ولكن الهنود لحقوه وأنقذوا حياته عشان كده ملا القصر بتاعه بالتماثيل بتاعتهم، وطبعا حاجة زي كده في أراضي مصر تعتبر غريبة ولكن مش أغرب من اللوح اللي هو كان حاطتها في القصر عشان كان في لوح كثيرة جدا فيها رسومات غريبة أو زي ما تقول رسومات شيطانية.
عمليات البناء خلصت وإنتهوا منه سنة 1911، والقصر اتصمم إن الشمس تدور حواليه طول النهار ، الشمس بتوصل لكل ركن موجود في القصر ده، وده بسبب إنهم استخدموا في القصر ده العاج والمرمر والزواج البلجيكي، المبهر بقى في القصر ده إنه اتبنى فيه برج والبرج ده تحتيه قاعدة متحركة وبتخلي إللي قاعد في القصر يشوف المكان من كل الزوايا بتاعته، أنا عاوز أقولك إن القصر ده فيه تحف فنية نادرة جدا ما فيش منها في العالم غير في الأماكن الملكية اللي موجودة في لندن بس.
وكل دا كوم واللي جاي كوم تاني خالص، أنا هحكيلك على أوضة موجودة في القصر ده الأوضة دي كانت السبب في هلاك كل الموجودين فيه، الغرفة الوردية أو زي ما بيسموها غرفة المرايات، الأوضة دي اتعملت تحت القصر وكانت عبارة عن أوضة عادية ولكن فيها مرايات ضخمة جدا والحطام بتاعتها عبارة عن مرايات أساسا.
البارون بنى الأوضة دي بنفسه وحرمها على أي حد موجود في القصر ممنوع منعا باتا أي حد غير البارون يخش الأوضة دي وطلع كلام من خدم القصر إن البارون بيمارس طقوس عبادة الشيطان جوا الأوضة دي وإنه ساعات بيخشها ومش بيطلع غير بعد ساعات طويلة جدا وإنه وبيحضر أرواح جوا الأوضة دي.
اركن بقى الأوضة دي على جنب بس خليك فاكرها كويس وتعالى أما اكلمك شوية عن الإفتتاح إللي اتعمل عن القصر ده لازم تكون حاطت في بالك إن الإفتتاح اللي اتعمل عن القصر ده عظيم جدا و الحدث الوحيد اللي اتوصف إن هو كان في مستوى فرح الأميرة قطر الندى إللي كان سبب في إفلاس خزينة مصر كلها.
انت متخيل كمية الفلوس اللي اتصرفت على الإفتتاح بتاعه ومش عاوزك تحقد عليه ولا تغير منه بسبب كمية الفلوس دي علشان هو أساسا متهناش بالقصر غير سنتين اتنين بس وده بسبب إن في حفلة الافتتاح السلطان (حسين كامل) كان موجود وقتها وشاف القصر وجماله وانبهر بيه جدا.
وطبعا حس بالغيرة عشان هو سلطان مصر وهو اللي له الحق وأولوية إنه يكون صاحب أجمل مكان في الدولة، ومن ساعتها بدأ يبعت مراسيل للبارون ويسأله إن هو لو حابب يبيع القصر فهو عاوز يشتريه، وفي كل مرة البارون كان بيرفض فيها ولكن بطريقة ودية لحد ما زهق وساعتها طلب من المرسال يبلغ السلطان إنه مش ناوي يبيع القصر ودا كلام نهائي.
ومن ساعتها بقى بدأت سلسلة من المضايقات إنها تحصل ما بين السلطان وما بين البارون وطبعا البارون مش هيقدر يعمل حاجة فقرر إنه ياخد أهله ويرجع لندن لحد ما عصر السلطان يخلص ويرجع هو يتهنى بالقصر بتاعه، وفعلا ده اللي حصل وتعدي السنين والسلطان يتوفى وقتها البارون قرر إنه ياخد عيلته تاني ويرجع ويعيش في القصر وده كان القرار إللي البارون ندم عليه طول حياته.
البارون كان عنده بنت اسمها (آن) الأيام كانت بتعدي وهم عايشين عادي في القصر ومحصلش أي حاجة. ولكن في يوم من الأيام (آن) بنته اتعرفت على واحدة اسمها (سيلفيا)، و(سيلفيا) دي كانت السبب إن عائلة البارون كلها تهلك وفأول التعارف بين (سيلفيا) وبنت البارون، (سيلفيا) اعطت سلسلة لبنت البارون وكانت عبارة عن صليب ولكن بالمقلوب.
وبالفعل لبستها وبدأت بقى الحاجات الغريبة إنها تحصل معاها، بنت البارون بدأت إن هي تلبس لبس اسود باستمرار ومبتقلعهوش، حياتها بدأت تتحول لدرجة إن الخدم كانوا بيسمعوها كل يوم بليل قبل ما تنام بترتل وتقول كلمات مش مفهومة وتصرخ صرخات متقطعة وكل ما علاقتها بسيلفيا بتزيد التصرفات الغريبة بتزيد أكتر.
البنت كانت بتجمع الكتب المقدسة وكان وتبدأ تقراها بالمقلوب جسدها وكانت بتأذي جسدها وبتعور نفسها وبتعمل التصرفات بتاعة عبدة الشيطان بالظبط، الموضوع تطور لدرجة إن بنت البارون بدأت تجيب سيلفيا وتجيب كمان صحابهم وينزلوا أوضة المرايات اللي البارون عاملها بنفسه.
ويبدأوا تحت يعملوا طقوس عبدة الشيطان ويقولوا التراتيل الغريبة بتاعتهم والمشكلة إن هما كانوا بيجيبوا قرابين لحيوانات وبيعملوا تصرفات غريبة جدا. وكانوا بيحاولوا إنهم يستدعوا الشيطان بنفسه، ومن هنا بقى بدأت الكوارث إنها تحصل جوا القصر.
وفي يوم من الأيام البارون بيفتح الأسانسير وبيتفاجئ إن مراته مخنوقة وميته جوه، المشكلة إنها كانت لوحدها ومش عارفين هي وصلت للحالة دي إزاي أساسا وبرضه بعد فترة قصيرة جدا البارون بيسمع صرخات شديدة جاية من أوضة أخته ولما يطلعلها يلاقيها رامية نفسها من الشباك.
الغريب إن كل الأحداث دي مش عارفين مين اللي وراها مفيش شخص مسؤول هو اللي عمل الحاجات دي، وللعلم دي كانت البداية بس علشان بعد الأحداث دي كان يعدي يوم والتاني وواحدة من اللي شغالين جوا القصر يموتوا وبرضوا سبب موتها بيكون مش معروف ومجهول للكل.
ست عاملات من اللي شغالين في القصر كلهم راحوا بطريقة مجهولة، وكمل عندك بقى اخوا البارون نفسه لقيوه في سرداب من السراديب وكان ميت برضه، هتسأل نفسك طب آن بنت البارون فينها من كل ده فهقولك إن بعد كل حادثة غريبة آن بتحاول إن هي تخلص على نفسها ولكن محاولاتها كانت بتفشل كل مرة.
وزي ما تقول كده كانت بتأنب ضميرها إن هي السبب ورا كل حادثة بتحصل من دي والغريب إن حالتها تدهورت جدا لدرجة إن هي كانت بتصرخ بطريقة هيستريا ومكنتش بتسكت غير لما بيدخلوها في أوضة المرايات ويقفلوا عليها، ساعتها بتهدا واستمرت حالة البنت بالطريقة دي لغاية ما فيوم من الأيام خلصت على نفسها.
الغريب بقى إن البارون كان عنده بنت صغيرة تانية، البنت دي بدأت تحصل معاها نفس اللي حصل لأختها، كانت بتصرخ بطريقة هستيرية ومكنتش تهدا غير لما يدخلوها أوضة المرايات ولما كانت بتهدا وخلاص بيطلعوها من الأوضة مكنتش بتردد غير جملة واحدة بس "صديقى كلمني وطمني وهو موجود جوا".
لحد ما في يوم من الأيام البنت دي إختفت من القصر وساعتها لقيوها موجودة على حافة بير، وكانت ملامحها مرعبة جدا ولكن كانت متوفية، أما بالنسبة للبارون فبيتقال عنه إنه بعد الأحداث دي كلها اتصاب بالجنون ونقلوه لبلجيكا لحد ما اتوفى سنة 1929 وعلى حسب الوصية إللي هو كان كاتبها إنهم رجعوه لمصر تاني علشان يندفن فيها وكده كل اللي في الأسرة خلاص راحوا.
ولكن المسؤول عن الكلام ده كله مهديش حتى بعد ما خلص عليهم علشان الأحداث موقفتش هنا، ودا بسبب إن سكان مصر الجديدة المجاورين للقصر ده كانوا دايما بيبلغوا الشرطة إن في حاجات غريبة بتظهر في القصر ده، كانوا دايما بيعرفوهم إنهم بيشوفوا خيالات وأطياف لمرات البارون وللمهندس إللي صمم القصر.
وبالمناسبة صحيح المهندس إللي صمم القصر ده بيقال إن البارون خلص عليه علشان ميعملش التصميم اللي عمله دا لحد تاني غيره، ده غير البلاغات الشديدة اللي بتيجي للشرطة بسبب النور اللي بينور فجأة في القصر، والمشكلة إنهم ساعات بلغوا إن في نار شديدة بتمسك في القصر، وأول ما المطاف بتيجي مابيلقوش النار دي.
وأبرز بلاغ حصل في الموضوع ده كان سنة 1982 وبسبب المشاهد دي والكلام إللي بيتقال على قصر البارون، ساعتها في مجموعة من الشباب قرروا إنهم يروحوا القصر ده ويعمل طقوس عبدة الشيطان، وساعتها كان أول ظهور رسمي لعبدة الشيطان في مصر والكلام ده كان سنة 1997، لما شوية الشباب دول راحوا القصر وقتها كانوا بيهللوا وبيصرخوا وبيعملوا الطقوس بتاعة عبدة الشيطان بصوت عالي جدا.
لدرجة إن في ناس سمعتهم وبلغوا الشرطة وبالفعل اتقبض على الشباب دي والموضوع ساعتها اتحول قضية رأي عام، خد عندك بقى إن سنة 2014 في فيلم مشترك اتعمل ما بين مصر وفرنسا وكان بيحكي عن قصة حياة البارون والحاجات اللي حصلت في القصر.
ولكن الغريب إن بعد ما الفيلم خلاص اتعمل وجاهز إنه يتعرض في دور العرض الفيلم منزلش، ولحد دلوقتي مش معروف إيه السبب إللي علشانه اتمسح وطبعا كل الأحداث إللي قلتلك عليها دي في اللي بيصدقها وفي اللي بيشكك إنها حصلت، طبعا الموضوع يرجعلك أنا مجرد سردتلك الأحداث اللي اتقالت عن القصر.
