قصة على العهد - قصص رومانسي | الكاتب : بــكــر مــحــمــد كاتب خبير
"أنا داخل دلوقتي واحتمال موضوعنا يتفتح فلو قولت كلام ميعجيكيش اعذريني على طبيعتي في الحكي" بعتلها الرسالة دي عشان أطمنها ودا شيء اتعودت عليه خلاص إني أشاركها تصرفاتي ولحد ما وصلت المكان ولطول الطريق أنا مكنتش بفكر غير فيها .
أول لما دخلت الاستوديو لاقيت العالم كله بيسقأفلي زي ما كنت متخيلة وحسيت بنظرات الفخر من كل اللي أعرفهم وبدأ المذيع يسألني عن إنجازاتي وأنا صغير وكنت دايمًا مستني الفرصة واحكي عنك كأهم إنجاز حققته لحد ما لقيت سؤاله بيرن في ودني لحد دلوقتي لما قال : احكيلنا عن منار عرفتها وشفتها ازاي ؟ .
لقيت نفسي بقول كلام كنت أول مرة أسمعه : منار هي اللي عرفتني وشافتني ومن خلالها خليتني أشوف نفسي ، من حوالي 7 سنين كدا كنت قاعد على القهوة وأمي كلمتني إنها جايبالي عروسة بنت ناس ومحترمة وأهلها ناس كرم وقالتلي اتعرف عليها جايز تعجبك عن اللي قبلها وأنا بحكم إني اعرفت على كذا بنت من طرف أمي وأرفضهم كان نسبة نجاح الموضوع دا شبه منعدمة لأن كل اللي كنت بقعد معاهم بيقعدوا يحكولي عن مهارتهم في تنضيف البيت وأرقامهم القياسية في سرعة الحب وتحضير الأكل وقد اي هي روتينية مبتتغيرش بس منار مكانتش كدا لما قعدت معاها ، أنا أصلًا مركزتش في كلها وهي بتتكلم لاني دايما بتكلم وانا باصص في الأرض بس اللي خلاني ابص عليها واركز في تفاصيلها لما لاقيتها سألتني أول سؤال وقالت : انت مهاراتك اي ولا بتعرف تعمل اي هيفيدني أنا كزوجة ؟ .
استغربت من السؤال بس قولتلها أنا موظف في البنك المتميز بقالي 5 سنين ، فقالت : أنا بسألك عن مهاراتك مش وظيفتك ، فلاقيتني ولأول مرة من بعد آخر علاقاتي في الجامعة بحكي عن طموحي وبقولها : أنا مسرحجي أكتر من 6 سنين وواخد جايزة أفضل ممثل سنين ورا بعض بس كل دا ميأكلش عيش .
- تقصد من كلامك انك ناوي تستخدم مهاراتك في التمثيل انك تضحك عليا ؟
= دا على حسب اضطراري للموقف لو احتجت .
- عمومًا عشان نبقى متفقين ، أنا الحاجة الوحيدة اللي بقدر أعملها بعيد عن شغل المطبخ والبيت اني بعرف أكتب فلو حابب الجوازة دي تكمل تدعمني في الكتابة زي ما أنا هقف جنبك في التمثيل .
= ودا اعتبره من ضمن القايمة ولا مؤخر الصداقة ؟
- اعتبرها هدية التعارف يا مؤمن .
ودي كانت أول مرة اسمع فيها اسمي وأحس بحاجات غريبة دا غير طبعًا انها كانت وش السعد عليا لإني أول ما سبتها جالي عرض في مسرحية علشان أقدم فيه دور ، ولحسن حظي كان من ضمن الحضور مخرج سينمائي هو اللي رشحني أقوم ببطولة مطلقة ، خطوبة سنتين وجواز لحد دلوقتي وعندنا آسر دلوقتي والحمد لله الدنيا كانت تمام لحد ما حصل حاجة مكانتش على البال خالص لما لاقيتها بتتصل بيا وبتقول إنها محتاجاني ضروري في البيت ولما روحت سألتها : في إيه قلقتيني ؟
- احنا لازم نتطلق يا مؤمن .
= منار انت كويسة ؟
- أنا كويسة بس احنا لازم نتطلق .
= كلامك دا بيقلقني أكتر وأنا عارفك كويس بالله عليكي عرفيني مالك علشان أطمن .
- صدقني احنا لازم نبعد من غير ما يكون في سبب ، أنا بس حاسة إني مش عاوزة أكمل وكدا كفاية بينا .
= منار ، أنا اختارتك من بين العالم كله فمتخذلنيش ، لو في غلطة واحدة أنا غلطتها أنا ممكن أدفع عمري كله بس أنت متسبنيش .
- وهي مش غلطتك أني هموت قبلك !!
= مــوت ؟ موت ايه انتِ بتهزري صح .. أكيد كل دا هزار وأنت بتختبريني .
- أنا جالي كانسر في المخ يا مؤمن .. آخر مرحلة خلاص بس أنا أصريت إني أفضل في البيت جنبك أرض المستشفيات ضالمة وأنا عاوزة أعيش آخر آيامي مطمنة عليك وعلى آسر عشان كدا عاوزاك تطلقني وتشوفلك عروسة صغيرة عشان تكمل معاك الحياة وصدقني كده أحسن .. متقلقش هنفضل أصدقاء وعلى العهد بينا طول العمر القصير اللي فاضلي .
= منار أنا عمري ما هطلقك وهننزل سوا نشوف أحسن دكتور في البلد أكيد في علاج أو ..
- أرجوك متصعبش عليا الموقف ، أنا عارفة وحاسة بيك بس صدقني أي محاولة لإني أتعالج مجرد حلم مش موجود .
= وفيها ايه لما نجرب ؟ ما طول عمرنا عايشين في أحلام ما بين الخيال والحقيقة ودايمًا بنكسب فسبيني أحاول وأوعدك بإني ..
- مش عاوزة أي أمل أرجوك ، مش عاوزة أي وعد مجهول مش عارفين هيرسينا على ايه بس صدقني أنا عاوزة اطمن عليك مش أكتر .
ده تقريبًا آخر كلام فاكره ليها لإن من بعدها وهي قررت انها متتكلمش ، تبص وتضحك وتفضل ساكتة لحد شهرين وربنا قرر أنه يرحمها من الألم اللي هي عاشت بيه وفضلت الحياة سودة في عيني ، جاتلي عروض كنت أنا وافقت عليها وهي عايشة علشان أفضل متمسك بالحلم علشانها ويمكن دا اللي مخليني ناجح دلوقتي ، وزاد على كدا إني بقيت بحكيلها كل يوم عني لما بعمل شيء وعن آسر لما ينجح ويكسب في الكورة زي ما كان بيحب سواء ابعتلها على الموبايل أو اكتبلها رسايل واسيبها في الأوضة المقفولة بتاعتها ، والموضع لسا مستمر معايا زي اللعنة .
أول لما المذيع شاف دموعي كان حابب ينهي الموضوع فسألني وقال : لو كانت قدامك دلوقتي هتقولها ايه ؟ فرديت عليه إني مش عاوز أقولها حاجة قد ما أنا بس عاوز أشوفها وأخليها تمسك الأيد اللي فيها دبتلها علشان تطمن إني مش هخون العهد وأنها دايمًا في بالي ومش بمزاجي .
بعد مجموعة من الأسئلة الكتير خلصت وسلمت ومشيت أول لما خرجت للشارع كان الليل هل بقمره وفضلت باصص للسما مستني تظهر على القمر وتبتسملي عشان أضحكلها وأكمل في في مشواري اللي بدأته معاها لحد ما أرجعلها .
