بقلم : ايناس رمضان
مجموعة قصص أحداثها حقيقية نقلتها كما هي وضفت خيال كمؤلف أتمنى تعجبكم .
انها ليلة عاصفة يوشك فيها المطر أن ينهمر من السماء وكأنها تبكي على رحيل عزيز النهاردة أول يوم ليا في الشغل أنا ليلى، بشتغل ممرضة في قسم الطوارئ استلمت الشغل وأخدت أول يوم ليا نبطشية بصراحة، أول لما دخلت قسم الطوارئ حسيت بقلبي أنقبض، كل شوية يدخل إما حد تعبان أوي أو ناس عاملة حادثة دا .
القسم طول الليل على كدا تعبت حسيت اني مش قادرة أقف من كتر التعب واحدة من الممرضات اللي معايا كان باين على وشها الطيبة قالتلي ارتاحي وأنا هاخد مكانك، حرفيًا مكنتش قادرة أقف على رجلي مشيت لحد الكرسي بالعافية .
حطيت راسي على المكتب وما حسيتش بنفسي نمت من كتر التعب وماحسيتش بحاجة لحد أما صحيت مفزوعة سمعت صوت صريخ وصوت ناس بتتألم مكنتش عارفة أعمل ايه، لاقيت زميلتي بتقولي بسرعة يا ليلى في واحدة حامل جاية في حادثة وبتنزف جامد الحقيها بسرعة هي في الأوضة اللي جنب الطوارئ جريت على الأوضة، لاقيت بركة دم الأرض كلها متغرقة دم والست بتتكلم بالعافية قلتلها هدي نفسك .
انتي هتدخلي عمليات وإن شاء الله كل حاجة هتكون كويسة وهتقومي بالسلامة انتي والولد اللي في بطنك لاقيتها مسكت ايدي ومش قادرة تاخد نفسها وقالتلي :
خلاص مفيش وقت أنا شيفاهم جايين عليا أنا خلاص بموت أرجوكي لو حد من أهلي جه عشان يستلم الجثة قوليلوا يخلي بالوا من ابني ارجوكي متنسيش وابتسمت وماتت .
ساعتها حسيت قلبي هيقف فضلت أصرخ واقول الحقوني الست بتموت ارجوكم، الدكتور جه جري بس للأسف كانت خلاص ماتت كنت هتجنن فضلت أعيط كأني اعرفها من زمان .
قلت لنفسي كل دا يحصل من أول يوم أنا مش عاوزة الشغلانة دي الشغل دا كله وجع قلب، حسيت بإيد على كتفي التفت، هدى زميلتي قالتلي معلش انتي مخضوضة عشان اول يوم بس، بعد كدا هتتعودي على انك تشوفي الحوادث والناس اللي بتموت بصتلها ومتكلمتش كنت حاسة إن قلبي وجعني .
روحت البيت وانا مش شايفة وعدا يوم ورا يوم ونسيت اللي حصل أو من كتر ما بشوف كمية الحوادث نسيت، وف يوم كان عليا النبطشية أنا وهدى والمفروض هنبات، الليلة دي كانت هادية ومفيش حوداث، قلت لهدى :
روحي نامي في الأوضة وأنا هفضل سهرانة لو جت حالات كتير هقومك من النوم المهم هدى راحت تنام شوية وأنا قعدت على الكرسي وعنيا غفلت، شفت الست اللي كانت بتموت لابسة ابيض وحزينة قربت مني وزي ما يكون بتزعقلي، بتقولي :
أنا مش قولتلك قوليلهم يخلوا بالهم من ابني ما قولتيش ليه دلوقتي ابني مات، يبقى انتي كمان هتموتي .
صحيت من النوم وأنا قلبي هيقف من الرعب كانت الدموع نازلة على خدي قلت أكيد دا كابوس ....
يتبع ... الــجــزء الــثــانــي
الروابط
آخر قصة : طريق الموت
صفحة الكاتب/ة : ايناس رمضان
